________________
४३७
प० १७ उ० २ णेरइयलेस्सा] सुत्तागमे असंजया तेसिं चत्तारि किरियाओ कज्जति, तंजहा-आरंभिया परिग्गहिया मायावत्तिया अपच्चक्खाणकिरिया । तत्थ णं जे ते मिच्छादिट्ठी जे सम्मामिच्छादिट्ठी तेसिं नियइयाओ पंच किरियाओ कज्नति, तंजहा-आरंभिया परिग्गहिया मायावत्तिया अपच्चक्खाणकिरिया मिच्छादसणवत्तिया, सेसं जहा नेरइयाणं ॥ ४८३ ॥ वाणमंतराणं जहा असुरकुमाराणं । एवं जोइसियवेमाणियाण वि, नवरं ते वेयणाए दुविहा पन्नत्ता । तंजहा-माइमिच्छदिट्ठीउववन्नगा य अमाइसम्मदिट्ठीउववन्नगा य । तत्थ णं जे ते माइमिच्छदिट्ठीउववन्नगा ते णं अप्पवेयणतरागा, तत्थ णं जे ते अमाइसम्मदिट्ठीउववन्नगा ते णं महावेयणतरागा, से तेणटेणं गोयमा! एवं वुच्चइ० । सेसं तहेव ॥ ४८४ ॥ सलेसा णं भंते ! नेरइया सव्वे समाहारा, समसरीरा, समुस्सासनिस्सासा-सव्वे वि पुच्छा । गोयमा ! एवं जहा ओहिओ गमओ तहा सलेसागमओ वि निरवसेसो भाणियव्वो जाव वेमाणिया । कण्हलेसा णं भंते ! नेरइया सव्वे समाहारा-पुच्छा । गोयमा ! जहा ओहिया, नवरं नेरइया वेयणाए माइमिच्छदिट्ठीउववन्नगा य अमाइसम्मदिट्ठीउववन्नगा य भाणियव्वा, सेसं तहेव जहा ओहियाणं । असुरकुमारा जाव वाणमंतरा एए जहा ओहिया, नवरं मणुस्साणं किरियाहिं विसेसो-जाव तत्थ णं जे ते सम्मदिट्ठी ते तिविहा पन्नत्ता। तंजहा-संजया असंजया संजयासंजया य, जहा ओहियाणं । जोइसियवेमाणिया आइल्लियासु तिसु लेसासु ण पुच्छिज्जंति । एवं जहा किण्हलेसा विचारिया तहा नीललेसा वि विचारेयव्वा । काउलेसा नेरइएहितो आरब्भ जाव वाणमंतरा, नवरं काउलेसा नेरइया वेयणाए जहा ओहिया। तेउलेसाणं भंते ! असुरकुमाराणं ताओ चेव पुच्छाओ । गोयमा ! जहेव ओहिया तहेव, नवरं वेयणाए जहा जोइसिया। पुढविआउवणस्सइपंचेंदियतिरिक्खमणुस्सा जहा ओहिया तहेव भाणियव्वा, नवरं मणूसा किरियाहिं जे संजया ते पमत्ता य अपमत्ता य भाणियव्वा, सरागा वीयरागा नत्थि । वाणमंतरा तेउलेसाए जहा असुरकुमारा, एवं जोइसियवेमाणिया वि, सेसं तं चेव । एवं पम्हलेसा वि भाणियव्वा, नवरं जेसिं अस्थि । सुक्कलेस्सा वि तहेव जेसिं अत्थि, सव्वं तहेव जहा
ओहियाणं गमओ, नवरं पम्हलेस्ससुक्कलेस्साओ पंचेंदियतिरिक्खजोणियमणूसवेमाणियाणं चेव, न सेसाणं ति ॥ ४८५ ॥ पन्नवणाए भगवईए सत्तरसमे लेस्सापए पढमो उद्देसओ समत्तो ॥
कइ णं भंते ! लेसाओ पन्नत्ताओ? गोयमा ! छल्लेसाओ पन्नत्ताओ । तंजहाकण्हलेसा, नीललेसा, काउलेसा, तेउलेसा, पम्हलेसा, सुक्कलेसा ॥ ४८६ ॥ नेरइयाणं भंते ! कइ लेसाओ पन्नत्ताओ ? गोयमा ! तिन्नि० तंजहा-किण्हलेसा,
