________________
अ० १ निसढागामिभवो]
सुत्तागमे
७९५
अरिहनेमी निसढस्स कुमारस्स अयमेयाख्वमज्झत्थियं जाव वियाणित्ता अट्ठारसहिं समणसहस्सेहिं जाव नन्दणवणे उज्जाणे समोसढे। परिसा निग्गया। तए णं निसढे कुमारे इमीसे कहाए लढे समाणे हट्ट. चाउरघण्टेणं आसरहेणं निग्गए जहा जमाली जाव अम्मापियरो आपुच्छित्ता पव्वइए अणगारे जाए जाव गुत्तबम्भयारी ॥१७७॥ तए णं से निसढे अणगारे अरहओ अरिहनेमिस्स तहारूवाणं थेराणं अन्तिए सामाइयमाइयाइं एक्कारस अङ्गाई अहिज्जइ २ त्ता बहूहिं चउत्थछट्ठ जाव विचित्तेहिं तवोकम्मेहिं अप्पाणं भावेमाणे बहुपडिपुण्णाइं नव वासाइं सामण्णपरियागं पाउणइ २ त्ता बायालीसं भत्ताई अणसणाए छेएइ, आलोइयपडिक्कन्ते समाहिपत्ते आणुपुव्वीए कालगए ॥ १७८ ॥ तए णं से वरदत्ते अणगारे निसढं अणगारं कालगयं जाणित्ता जेणेव अरहा अरिट्ठनेमी तेणेव उवागच्छइ २ त्ता जाव एवं वयासी-एवं खलु देवाणुप्पियाणं अन्तेवासी निसढे नामं अणगारे पगइभद्दए जाव विणीए, से णं भन्ते ! निसढे अणगारे कालमासे कालं किच्चा कहिं गए कहिं उववन्ने ? ॥ १७९ ॥ वरदत्ताइ अरहा अरिट्ठनेमी वरदत्तं अणगारं एवं वयासी-एवं खलु वरदत्ता ! ममं अन्तेवासी निसढे नामं अणगारे पगइभद्दे जाव विणीए ममं तहारूवाणं थेराणं अन्तिए सामाइयमाइयाई एक्कारस अङ्गाइं अहिज्जित्ता बहुपडिपुण्णाइं नव वासाइं सामण्णपरियागं पाउणित्ता बायालीसं भत्ताइं अणसणाए छेइत्ता आलोइयपडिक्कन्ते समाहिपत्ते कालमासे कालं किच्चा उर्दू चन्दिमसूरियगहगणणक्खत्तताराख्वाणं सोहम्मीसाणं जाव अच्चुए तिण्णि य अट्ठारसुत्तरे गेविजविमाणावाससए वीइवइत्ता सव्वट्ठसिद्धविमाणे देवत्ताए उववन्ने, तत्थ णं देवाणं तेत्तीसं सागरोवमाइं ठिई पन्नत्ता, तत्थ णं निसढस्सवि देवस्स तेत्तीसं सागरोवमाइं ठिई पण्णत्ता ॥ १८० ॥ से णं भन्ते ! निसढे देवे ताओ देवलोगाओ आउक्खएणं भवक्खएणं ठिइक्खएणं अणन्तरं चयं चइत्ता कहिं गच्छिहिइ, कहिं उववजिहिइ ? वरदत्ता ! इहेव जम्बुद्दीवे दीवे महाविदेहे वासे उन्नाए नयरे विसुद्धपिइवंसे रायकुले पुत्तत्ताए पच्चायाहिइ । तए णं से उम्मुक्कबालभावे विनयपरिणयमेत्ते जोव्वणगमणुप्पत्ते तहारूवाणं थेराणं अन्तिए केवलबोहिं बुज्झिहिइ २ त्ता अगाराओ अणगारियं पव्वजिहिइ । से णं तत्थ अणगारे भविस्सइ इरियासमिए जाव गुत्तबम्भयारी । से णं तत्थ बहूहिं चउत्थछट्टमदसमदुवालसेहिं मासद्धमासखमणेहिं विचित्तेहिं तवोकम्मेहिं अप्पाणं भावेमाणे बहूइं वासाइं सामण्णपरियागं पाउणिस्सइ २ त्ता मासियाए संलेहणाए अत्ताणं झुसिहिइ २ त्ता सहिँ भत्ताई अणसणाए छेइहिइ, जस्सट्टाए कीरइ थेरकप्पभावे जिणकप्पभावे मुण्डभावे अण्हाणए जाव अदन्तवणए अच्छत्तए अणोवाहणए फलहसेजा कट्ठसेज्जा केसलोए बम्भचेर
