Page Text
________________
पत्ताणि य तारुण्णं, न य कहमऽवि तस्स जुवइवग्गम्मि। उप्पज्जइ रागमई, तीए वि हु पुरिसवग्गम्मि एवं च तेसि वच्चंतयम्मि, कालम्मि एगया कहवि । तुडिजोगा संजोगो, जाओ अच्वंतरागो य दत्तेण व तेण तओ, मयणहुयासणतविज्जमाणेण । वारिज्जंतेण वि जणणि - जणगपमुहेहि सयणेहि नडभूरिदाणपुव्वं, उव्वूढा सा विमुक्कलज्जेण । उज्झियगिहो य अह सो, नडेहिं सह भमिउमाऽऽढत्तो सुचिरं च दूरदेसंऽतरेसु, भमिरस्स कहवि से जायं । मुणिदंसणमीहाऽपोह-भावओ जाइसरणं च अह सुमरियपुव्वभवो, स महप्पा उज्झिउं विसयसंगं । पव्वज्ज पडिवण्णो, पत्तो अंते य देवत्तं इय अकयपडिविहाणं, अइयारं थोयमऽवि मुणेऊण । कुसलपडिखलणपडुयं, परिणतिकडुयं च कुसलमई पुव्वपवंचियविहिणा, तह कहवि हु कुणइ अत्तणो सोहिं। जह सुक्कज्झाणऽग्गीए, दड्डनीसेसकम्मवणो लोयऽग्गमत्थयमणी, सिद्धो बुद्धो निरंजणो। सव्वण्णू सव्वदरिसी य, अणंतसुहवीरिओ अक्खओ निरुजो निच्चो, कल्लाणी मंगलाऽऽलओ। अपुणब्भू सिवं ठाणं, उवेइ अपुणाऽऽगमं एवं पवयणसायर-पारगओ सो चरित्तसोहीए। पायच्छित्तविहण्णू, कुणइ विसुद्धं तयं खवगं एयारिसस्स गणिणो, असइ उवज्झायमाऽऽइपामूले । सोहेज्जा अप्पाणं, खवगो आराहणाकंखी पडिसेवणाऽइयारा, जइ वीसरिया कहिं पि होज्जाहि । सल्लुद्धरणनिमित्तं, तव्विसए इय भणेयव्वं जे मे जाणंति जिणा, अवराहा जेसु जेसु ठाणेसु । ते हं आलोएमि, उवट्ठिओ सव्वभावेणं एवं आलोइंतो, गारवरहिओ विसुद्धपरिणामो। विस्सुमरियाऽवराहु-त्थपावपसरं पि पडिहणइ इय पावकलिलजलविब्भमाए, संवेगरंगसालाए । संविग्गमणोमहुयर-कुसुमियवणराइतुल्लाए आराहणाए पडिदार-नवगमइए ममत्तवोच्छेए । तइए दारे आलो-यणाविहाणं पढमदारं पुव्वुवदंसियविहिणा, कयसोही वि हुन जं विणा खवगो। पावइ समाहिमऽह तं, सेज्जादारं परूवेमि सेज्जा भण्णइ वसही, तं पुण खरकम्मियाण चोराण । वेसाण मच्छबंधाण, लोद्धयाऽऽईण पावाण हिंसग-असब्भभासग-कीवाणं कामुयाऽऽइयाणं च । लोयाण पाडिवेसे, नो पडिगाहेज्ज खवगकए मा असमंजससद्दाऽऽइयाण, सवणाऽऽइणा उ खवगस्स । एवंविहसेज्जाए, होज्ज समाहीए वाघाओ कुच्छियसंसग्गीए, भावियमइणो वि भावपरियत्तो। संपज्जइ एत्तो च्चिय, पडिसिद्धा पावसंसग्गी असुहसुहसंगवसओ, दीसंति य पयडमेव दोसगुणा। तेरिक्खजोणियाण वि, गिरिसुयजुयलं इहं नायं विंझमहागिरिपरिसर-सरंतसरियासहस्सरमणिज्जा। कुलडेव विडवरुद्धा, अडवी कायंबरी अस्थि निबंऽबजंबुजंबीर-सालअंकोल्लवेणुसेलुया। सल्लइमोयइमालुय-बउलपलासा करंजा य । पुंनागनागसीवण्णि-सत्तवण्णप्पमुक्खरुक्खगणा । रेहंति जत्थ मंसल-परिमलकुसुमेहिं संछण्णा तत्थ य दीहरवडविडवि-कोडरे सूइगा सुगे दोण्णि। अविणट्ठलट्ठदेहे, समुचियसमयम्मि उ पसूया पक्खाऽनिलपइदिणचूण्णि-दाणओ वड्डिया य ते तीए। थेवोवलद्धनहगम-सामत्था अवरदियहम्मि चावल्लयाए तत्तो, उड्डित्ता जाव गंतुमाऽऽरद्धा । दुब्बलपक्खत्तणओ, ता पडिया अद्धमग्गम्मि तद्देसमाऽऽगएहि, अह एगो तेसि तावसेहिं सह । नीओ आवासम्मि, इयरो भिल्लेहि पल्लीए 'हण छिंद भिंद मंसं, अससु लहुं लोहियं पिब इमस्स"। इच्चाऽऽइदुट्टवयणाई, भिल्लपल्लीठिओ कीरो पइखणमऽविराम चिय, सुणमाणो तम्मणो दढं जाओ। इयरो य तावसाणं, करुणारसियंऽतकरणाण "मा मा मारह जीवे, कुणह दयं पंथियाऽऽइणो दुहिए। अणुकंपह" इच्चाऽऽइ-वयणेहिं भाविओ बाढं एवं वच्चंतम्मि, काले एगम्मि अवसरे राया। नामेण कणगकेऊ, वसंतपुरनयरवत्थव्वो विवरीयसिक्खतुरगेण, सिग्घवेगेण अवहडो इंतो। भिल्लसुएणं तरुसिहर-संठिएणं कहवि दिट्ठो अह पावभावणाभाविएण, तेणं पयंपियं ररे। भिल्ला ! धावह गेण्हह, सिग्घमिमं नरवई जंतं एयस्स दिव्वमणिकणग-रयणाऽलंकारमऽवहरह तुरियं । इहरा पेच्छंताण वि, तुम्हाण पलायणे लग्गो" देसम्मि जत्थ विहगा वि, एरिसा दूरओ स मोत्तव्वो। इइ चिन्तिऊण राया सिग्धं तत्तो अवकतो
॥ ५२१०॥ ।। ५२११॥ ॥५२१२॥ ॥५२१३॥ ॥ ५२१४॥ ॥५२१५॥ ॥ ५२१६॥ ॥ ५२१७॥ ।। ५२१८॥ ॥ ५२१९॥ ।। ५२२०॥ ॥५२२१॥ ॥ ५२२२॥ ॥५२२३॥ ॥ ५२२४॥ ॥ ५२२५ ॥ ॥५२२६॥ ॥ ५२२७॥ ॥ ५२२८॥ ॥ ५२२९॥ ।। ५२३०॥ ॥ ५२३१॥ ॥ ५२३२॥ ॥ ५२३३॥ ॥ ५२३४॥ ।। ५२३५ ।। ॥ ५२३६॥ ॥ ५२३७॥ ॥ ५२३८॥ ॥५२३९॥ ॥५२४०॥ ॥५२४१॥ ॥ ५२४२॥ ।। ५२४३॥ ॥ ५२४४॥ ॥ ५२४५॥ ॥ ५२४६॥ ॥ ५२४७॥
૧૪૯
| SR No. | 022285 |
| Book Title | Samveg Rangshala |
| Original Sutra Author | N/A |
| Author | Vinayrakshitvijay |
| Publisher | Shastra Sandesh |
| Publication Year | 2009 |
| Total Pages | 378 |
| Language | Sanskrit |
| Classification | Book_Devnagari |
| File Size | 17 MB |