________________
प्राकृतस्तोत्रप्रकाशः
३०१
जं जाणिज्जइ एत्तो, अइंदियत्था अलोइओ भाणू । अंतरतमतिमिरहरं, चित्तालंकारहं नाणं ॥२०॥ सोहइ नाणी नाणा, न तहण्णो भूरिभूसणविभूसो । कुसलत्तेणाऽऽगिज्जं, नाणधणं लोयमाणदयं ॥२१॥ नाणा दुक्खविणासो, मुक्को तेणो निवेण विण्णाणो । सम्मग्गदंसगं तं, उम्मग्गनिवारगं नाणं ॥२२।। हेओवाएयत्थे, नाणी खिप्पं विबोहए नाणा । सण्णाणवज्जमेयं, तोडइ कम्मायले विसमे ।।२३।। नाणं मणसुद्धियरं, अणद्धियसुहासमाणयं नाणं । कंचणकुंभसमाणा, किरिया सण्णाणसक्कारा ॥२४॥ किरिया सण्णाणजुया, रविकंतिनिहा तहा विगयनाणा । खज्जोयपयासनिहा, जाणिज्जा नाणमाहप्पं ॥२५॥ भस्सियदद्दुरतुल्ला, किरिया नाणण्णिया विमलनाणा । होज्जुड्डगमणसमणा, कहंति य ण्णाणसाराई ॥२६।। नामुक्करिसो चरणं, नाणं परिपक्कमेव जस्सऽस्थि । तस्स चरित्तं नियमा, पसमरईए वि तह भणियं ॥२७।। नाणस्स फलं विरई, होज्ज जया मोहवासणासंती । नाणफलं सच्चमिणं, लद्धं तइया वियाणिज्जा ॥२८॥ अप्पा धम्मे सूरो, नाणा मोहं पराजिणइ सूरो । तयणंतरम्मि समए, अप्पियसंति लहिज्ज परं ॥२९।। इंद व्व नाणवज्जो, कीलइ णंदणवणम्मि विण्णमुणी । सहयाणंदसरूवे, अगणियसण्णाणमाहप्पं ॥३०॥ निरवहिनाणनिहाणा, कम्मुदए होज्ज णो कया खेओ । अवि गीया संवयए, रहस्ससंखेववयणमिणं ॥३१॥ पारद्धाइ समाइ, नाणीणमियरजणाण ण किलेसो । नाणीणं धिज्जाओ, इयरेसिं णो तहाऽधिज्जा ॥३२॥ णिव्वुइपहपडिवण्णा, होज्ज कयत्था पबोहजुत्तंगी । एगंतदंसणत्था, कहंति समयाणुसारेणं ॥३३॥ न विणा नाणं मुत्ता, जडिसिहिमुंडी वि जत्थतत्थरओ । पणवीसइतत्तण्णो, मुच्चइ नत्थित्थ संदेहो ॥३४।। सव्वाइं कम्माइं, दहए नाणाणलो इय कहेए । अज्जुणपासे कण्हो, नाणं किरियानिरवइक्खं ॥३५।। मुत्तिनिबंधणमेए, मण्णंते जइणदंसणं वयए । साविक्खेहिं मुत्ती, होज्जा सण्णाणकिरियाहिं ॥३६।।
