________________
सुत्तागमे
[समवाए
सव्वबाहिरियं मंडलं उवसंकमित्ता चारं चरइ तया णं इहगयस्स मणुस्सस्स एकतीसाए जोयणसहस्सेहिं अट्ठहि अ एकतीसेहिं जोयणसएहिं तीसाए सट्ठिभागे जोयणस्स सूरिए चक्खुप्फास हव्वमागच्छइ । अभिवडिए णं मासे एकतीसं सातिरेगाइं राइंदियाइं राइंदियग्गेणं पन्नत्ते । आइच्चे णं मासे एकतीसं राइंदियाइं किंचि विसेसूणाई राइंदियग्गेणं पन्नत्ते ॥१०२॥ इमीसे ण रयणप्पभाए पुढवीए अत्थेगइयाणं नेरइयाणं 'एकतीसं पलिओवमाइं ठिई प० । अहे सत्तमाए पुढवीए अत्थेगइयाणं नेरइयाणं एकतीसं सागरोवमाइं ठिई प० । असुरकुमाराणं देवाणं अत्थेगइयाणं एकतीसं पलिओवमाइं ठिई प० । सोहम्मीसाणेसु कप्पेसु अत्थेगइयाणं देवाणं एकतीसं पलिओचमाइं ठिई प० । विजयवेजयंतजयंतअपराजिआणं देवाणं जहण्णेणं एकतीसं सागरोवमाइं ठिई प० । जे देवा उवरिमउवरिमगेवेजयविमाणेसु देवत्ताए उववण्णा तेसि णं देवाणं उक्कोसेणं एकतीसं सागरोवमाइं ठिई प० ॥ १०३ ॥ ते णं देवा एकतीसाए अद्धमासेहिं आणति वा पाणमंति वा उस्ससंति वा नीससंति वा । तेसि णं देवाणं एक्कतीसं(स)वाससहस्सेहिं आहारटे समुप्पज्जइ । संतेगइया भवसिद्धिया जीवा जे एकतीसेहि भवग्गहणेहि सिज्झिस्संति बुज्झिस्संति मुच्चिस्संति परिनिव्वाइस्संति सव्वदुक्खाणमंतं करिस्संति ॥ १०४ ॥ बत्तीसं जोगसंगहा प०, तं जहा-आलोयण, निरवलावे, आवईसु दढधम्मया । अणिस्सिओवहाणे य, सिक्खा निप्पडिकम्मया ॥ १ ॥ अण्णायया, अलोभे य, तितिक्खा अजवे सुई। सम्मदिट्ठी समाही य, आयारे विणओवए ॥ २ ॥ धिईमई य संवेगे, पणिही सुविहि संवरे । अत्तदोसोवसंहारे, सव्वकामविरत्तया ॥ ३ ॥ पञ्चक्खाणे विउस्सग्गे, अप्पमादे लवालवे । झाणसंवरजोगे य, उदए मारणंतिए ॥ ४ ॥ संगाणं च परिण्णाया, पायच्छित्तकरणे वि य । आराहणा य मरणंते, बत्तीसं जोगसंगहा ॥ ५॥ १०५ ॥ बत्तीसं देविदा प०, तं जहा-चमरे बली धरणे भूआणंदे जाव घोसे महाघोसे चंदे सूरे सक्ने ईसाणे सर्णकुमारे जाव पाणए अचुए । कुंथुस्स णं अरहओ बत्तीसहिया बत्तीसं जिणसया होत्या । सोहम्मे कप्पे बत्तीसं विमाणावाससयसहस्सा प० । रेवइणक्खत्ते वत्तीसइतारे पन्नत्ते । वत्तीसतिविहे णट्टे पन्नत्ते ॥ १०६ ॥ इमीसे णं रयणप्पभाए पुढवीए अत्थेगइयाण नेरइयाणं बत्तीसं पलिओवमाइं ठिई प० । अहे सत्तमाए पुढवीए अत्थेगइयाणं नेरइयाणं बत्तीसं सागरोवमाई ठिई प० । असुरकुमाराणं देवाणं अत्थेगइयाणं वत्तीस पलिओवमाइं ठिई प० । सोहम्मीसाणेसु कप्पेसु देवाणं अत्थेगइयाणं वत्तीस पलिओवमाई ठिई प० । जे देवा विजयवेजयंतजयंतअपराजियविमाणेसु देवत्ताए उववण्णा तेसि णं देवाणं अत्थेगइयाणं बत्तीसं सागरोवमाइं ठिई प० ।
