________________
सुत्तागमे
४८८
[पण्णवणासुतं जीवेणं वद्धस्स जाव पोग्गलपरिणामं पप्प णवविहे अणुभावे पन्नत्ते ॥ ६०३ ॥ सायावेयणिज्जस्स णं भंते ! कम्मस्स जीवेणं बद्धस्स जाव पोग्गलपरिणामं पप्प कइविहे अणुभावे पन्नत्ते ? गोयमा ! सायावेयणिजस्स णं कम्मस्स जीवेणं बद्धस्स जाव अट्ठविहे अणुभावे पन्नत्ते । तंजहा-मणुण्णा सद्दा १, मणुण्णा रूवा २, मणुण्णा गंधा ३, मणुण्णा रसा ४, मणुण्णा फासा ५, मणोसुहया ६, वयसुहया ७, कायसुहया ८, जं वेएइ पोग्गलं वा पोग्गले वा पोग्गलपरिणामं वा वीससा वा पोग्गलाणं परिणाम तेसिं वा उदएणं सायावेयाणिजं कम्मं वेएइ, एस णं गोयमा ! सायावेयणिजे कम्मे, एस णं गोयमा ! सायावेयणिज्जस्स जाव अट्ठविहे अणुभावे पन्नत्ते । असायावेयणिज्जस्स णं भंते ! कम्मस्स जीवेणं तहेव पुच्छा उत्तरं च, णवरं अमणुण्णा सद्दा जाव कायदुहया, एस णं गोयमा ! असायावेयणिज्जे कम्मे, एस णं गोयमा ! असायावेयणिज्जस्स जाव अट्ठविहे अणुभावे पन्नत्ते ॥ ६०४ ॥ मोहणिजस्स णं भंते ! कम्मस्स जीवेणं बद्धस्स जाव कइविहे अणुभावे पन्नत्ते ? गोयमा ! मोहणिजस्स णं कम्मस्स जीवेणं बद्धस्स जाव पंचविहे अणुभावे पन्नत्ते । तंजहा-सम्मत्तवेयणिजे, मिच्छत्तवेयणिजे, सम्मामिच्छत्तवेयणिजे, कसायवेयणिज्जे, नोकसायवेयणिजे । जं वेएइ पोग्गलं वा पोग्गले वा पोग्गलपरिणामं वा वीससा वा पोग्गलाणं परिणामं तेसिं वा उदएणं मोहणिजं कम्मं वेएइ, एस णं गोयमा ! मोहणिजस्स कम्मस्स जाव पंचविहे अणुभावे पन्नत्ते ॥ ६०५ ॥ आउयस्स णं भंते ! कम्मस्स जीवेणं तहेव पुच्छा। गोयमा ! आउयस्स णं कम्मस्स जीवेणं बद्धस्स जाव चउविहे अणुभावे पन्नत्ते । तंजहानेरइयाउए, तिरियाउए, मणुयाउए, देवाउए, जं वेएइ पोग्गलं वा पोग्गले वा पोग्गलपरिणामं वा वीससा वा पोग्गलाणं परिणाम तेर्सि वा उदएणं आउयं कम्मं वेएइ, एस णं गोयमा ! आउए कम्मे, एस णं गोयमा ! आउयकम्मस्स जाव चउव्विहे अणुभावे पन्नत्ते ॥ ६०६ ॥ सुहणामस्स णं भंते ! कम्मस्स जीवेणं पुच्छा। गोयमा ! सुहणामस्स णं कम्मस्स जीवेणं. 'चउद्दसविहे अणुभावे पन्नत्ते । तंजहा–इट्ठा सद्दा १, इट्टा रूवा २, इट्ठा गंधा ३, इट्ठा रसा ४, इट्ठा फासा ५, इट्ठा गई ६, इट्ठा ठिई ७, इढे लावण्णे ८, इट्ठा जसोकित्ती ९, इढे उट्ठाणकम्मबलवीरियपुरिसक्कारपरक्कमे १०, इट्ठस्सरया ११, कंतस्सरया १२, पियस्सरया १३, मणुण्णस्सरया १४, जं वेएइ पोग्गलं वा पोग्गले वा पोग्गलपरिणामं वा वीससा वा पोग्गलाणं परिणामं तेसिं वा उदएणं सुहणामं कम्म वेएइ, एस णं गोयमा ! सुहणामकम्मे, एस णं गोयमा! सुहणामस्स कम्मस्स जाव चउद्दसविहे अणुभावे पन्नत्ते । दुहनामस्स णं भंते ! पुच्छा । गोयमा ! एवं चेव,
