Page Text
________________
"ॐ जुसः ॐ मृत्युंजयाय, ॐ वज्जपाणिने शूलपाणिने हर हर दह दह स्वरूपं दर्शय दर्शय हुं फट्" एयाए विज्जाए, सुइभूओ दढमऽणण्णचित्तो य । अठुत्तरसयवारं, सम्मं नयणेऽभिमंतित्ता
॥ ३३१४॥ अरुणोदयवेलाए, छायं पि नियं तहाऽभिमंतित्ता । पट्ठीए ठावित्ता, आइच्चं निच्चलसरीरा
।। ३३१५ ॥ अह अप्पणिज्जमेव-ऽप्पणो कए परकए य परछायं । सम्मं तक्कयपूओ, परमुवउत्तो पलोएज्जा
॥ ३३१६॥ जइ तं संपुण्णं, चिय पासइ ता नत्थि मरणमाऽऽवरिसं । कम-जंघ-जाणुविरहे, ति-दु-इगवरिसेहिं मरइ धुवं ॥३३१७ ॥ दसमासंऽतम्मि तदूरु-संखए कडिखए नवऽट्टहिं च । मरइ तदुदरअभावे, मासेहिं पंचहिं छहिं वा
॥ ३३१८॥ गीवाऽभावे चउतिदु-एक्कगसंखेहि मरइ मासेहिं । पक्खं कक्खाण खए, बाहुखए दस दिणे जियइ
॥ ३३१९॥ खंधखए अट्ठ दिणे, चउमासं जियइ हिययछिड्डुत्ते । पहरदुगं चिय जीवइ, छायाए सिरोविहूणाए
॥ ३३२०॥ अह सव्वहा वि छाया-वोच्छेओ भवइ जोगिणो कहवि । ता तक्खणमज्झे च्चिय, खिप्पं अक्खइ खयं नूणं ॥३३२१ ।। एमाइणो अणेगा, जइवि उवाया निदंसिया समए । आउपरिण्णाणकए, तह वि हु लेसेण इह कहिया
॥ ३३२२॥ इय पडु पडिदारं आउ-नाणदारं भणित्तु सत्तमगं । वोच्छं अणसणसंथार-दिक्खपडिवत्तिदारमहं
॥ ३३२३॥ अह भणियविहाणवसा, विण्णायाऽऽसण्णमरणसमयस्स । पज्जन्ताऽऽराहणविहि-मऽसेसमाऽऽराहिउमणस्स ॥३३२४ ।। जम्मजरामरणदारुण-दीहरसंसारवासभीरुस्स। जिणवयणसवणजायंत-तिव्वसंवेगसद्धस्स
॥ ३३२५ ॥ पयईए च्चिय निच्चं, सुस्समणोवासगस्स चित्तम्मि। पसमाऽऽइगुणसमिद्धस्स, भावणा भवइ किर एसा ॥३३२६ ।। अहह कहं परमाऽमय-कप्पे मह परिणए वि जिणवयणे । वसिउं जुज्जइ अज्जं पि, गिहवासे दुक्कियनिवासे ॥३३२७ ॥ धी! धी! मज्झ अणज्जस्स, इंदियऽत्थेसु संपउत्तस्स । परमत्थवेरिएसु वि, दाराऽऽइसु गाढरत्तस्स
॥ ३३२८॥ ते च्चिय धण्णा निज्जिणिय-मोहजोहा जिइंदिया सोमा। रागद्दोसविउत्ता, भवतरुनिसियाऽसिणो समणा ॥३३२९॥ पिहियाऽऽसवा तवड्ढा, धणियं किरियासु संपउत्ता जे । सासयसोक्खं मोक्खं, पडुच्च अब्भुज्जमंति दढं ॥ ३३३०॥ ता कइया तं होही, दियहं गीयत्थगुरुसमीवम्मि। जत्थ चरणं पवज्जिय, मोक्खऽत्थं उज्जमिस्सामि
॥ ३३३१॥ संपत्तेसु वि सेसेसु, सयलमोक्खऽत्थसाहणंऽगेसु । सव्वविरई विणा कह, सासयसोक्खो भवइ मोक्खो ॥३३३२॥ ता जावऽज्जवि छम्मास-वरिसपमुहं ममाऽऽउयं अस्थि । ता सव्वसंगचागेण, मोक्खमग्गं अणुसरामि ॥ ३३३३॥ कह व चिरं चिट्ठउ ता, समभावठियस्स किर मुहुत्तं पि। पव्वज्जपरिणई जइ, जायइ ता किं न पज्जत्तं ॥३३३४॥ इय परिणामपरिणओ, सविसेसुल्लसियतिव्वसंवेगो। गंतूण गुरुसमीवे, अपावभावो भणइ भंते!
॥ ३३३५॥ कारुण्णाऽमयनीसंद-सुंदरं भणियमाऽऽसि जं तुमए। आलोयणाइपुव्वं, पव्वज्जाऽऽइ करेज्जासु
॥३३३६॥ इच्छामो त्ति भणित्ता, मए वि पडिवण्णमाऽऽसि जं इण्हेिं । आउम्मि पहुप्पंते, चेव तयं तह करेमि अहं ।। ३३३७॥ आरुहिउमऽहं सुपुरिस!, पव्वज्जासुप्पसत्थबोहित्थं । निज्जामएण भवया, भवऽण्णवं तरिउमिच्छामि ।। ३३३८॥ तत्तो य तस्स निब्भर-भत्तिभारोणमन्तसीसस्स । निरवज्जं पव्वज्जं, गुरू वि आरोवए विहिणा
।। ३३३९॥ अह होज्ज देसविरओ, संमत्तरओ रओ य जिणधम्मे । ता तस्सऽणुव्वयाई, आरोवइ सुपरिसुद्धाई
॥३३४०॥ अणिआणोदारमणो, हरिसवसविसट्टकंटयकरालो। पूएइ गुरुं संघ, साहम्मियमाऽऽइ भत्तीए ।
॥ ३३४१ ॥ नियदव्वमऽउव्वजिणिद-भवणतब्बिंबवरपइट्ठासु । वियरइ पसत्थपोत्थय-सुतित्थतित्थयरपूयासु
॥३३४२॥ अह कहवि सव्वविरइ-कयाऽणुराओ विसुद्धमइकाओ। छिण्णसयणाऽणुराओ, विसयविसाउ विरत्तो ता ॥ ३३४३॥ संथारयपव्वजं पि, सव्वसावज्जवज्जणुज्जुत्तो । पडिवज्जइ संजमसज्ज-रज्जरसिओ हुस महप्पा
॥ ३३४४॥ तत्थ यऽणुव्वयधारी, पवण्णसंथारसमणदिक्खो य । संलेहणापुरस्सर-मंऽतम्मि अणसणं कुणइ
।। ३३४५ ॥ इय अणसणसंथारग-दिक्खापडिवत्तिदारमऽट्ठमयं । भणियं तब्भणणे पुण भणिओ गिहिविसयपरिणामो संपइ समग्गगुणमणि-निहिणो मुणिणो पडुच्च परिणामो । उवदंसिज्जइ सो पुण, हवेज्ज इय चिन्तणेण सुहो ॥३३४७॥ पुव्वावरत्तकाले, जागरमाणो य धम्मजागरियं । परिवड्डियपरिणामो, मुणी मणम्मि विचिन्तेइ
॥३३४८॥ रोगजरामगरालो, निरंतरुप्पत्तिमरणनीरिल्लो। दव्वक्खेत्ताऽऽइचउ-विहाऽऽवयापूरिओऽणाई
॥ ३३४९ ॥ अणवरउटुिंतवियप्प-लहरीहीरंतजन्तुसंताणो। अइतिक्खदुक्खहेऊ, अहो ! रउद्दो भवसमुद्दो
॥ ३३५०॥
| SR No. | 022285 |
| Book Title | Samveg Rangshala |
| Original Sutra Author | N/A |
| Author | Vinayrakshitvijay |
| Publisher | Shastra Sandesh |
| Publication Year | 2009 |
| Total Pages | 378 |
| Language | Sanskrit |
| Classification | Book_Devnagari |
| File Size | 17 MB |