________________
सुत्तागमे
७५६
[निरयावलियाओ रिद्ध० । पुण्णभद्दे उजाणे । तत्थ णं चम्पाए नयरीए सेणियस्स रन्नो पुत्ते चेल्लणाए देवीए अत्तए कूणिए नामं राया होत्था, महया० । तस्स णं कूणियस्स रन्नो पउमावई नामं देवी होत्था, सोमालपाणिपाया जाव विहरइ ॥ ४ ॥ तत्थ णं चम्पाए नयरीए सेणियस्स रन्नो भज्जा कूणियस्स रन्नो चुल्लमाउया काली नामं देवी होत्था, सोमाल. जाव सुरूवा। तीसे णं कालीए देवीए पुत्ते काले नाम कुमारे होत्था, सोमाल० जाव सुरूवे ॥ ५॥ तए णं से काले कुमारे अन्नया कयाइ तिहिं दन्तिसहस्सेहिं तिहिं रहसहस्सेहिं तिहिं आससहस्सेहिं तिहिं मणुयकोडीहिं गरुलवूहे एकारसमेणं खण्डेणं कूणिएणं रन्ना सद्धिं रहमुसलं संगामं ओयाए ॥ ६ ॥ तए णं तीसे कालीए देवीए अन्नया कयाइ कुडुम्बजागरियं जागरमाणीए अयमेयारूवे अज्झथिए जाव समुप्पज्जित्था एवं खलु ममं पुत्ते कालकुमारे तिहिं दन्तिसहस्सेहिं जाव ओयाए, से मन्ने किं जइस्सइ ? नो जइस्सइ ? जीविस्सइ ? नो जीविस्सइ ? पराजिणिस्सइ ? नो पराजिणिस्सइ ? काले णं कुमारे अहं जीवमाणं पासिज्जा ? ओहयमण० जाव झियाइ ॥ ७ ॥ तेणं कालेणं तेणं समएणं समणे भगवं महावीरे समोसरिए। परिसा निग्गया । तए णं तीसे कालीए देवीए इमीसे कहाए लट्ठाए समाणीए अयमेयारूवे अज्झत्थिए जाव समुप्पजित्था-एवं खलु समणे भगवं० पुव्वाणुपुर्दिव जाव विहरइ, तं महाफलं खलु तहारूवाणं जाव विउलस्स अट्ठस्स गहणयाए, तं गच्छामि णं समणं जाव पजुवासामि, इमं च णं एयारूवं वागरणं पुच्छिस्सामित्तिक टु एवं संपेहेइ २ त्ता कोडम्बियपुरिसे सद्दावेइ २ त्ता एवं वयासी-खिप्पामेव भो देवाणुप्पिया! धम्मियं जाणप्पवरं जुत्तामेव उवट्ठवेह उवट्ठवित्ता जाव पञ्चप्पिणन्ति ॥ ८॥ तए णं सा काली देवी व्हाया अप्पमहग्घाभरणालंकियसरीरा बहूहिं खुजाहिं जाव महत्तरगविन्दपरिक्खित्ता अन्तेउराओ निग्गच्छइ २ त्ता जेणेव बाहिरिया उवट्ठाणसाला जेणेव धम्मिए जाणप्पवरे तेणेव उवागच्छइ २ त्ता धम्मियं जाणप्पवरं दुरूहइ २ त्ता नियगपरियालसंपरिवुडा चम्पं नयरिं मज्झमज्झेणं निग्गच्छइ २ त्ता जेणेव पुण्णभद्दे उजाणे तेणेव उवागच्छइ २ त्ता छत्ताईए जावधम्मियं जाणप्पवरं ठवेइ २ त्ता धम्मियाओ जाणप्पवराओ पच्चोरुहइ २ त्ता बहूहिं खुजाहिं जाव विन्दपरिक्खित्ता जेणेव समणे भगवं महावीरे तेणेव उवागच्छइ २ त्ता समणं भगवं महावीरं तिक्खुत्तो वन्दइ २ त्ता ठिया चेव सपरिवारा सुस्सूसमाणी नमसमाणी अभिमुहा विणएणं पञ्जलिउडा पजुवासइ ॥ ९ ॥ तए णं समणे भगवं जाव कालीए देवीए तीसे य महइमहालियाए धम्मकहा भाणियव्वा जाव समणोवासए वा समणोवासिया वा विहरमाणे आणाए आराहए भवइ
