________________
सुत्तागमे
[दसवेयालियसुत्तं
मइ-खंतिसंजमरयस्स । परीसहे जिणंतस्स, सुलहा सुगइ तारिसगस्स ॥ २७ ॥ पच्छा वि ते पयाया, खिप्पं गच्छंति अमरभवणाई । जेसिं पिओ तवो संजमो य, खंती य बंभचेरं च ॥ २८ ॥ इच्चेयं छज्जीवणियं, सम्मट्ठिी सया जए । दुल्लहं लहित्तु सामण्णं, कम्मुणा न विराहिज्जासि ॥ २९ ॥ त्ति-बेमि ॥ इति छज्जीवणिया णामं चउत्थमज्झयणं समत्तं ॥४॥
अह पिंडेसणा णामं पंचममज्झयणं
पढमो उद्देसो
___ संपत्ते भिक्खकालम्मि, असंभंतो अमुच्छिओ । इमेण कमजोगेण, भत्तपाणं गवेसए ॥ १॥ से गामे वा नगरे वा, गोयरग्गगओ मुणी। चरे मंदमणुव्विग्गो, अवक्खित्तेण चेयसा ॥ २॥ पुरओ जुगमायाए, पेहमाणो महिं चरे। वजंतो बीयहरियाई, पाणे य दगमट्टियं ॥ ३ ॥ ओवायं विसमं खाणु, विजलं परिवजए । संकमेण न गच्छिज्जा, विजमाणे परकमे ॥ ४ ॥ पवडते व से तत्थ, पक्खलंते व संजए । हिंसेज पाणभूयाई, तसे अदुव थावरे ॥ ५॥ तम्हा तेण न गच्छिज्जा, संजए सुसमाहिए। सइ अन्नेण मग्गेण, जयमेव परक्कमे ॥ ६॥ इंगालं छारियं रासिं, तुसरासिं च गोमयं । ससरक्खेहिं पाएहिं, संजओ तं नइक्कमे ॥ ७ ॥ न चरेज वासे वासंते, महियाए व पडंतिए। महावाए व वायंते, तिरिच्छसंपाइमेसु वा ॥ ८॥ न चरेज वेससामंते, वंभचेरवसाणुए। बंभयारिस्स दंतस्स, होज्जा तत्थ विसोत्तिया ॥ ९ ॥ अणायणे चरंतस्स, संसग्गीए अभिक्खणं । होज वयाणं पीला, सामण्णम्मि य संसओ ॥ १०॥ तम्हा एयं वियाणित्ता, दोसं दुग्गइवड्ढणं । वज्जए वेससामंतं, मुणी एगंतमस्सिए ॥ ११॥ साणं सूइयं गाविं, दित्तं गोणं हयं गयं । संडिब्भं कलहं जुद्धं, दूरओ परिवज्जए ॥ १२ ॥ अणुन्नए नावणए, अप्पहिढे अणाउले । इंदियाई जहाभागं, दमइत्ता मुणी चरे ॥ १३ ॥ दवदवस्स न गच्छेजा, भासमाणो य गोयरे । हसंतो नाभिगच्छेज्जा, कुलं उच्चावयं सया ॥ १४ ॥ आलोयं थिग्गलं दारं, संधि दगभवणाणि य । चरंतो न विणिज्झाए, संकट्ठाणं विवज्जए ॥ १५ ॥ रन्नो गिहवईणं च, रहस्सारक्खियाणि य । संकिलेसकरं ठाणं, दूरओ परिवजए ॥ १६॥ पडिकुटकुलं न पविसे, मामगं परिवज्जए। अचियत्तकुलं न पविसे, चियत्तं पविसे कुलं ॥ १७ ॥ साणीपावारपिहियं, अप्पणा नावपंगुरे। कवाडं नो पणुल्लिजा, उग्गहंसि
