________________
प्राकृतस्तोत्रप्रकाशः
गुणदणिहिंदु (१९९३) समे, णिव्वाणदिणे महिड्डिवीरस्स । सिरिसिद्धचक्कभत्ते, जइणउरीरायणयरम्मि ||४५ || सिरिसिद्धचक्कसंगं, सिद्धत्थवणं वरं दुइज्जमिणं । सुग्गाहियक्खाण महो - वयारिगुरुणेमिसूरीणं ॥४६॥ सीसेणं पोम्मेणं, कयं महोदयसमीसपढणट्टं । सत्त करिस्सामि मुया, आयरियाईण थुत्ताई ॥४७॥
॥ आयरियपयथुतं ॥ (सूरीश्वरसप्ततिका)
पणमिय परमाणंदे, पत्थाणे णेमिसूरिगुरुचरणे । सिरिसिद्धचक्कपगयं, आयरियपयत्थवं कुणमि ||१|| (आर्यावृत्तम्)
पंचाचारविहाणे, दक्खे भवियाण ते पयासंते । दव्वाइयविण्णाणे, ते आयरिए पणिवयामि ॥२॥ दित्ते वरसंहणणे, वरसंठाणे पमायपरिहीणे । संघुणइविहिकुसले, सव्वायरिए सरेमि सया ||३|| णासियकसायपयरे, करणदमणसावहाणथिरहियए । णवसीलगुत्तिकलिए, ते सूरिंगणे थुणामि सया ॥४॥ पणसमिइतिगुत्तिहरे, महव्वयायारसाहगे सुहए । वरजाइकुलाइगुणे, णिच्चं झामि सूरिंदे ॥५॥ आगच्छेज्ज सई जे, दट्ठणं गोयमाइजुगपवरा । तारिसपडिरूवगुणे, भाणुसमाणप्पयावड्ढे ||६|| सायरसमगंभीरे, अमियसरिसवयणरयणवरवयणे । धीरे बुद्धिणिहाणे, सूरी वरदेसणे वंदे ॥७॥ जुगवरणाणसमाणं, विण्णाणं जेसि सोहए विउलं । ते सोमाहियसंती, अपरिस्सावाविकत्थे य ॥८॥ विविहाभिग्गहणिरए, गणट्ठसंगहविहायगे वीरे । अयले पसंतभावे, जइ धम्माराहगे वंदे ॥९॥ खणभंगुरदेहाई, होज्ज ण सरणं भवम्मि रामाई । दुहखाणी संसारो, एगो गमणागमं कुज्जा ॥१०॥ बंधइ एगो अप्पा, भुंजइ कम्माइ णो परो भागी । देहो अण्णो जीवो, एवं वरभाविए वंदे ॥११॥ काया असुइणिकेयं, मिच्छत्ताई तहाऽऽसवा भणिया । समिइपरीसहपमुहो, संवरमग्गो मुणेयव्वो ॥१२॥
२७७
