________________
प्राकृतस्तोत्रप्रकाशः
२८९
तरुकण्णियारणुगुणे, विसवंजुलसीहगयवरिंदसमे । उसहागुरुमेहणिहे, तुंबगससिसंनिहे साहू ॥२०॥ कंचणहंससमाणे, मुत्तंबुयपोयवंससंखणिहे। सिरिफलचंदणतुल्ले, अणगारे सरमि भावेणं ॥२१॥ हियए महव्वयाणं, पणवीसइभावणा विसुद्धाओ । पधरंते वज्जंते, असुहाओ सव्वभावेणं ॥२२॥ अडविहपवयणजणणी-सीलव्वयगुत्तिसमणधम्मरए । सच्चवयणचरणड्डे, वंदे हरिसेण णिग्गंथे ॥२३।। नवविहणियाणवज्जी, सीलंगरहाणुरायभत्तियरे । णिक्कामी तवयारी, णिग्गहियासंजमे समणे ॥२४॥ सुहझाणभेयरंगी, णाणाइयसाहगे विमलबुद्धी । मित्तीपमुहभेए, सोडस णिच्च पभावेंते ॥२५॥ असुहज्झाणाईए, णाणाइविराहणाकसायवहे । सुहलेसगोयरिण्णे, दिटिप्पडिलेहणा बोहे ॥२६।। अडदसविहसीलहरे, परिहरियतिसल्लदंडतिगदोसे । परिचत्तासुहलेसे, वरिट्ठभिक्खू पणिवयामि ॥२७।। आवस्सयाइसामा-यारीसज्झायसिक्खणालीणे । सयलंगुवंगणाणी, अभिग्गहाराहगे वंदे ॥२८।। ववहारवयणभेए, जाणते विनयवरणभावण्णे । मयगारवप्पमाए, वसहिपदोसे परिहरंते ॥२९।। सिक्खडाणप्पडिमा-धारणसीले विगिद्धिपरिणामे । परिचत्तेसणदोसु-प्पायणदोसे समी वंदे ॥३०॥ चत्तुग्गमाइदोसे, मंडलिदोसासवोहपरिहारे । सुमणे पच्चक्खाणा-वस्सयविगइस्सरूवण्णे ॥३१॥ जिणकप्पथविरकप्पे, आचेलक्काइकप्पचरणाई । पच्छित्ताई साहू, जाणंते सव्वया वंदे ॥३२॥ दिव्वाइओवसग्गे, खंतीइ परीसहेऽवि पसहंते । भयदुहसज्जाचाई, सुहसज्जाभावणासेवी ॥३३॥ पिंडेसणासुपाणे-सणापवरसत्तसत्तियाबोहे। असुहाओ भासाओ, वज्जते साहुणो वंदे ॥३४।। सव्वासंवरवज्जी, मइकरणा सबलदोसपरिहारी । असमाहिविभंगट्ठा-णविहीणे साहुणो सरमि ॥३५।। जयणिक्करयाण नमो, थिरनयणाणं पसण्णवयणाणं । उत्तमगुणरयणाणं, जियमयणाणं णमो णिच्चं ॥३६।।
