________________
९८५
अ० ७ अहम्मियलक्खणाणि] सुत्तागमे नालं ते मम ताणाए, लुप्पंतस्स सकम्मुणा ॥ ३ ॥ एयमढें सपेहाए, पासे समियदंसणे । छिंदे गिद्धिं सिणेहं च, न कंखे पुव्वसंथवं ॥ ४ ॥ गवासं मणिकुंडलं, पसवो दासपोरुसं । सव्वमेयं चइत्ताणं, कामरूवी भविस्ससि ॥ ५॥ (थावरं जंगमं चेव, धणं धन्नं उवक्खरं । पच्चमाणस्स कम्मेहिं, नालं दुक्खाओ मोयणे ॥) अज्झत्थं सव्वओ सव्वं, दिस्स पाणे पियायए । न हणे पाणिणो पाणे, भयवेराओ उवरए ॥ ६ ॥ आयाणं नरयं दिस्स, नायएज तणामवि । दोगुंछी अप्पणो पाए, दिन्नं भुंजेज भोयणं ॥ ७ ॥ इहमेगे उ मन्नंति, अप्पच्चक्खाय पावगं । आयरियं विदित्ताणं, सव्वदुक्खा विमुच्चई ॥ ८ ॥ भयंता अकरेंता य, बंधमोक्खपइण्णिणो । वायाविरियमेत्तेण, समासासेंति अप्पयं ॥ ९॥ न चित्ता तायए भासा, कुओ विजाणुसासणं । विसन्ना पावकम्मेहि, बाला पंडियमाणिणो ॥ १०॥ जे केइ सरीरे सत्ता, वण्णे रूवे य सव्वसो । मणसा कायवक्केणं, सव्वे ते दुक्खसंभवा ॥ ११ ॥ आवन्ना दीहमद्धाणं, संसारंमि अणंतए । तम्हा सव्वदिसं पस्सं, अप्पमत्तो परिव्वए ॥ १२ ॥ बहिया उड्डमादाय, नावकंखे कयाइ वि । पुव्वकम्मक्खयहाए, इमं देहं समुद्धरे ॥ १३ ॥ विगिंच कम्मुणो हेउं, कालकंखी परिव्वए । मायं पिंडस्स पाणस्स, कडं लभ्रूण भक्खए ॥ १४ ॥ सन्निहिं च न कुव्वेजा, लेवमायाए संजए। पक्खीपत्तं समादाय, निरवेक्खो परिव्वए ॥ १५ ॥ एसणासमिओ लजू , गामे अणियओ चरे । अप्पमत्तो पमत्तेहिं, पिंडवायं गवेसए ॥ १६ ॥ एवं से उदाहु अणुत्तरनाणी, अणुत्तरदंसी अणुत्तरनाणदंसणधरे । अरहा नायपुत्ते भगवं, वेसालिए वियाहिए ॥ १७ ॥ त्ति-बेमि ॥ इति खुड्डागणियंठिचं णामं छ?मज्झयणं समत्तं ॥६॥
अह एलइज्जणामं सत्तममज्झयणं
जहाएसं समुद्दिस्स, कोइ पोसेज एलयं । ओयणं जवसं देजा, पोसेज्जा वि सयंगणे ॥ १ ॥ तओ से पुढे परिवूढे, जायमेए महोदरे । पीणिए विउले देहे, आएसं परिकंखए ॥ २ ॥ जाव न एइ आएसे, ताव जीवइ से दुही । अह पत्तम्मि आएसे, सीसं छेत्तूण भुजई ॥ ३ ॥ जहा से खलु उरब्भे, आएसाए समीहिए । एवं वाले अहम्मिटे, ईहई नरयाउयं ॥ ४ ॥ हिंसे बाले मुसावाई, अद्धाणंमि विलोवए। अन्नदत्तहरे तेणे, माई कं नु हरे सढे ॥ ५॥ इत्थीविसयगिद्धे य, महारंभपरिग्गहे।' भुंजमाणे सुरं मंसं, परिवूढे परंदमे ॥ ६ ॥ अयकक्करभोई य, तुंदिल्ले चियलोहिए ।
