________________
प०३ पुक्खर० सूरचंदाई] सुत्तागमे
२१५ तहेव भाणियव्वं ॥ से केणटेणं भंते ! एवं वुच्चइ-कालोए समुद्दे २ ? गोयमा ! कालोयस्स णं समुद्दस्स उदए आसले मासले पेसले कालए भासरासिवण्णाभे पगईए उदगरसेणं पण्णत्ते, कालमहाकाला एत्थ दुवे देवा महिड्डिया जाव पलिओवमट्टिइया परिवसंति, से तेणटेणं गोयमा ! जाव णिच्चे ॥ कालोए णं भंते ! समुद्दे कइ चंदा पभासिंसु वा ३ ? पुच्छा, गोयमा ! कालोए णं समुद्दे बायालीसं चंदा पभासेंसु वा ३–बायालीसं चंदा बायालीसं च दिणयरा दित्ता ॥ कालोदहिम्मि एए चरंति संबद्धलेसागा ॥१॥ णक्खत्ताण सहस्सं एगं छावत्तरं च सयमणं । छच्च सया छण्णउया महागहा तिण्णि य सहस्सा ॥२॥ अट्ठावीसं कालोदहिम्मि बारस य सयसहस्साइं । नव य सया पन्नासा तारागणकोडिकोडीणं ॥३॥ सोभेसु वा ३ ॥१७५॥ कालोयं णं समुदं पुक्खरवरे णाम दीवे वट्टे वलयागारसंठाणसंठिए सव्वओ.समंता संपरि० तहेव जाव समचकवालसंठाणसंठिए नो विसमचक्कवालसंठाणसंठिए । पुक्खरवरे णं भंते! दीवे केवइयं चक्कवालविक्खंभेणं केवइयं परिक्खेवेणं पण्णत्ते ? गोयमा ! सोलस जोयणसयसहस्साई चक्कवालविक्खंभेणं-एगा जोयणकोडी बाणउई खलु भवे सयसहस्सा । अउणाणउइं अट्ठ सया चउणउया य [ परिरओ ] पुक्खरवरस्स ॥ १॥ से णं एगाए पउमवरवेइयाए एगेण य वणसंडेणं० संपरि० दोण्हवि वण्णओ ॥ पुक्खरवरस्स णं भंते ! दीवस्स कइ दारा पण्णत्ता ? गोयमा ! चत्तारि दारा पण्णत्ता, तंजहा-विजए वेजयंते जयंते अपराजिए ॥ कहि णं भंते ! पुक्खरवरस्स दीवस्स विजए णामं दारे पण्णत्ते ? गोयमा ! पुक्खरवरदीवपुरच्छिमपेरंते पुक्खरोदसमुद्दपुरच्छिमद्धस्स पचत्थिमेणं एत्थ णं पुक्खरवरदीवस्स विजए णामं दारे पण्णत्ते तं चेव सव्वं, एवं चत्तारिवि दारा, सीयासीओया णत्थि भाणियव्वाओ ॥ पुक्खरवरस्स णं भंते ! दीवस्स दारस्स य २ एस णं केवइयं अबाहाए अंतरे पण्णत्ते ? गोयमा !-अडयाल सयसहस्सा बावीसं खलु भवे सहस्साई। अगुणुत्तरा य चउरो दारंतर पुक्खरवरस्स ॥१॥ पएसा दोण्हवि पुट्ठा, जीवा दोसु भाणियव्वा ॥ से केणटेणं भंते ! एवं वुच्चइ-पुक्खरवरदीवे २? गो० ! पुक्खरवरे गं दीवे तत्थ २ देसे २ तहिं २ बहवे पउमरुक्खा पउमवणसंडा णिच्चं कुसुमिया जाव चिट्ठति, पउममहापउमरुक्खा एत्थ णं पउमपुंडरीया णामं दुवे देवा महिड्डिया जाव पलिओवमद्विइया परिवसंति, से तेणटेणं गोयमा ! एवं वुच्चइ-पुक्खरवरदीवे २ जाव निच्चे ॥ पुक्खरवरे णं भंते ! दीवे केवइया चंदा पभासिंसु वा ३ ? एवं पुच्छा,चोयालं चंदसयं चउयालं चेव सूरियाण सयं । पुक्खरवरदीवंमि चरंति एए पभासेंता ॥ १॥ चत्तारि सहस्साई बत्तीसं चेव होंति णक्खत्ता । छच्च सया बावत्तर
