________________
प० २ जोइसियविमाणवण्णओ] सुत्तागमे
३०७ लाणं पि । णवरं मन्दरस्स पव्वयस्स उत्तरेणं । महाकाले एत्थ पिसाइंदे पिसायराया परिवसइ जाव विहरइ। एवं जहा पिसायाणं तहा भूयाणं पि जाव गंधव्वाणं । नवरं इंदेसु णाणत्तं भाणियव्वं इमेण विहिणा-भूयाणं सुरूवपडिरूवा, जक्खाणं पुण्णभद्दमाणिभद्दा, रक्खसाणं भीममहाभीमा, 'किन्नराणं किन्नरकिंपुरिसा, किंपुरिसाणं सप्पुरिसमहापुरिसा, महोरगाणं अइकायमहाकाया, गंधव्वाणं गीयरइगीयजसा जाव विहरन्ति । काले य महाकाले सुरूवपडिरूवपुण्णभद्दे य । तह चेव माणिभद्दे भीमे य तहा महाभीमे ॥ १॥ किन्नरकिंपुरिसे खलु सप्पुरिसे खलु तहा महापुरिसे । अइकायमहाकाए गीयरई चेव गीयजसे ॥ २ ॥ ११८ ॥ कहि णं भंते ! अणवन्नियाणं देवाणं ठाणा पन्नत्ता ? कहि णं भंते ! अणवन्निया देवा परिवसंति ?, गोयमा ! इमीसे रयणप्पभाए पुढवीए रयणामयस्स कंडस्स जोयणसहस्सबाहलस्स उवरिं हेट्ठा य एगं जोयणसयं सयं वजेत्ता मज्झे अट्ठसु जोयणसएसु एत्थ णं अणवन्नियाणं देवाणं तिरियमसंखेजा णयरावाससयसहस्सा भवन्तीति मक्खायं । ते णं जाव पडिरूवा । एत्थ णं अणवन्नियाणं देवाणं ठाणा पन्नत्ता। उववाएणं लोयस्स असंखेज्जइभागे, समुग्घाएणं लोयस्स असंखेज्जइभागे, सट्ठाणेणं लोयस्स असंखेजइभागे । तत्थ णं बहवे अणवन्निया देवा परिवसंति । महिड्डिया जहा पिसाया जाव विहरति । सण्णिहियसामाणा इत्थ दुवे अणवन्निंदा अणवन्नियरायाणो परिवसंति । महिड्डिया, एवं जहा कालमहाकालाणं दोण्हं पि दाहिणिल्लाणं उत्तरिल्लाण य भणिया तहा सण्णिहियसामाणाणं पि भाणियव्वा। संगहणीगाहा–अणवन्नियपणवन्नियइसिवाइयभूयवाइया चेव। कंदिय महाकंदिय कोहंड पयंगए चेव ॥१॥ इमे इंदा-संनिहिया सामाणा धायविधाए इसी य इसिवाले । ईसरमहेसरे विय हवइ सुवच्छे विसाले य ॥ २॥ हासे हासरई चेव सेए तहा भवे महासेए । पयए पयगवई विय नेयव्वा आणुपुव्वीए ॥ ३ ॥ ११९ ॥ कहि णं भंते ! जोइसियाणं देवाणं पज्जत्तापजत्ताणं ठाणा पन्नत्ता ? कहि णं भंते ! जोइसिया देवा परिवसंति ?, गोयमा ! इमीसे रयणप्पभाए पुढवीए बहुसमरमणिज्जाओ भूमिभागाओ सत्तणउए जोयणसए उड्ढे उप्पइत्ता दसुत्तरजोयणसयबाहल्ले तिरियमसंखेजे जोइसविसए । एत्थ णं जोइसियाणं देवाणं तिरियमसंखेजा जोइसियविमाणावाससयसहस्सा भवन्तीति मक्खायं । ते णं विमाणा अद्धकविठ्ठगसंठाणसंठिया, सव्वफालिहमया, अब्भुग्गयमूसियपहसिया इव विविहमणिकणगरयणभत्तिचित्ता, वाउद्भुयविजयवेजयंतीपडागाछत्ताइछत्तकलिया, . तुंगा, गगणतलमभिलंघमाणसिहरा, जालंतररयणपंजलुम्मिलियब्व मणिकणगथूभियागा, वियसियसयवत्तपुंडरीया, तिलयरयणड्डचंदचित्ता, नाणामणिमयदामालंकिया,
