________________
५० १२ वेउब्वियसरीरमुक्केलगा] सुत्तागमे
४०५ वणीयवयणे, अवणीओवणीयवयणे, तीतवयणे, पडुप्पन्नवयणे, अणागयवयणे, पच्चक्खवयणे, परोक्खवयणे । इच्चेइयं भंते ! एगवयणं वा जाव परोक्खवयणं वा वयमाणे पण्णवणी णं एसा भासा, ण एसा भासा मोसा ? हंता गोयमा ! इच्चेइयं एगवयणं वा जाव परोक्खवयणं वा वयमाणे पण्णवणी णं एसा भासा, ण एसा भासा मोसा ॥ ४०३ ॥ एएसि णं भंते ! जीवाणं सच्चभासगाणं मोसभासगाणं सच्चामोसभासगाणं असच्चामोसभासगाणं अभासगाण य कयरे कयरेहितो अप्पा वा बहुया वा तुल्ला वा विसेसाहिया वा ? गोयमा ! सव्वत्थोवा जीवा सच्चभासगा, सच्चामोसभासगा असंखेजगुणा, मोसभासगा असंखेजगुणा, असच्चामोसभासगा असंखेजगुणा, अभासगा अणंतगुणा ॥ ४०४ ॥ पन्नवणाए भगवईए एक्कारसमं भासापयं समत्तं ॥
कइ णं भंते ! सरीरा पन्नत्ता ? गोयमा ! पंच सरीरा पन्नत्ता । तंजहा-ओरालिए, वेउव्विए, आहारए, तेयए, कम्मए । नेरइयाणं भंते ! कइ सरीरया पन्नत्ता? गोयमा ! तओ सरीरया पन्नत्ता । तंजहा-वेउव्विए, तेयए, कम्मए । एवं असुरकुमाराण वि जाव थणियकुमाराणं । पुढविकाइयाणं भंते ! कइ सरीरया पन्नत्ता ? गोयमा ! तओ सरीरया पन्नत्ता । तंजहा--ओरालिए, तेयए, कम्मए । एवं वाउकाइयवजं जाव चउरिंदियाणं । वाउकाइयाणं भंते ! कइ सरीरया पन्नत्ता? गोयमा ! चत्तारि सरीरया पन्नत्ता। तंजहा–ओरालिए, वेउबिए, तेयए, कम्मए । एवं पंचिंदियतिरिक्खजोणियाण वि । मणुस्साणं भंते ! कइ सरीरया पन्नत्ता ? गोयमा ! पंच सरीरया पन्नत्ता । तंजहा-ओरालिए, वेउव्विए, आहारए, तेयए, कम्मए । वाणमंतरजोइसियवेमाणियाणं जहा नारगाणं ॥ ४०५-६ ॥ केवइया णं भंते ! ओरालियसरीरया पन्नत्ता ? गोयमा ! दुविहा पन्नत्ता। तंजहाबद्धेल्लया य मुक्केल्लया य । तत्थ णं जे ते बद्धेल्लया ते णं असंखेजा, असंखेजाहिं उस्सप्पिणिओसप्पिणीहिं अवहीरंति कालओ, खेत्तओ असंखेजा लोगा। तत्थ णं जे ते मुकेल्लया ते णं अणंता, अणंताहिं उस्सप्पिणिओसप्पिणीहि अवहीरंति कालओ, खेत्तओ अणंता लोगा, अभवसिद्धिएहितो अणंतगुणा सिद्धाणंतभागो। केवइया णं भंते ! वेउव्वियसरीरया पन्नत्ता ? गोयमा ! दुविहा पन्नत्ता । तंजहा-बद्धेल्लगा य मुक्केलगा य । तत्थ णं जे ते बद्धेल्लगा ते णं असंखेजा, असंखेजाहिं उस्सप्पिणिओसप्पिणीहिं अवहीरंति कालओ, खेत्तओ असंखेजाओ सेढीओ पयरस्स असंखेजइभागो । तत्थ णं जे ते मुक्केलगा ते णं अणंता, अणंताहिं उस्सप्पिणिओसप्पिणीहिं अवहीरंति कालओ, जहा ओरालियस्स मुक्केल्लगा तहेव वेउव्वियस्स वि भाणियव्वा
