________________
२८२ सुत्तागमे
[पण्णवणासुत्तं प्पगारा। सेत्तं एगखुरा । से किं तं दुखुरा ? दुखुरा अणेगविहा पन्नत्ता। तंजहा-उट्टा, गोणा, गवया, रोज्झा, पसया, महिसा, मिया, संबरा, वराहा, अया, एलगरुरुसरभचमरकुरंगगोकन्नमाई, जेयावन्ने तहप्पगारा । सेत्तं दुखुरा । से किं तं गंडीपया ? गंडीपया अणेगविहा पन्नत्ता । तंजहा-हत्थी, हत्थीपूयणया, मंकुणहत्थी, खगा(ग्गा), गंडा, जेयावन्ने तहप्पगारा। सेत्तं गंडीपया। से किं तं सणप्फया ? सणप्फया अणेगविहा पन्नत्ता। तंजहा-सीहा, वग्धा, दीविया, अच्छा, तरच्छा, परस्सरा, सियाला, बिडाला, सुणगा, कोलसुणगा, कोकंतिया, ससगा, चित्तगा, चिल्ललगा, जेयावन्ने तहप्पगारा। सेत्तं सणप्फया। ते समासओ दुविहा पन्नत्ता । तंजहा-समुच्छिमा य गब्भवक्कन्तिया य । तत्थ णं जे ते संमुच्छिमा ते सव्वे नपुंसगा। तत्थ णं जे ते गब्भवतिया ते तिविहा पन्नत्ता। तंजहा-इत्थी, पुरिसा, नपुंसगा। एएसि णं एवमाइयाणं थलयरपंचिन्दियतिरिक्खजोणियाणं पज्जत्तापजत्ताणं दस जाइकुलकोडिजोणिप्पमुहसयसहस्सा भवन्तीति मक्खायं । सेत्तं चउप्पयथलयरपंचिन्दियतिरिक्खजोणिया ॥५१॥ से किं तं परिसप्पथलयरपंचिन्दियतिरिक्खजोणिया ? परिसप्पथलयरपंचिन्दियतिरिक्खजोणिया दुविहा पन्नत्ता। तंजहा-उरपरिसप्पथलयरपंचिन्दियतिरिक्खजोणिया य भुयपरिसप्पथलयरपंचिन्दियतिरिक्खजोणिया य ॥ ५२ ॥ से किं तं उरपरिसप्पथलयरपंचिन्दियतिरिक्खजोणिया ? उरपरिसप्पथलयरपंचिन्दियतिरिक्खजोणिया चउव्विहा पन्नत्ता । तंजहा-अही, अयगरा, आसालिया, महोरगा। से किं तं अही ? अही दुविहा पन्नत्ता। तंजहा-दव्वीकरा य मउलिणो य । से किं तं दव्वीकरा ? दव्वीकरा अणेगविहा पन्नत्ता। तंजहा-आसीविसा, दिट्ठीविसा, उग्गविसा, भोगविसा, तयाविसा, लालाविसा, उस्सासविसा, नीसासविसा, कण्हसप्पा, सेयसप्पा, काओदरा, दज्झपुप्फा, कोलाहा, मेलिमिंदा, सेसिंदा, जेयावन्ने तहप्पगारा । सेत्तं दव्वीकरा। से किं तं मउलिणो? मउलिणो अणेगविहा पन्नत्ता। तंजहा--दिव्वागा, गोणसा, कसाहीया, वइउला, चित्तलिणो, मंडलिणो, मालिणो, अही, अहिसलागा, वासपडागा, जेयावन्ने तहप्पगारा। सेत्तं मउलिणो। सेत्तं अही। से किं तं अयगरा ? अयगरा एगागारा पन्नत्ता । सेत्तं अयगरा ॥ ५३ ॥ से किं तं आसालिया ? कहि णं भंते ! आसालिया संमुच्छइ ?, गोयमा ! अंतो मणुस्सखेत्ते अड्डाइजेसु दीवेसु, निव्वाघाएणं पनरससु कम्मभूमीसु, वाघायं पडुच्च पंचसु महाविदेहेसु, चक्कवट्टिखंधावारेसु, वासुदेवखंधावारेसु, बलदेवखंधावारेसु, मंडलियखंधावारेसु, महामंडलियखंधावारेसु, गामनिवेसेसु, णगरनिवेसेसु, णिगमनिवेसेसु, खेडनिवेसेसु, कब्बडनिवेसेसु, मडंबनिवेसेसु, दोणमुहनिवेसेसु, पट्टणनिवेसेसु, आगरनिवेसेसु, आसमनिवेसेसु, संबाहनिवे
