________________
पा० १५ अ० मा० ण० मं०]
सुत्तागमे
झुंजइ २ त्ता जोगं अणुपरियट्टइ २ त्ता विप्पजहइ० विगयजोई यावि भवइ । ता जया णं सूरं गइसमावण्णं अभीईणक्खत्ते गइसमावण्णे पुरच्छिमाए भागाए समासादेइ पुर० २ त्ता चत्तारि अहोरत्ते छच्च मुहुत्ते सूरेण सद्धिं जोयं जोएइ २ त्ता जोयं अणुपरियइ २ त्ता विप्पजहइ० विगयजोई यावि भवइ, एवं अहोरत्ता छ एकवीसं मुहुत्ता य तेरस अहोरत्ता बारस मुहुत्ता य वीसं अहोरत्ता तिण्णि मुहुत्ता य सव्वे भाणियव्वा जाव जया णं सूरं गइसमावण्णं उत्तरासाढाणक्खत्ते गइसमावण्णे पुरच्छिमाए भागाए समासादेइ पु० २ त्ता वीसं अहोरत्ते तिण्णि य मुहुत्ते सूरेण सद्धिं जोयं जोएइ जो० २ त्ता जोयं अणुपरियट्टइ जो० २ त्ता विप्पजहइ० विगयजोई यावि भवइ, ता जया णं सूरं गइसमावण्णं णक्खत्ते गइसमावण्णे पुरच्छिमाए भागाए समासादेइ पु० २ ता सूरेण सद्धिं जोयं जुंजइ २ त्ता जोयं अणुपरियट्टइ २ त्ता जाव विगयजोई यावि भवइ ॥ ८२ ॥ ता णक्खत्तेणं मासेणं चंदे कइ मंडलाइं चरइ ? ता तेरस मंडलाइं चरइ तेरस य सत्तट्ठिभागे मंडलस्स, ता णक्खत्तेणं मासेणं सूरे कइ मंडलाइं चरइ ? ता तेरस मंडलाइं चरइ चोत्तालीसं च सत्तट्ठिभागे मंडलस्स, ता णक्खत्तेणं मासेणं णक्खत्ते कइ मंडलाइं चरइ ? ता तेरस मंडलाइं चरइ अद्धसीयालीसं च सत्तट्ठिभागे मंडलस्स, ता चंदेणं मासेणं चंदे कइ मंडलाइं चरइ ? ता चोद्दस चउभागाइं मंडलाइं चरइ एगं च चउव्वीससयभागं मंडलस्स, ता चंदेणं मासेणं सूरे कइ मंडलाइं चरइ ? ता पण्णरस चउभागूणाई मंडलाइं चरइ एगं च चउवीससयभागं मंडलस्स, ता चंदेणं मासेणं णक्खत्ते कइ मंडलाइं चरइ ? ता पण्णरस चउभागूणाई मंडलाइं चरइ छच्च चउवीससयभागे मंडलस्स, ता उडुणा मासेणं चंदे कइ मंडलाइं चरइ ? ता चोद्दस मंडलाइं चरइ तीसं च एगट्ठिभागे मंडलस्स, ता उडुणा मासेणं सूरे कइ मंडलाइं चरइ ? ता पण्णरस मंडलाइं चरइ, ता उडुणा मासेणं णक्खत्ते कइ मंडलाइं चरइ? ता पण्णरस मंडलाइं चरइ पंच य बावीससयभागे मंडलस्स, ता आइच्चेणं मासेणं चंदे कइ मंडलाइं चरइ ? ता चोइस मंडलाइं चरइ एकारसभागे मंडलस्स, ता आइच्चेणं मासेणं सूरे कइ मंडलाइं चरइ ? ता पण्णरस चउभागाहियाइं मंडलाई चरइ, ता आइच्चेणं मासेणं णक्खत्ते कइ मंडलाई चरइ ? ता पण्णरस चउभागाहियाइं मंडलाइं चरइ पंचतीसं च चउवीससयभागमंडलाइं चरइ, ता अभिवड्डिएणं मासेणं चंदे कइ मंडलाइं चरइ ? ता पण्णरस मंडलाइं० तेसीइं छलसीयसयभागे मंडलस्स, ता अभिवड्डिएणं मासेणं सूरे कइ मंडलाइं चरइ ? ता सोलस मंडलाइं चरइ तिहिं भागेहिं ऊणगाई दोहिं अडयालेहिं सएहिं मंडलं छेत्ता, ता अभिवड्डिएणं मासेणं णक्खत्ते कइ मंडलाइं चरइ ? ता
