Page Text
________________
प्रश्नव्याकरण सुत्तं
|
णच्चंतकबंधपउरभयंकर-वायस-परिलेंत गिद्धमंडल भमंतच्छायंधकार-गंभीरे | वसुवसुहविकंपितव्व पच्चक्खपिउवणं परमरुद्दबीहणगं दुप्पवेसतरगं अहिवयंति संगामसंकडं परधणं महंता । अवरे पाइक्कचोरसंघा सेणावइ-चोरवंद-पागढिका य अडवी- देसग्गवासी कालहरित रत्तपीतसुक्किल-अणेगसयचिंध पट्टबद्धा परविसए अभिहणंति लुद्धा धणस्स कज्जे । रयणागरसागरं उम्मीसहस्समाला-उलाउल-वितोयपोत-कलकलेत- कलियं पायालसहस्सवायवसवेगसलिल-उद्धम्ममाणदगरयरयंधकारं
वरफेणपउर-धवल-पुलंपुल-समुट्ठियट्टहासं मारुयविच्छुभमाणपाणियं जल- मालुप्पीलहुलियं अवि य समंतओ खुभिय-लुलिय-खोखुब्भमाण - पक्खलियचलिय-विउलजलचक्कवाल- महाणईवेगतुरियआपूरमाणगंभीर-विउल-आवत्त-चवलभममाणगुप्पमाणुच्छलंत पच्चोणियत्त-पाणिय-पधावियखर-फरुस-पयंडवाउलियसलिल-फुटुंत वीइकल्लोल संकुलं महामगरमच्छ-कच्छभोहार-गाह-तिमि सुसुमार-सावय-समाहय- समुदायमाणकपूरघोरपउरं कायरजणहिययकंपणं घोरमारसंतं महब्भयं भयंकरं पइभयं उत्तासणगं अणोरपारं आगासं चेव णिरवलंबं । उप्पाइयपवण-धणिय-णोल्लिय उवरुवरितरंगदरिय-अइवेग-वेगं चक्खुपहमुच्छरंतं कत्थइ-गंभीर-विउल-गज्जिय-गुंजिय-णिग्घायगरुयणिवडिय-सुदीहणीहारिदूरसुच्चंत-गंभीर धुगधुगंतसदं पडिपह रुंभंत-जक्ख-रक्खस-कुहंड-पिसायरुसिय-तज्जाय-उवसग्गसहस्स संकुलं बहूप्पाइयभूयं विरइयबलिहोम-धूवउवयारदिण्ण-रुहिरच्चणा करणपयतजोगपययचरियं परियंत-जुगंत कालकप्पोवमं दुरंतं महाणईणईवई-महाभीमदरिस-णिज्जं दुरणुच्चरं विसमप्पवेसं दुक्खुत्तारं दुरासयं लवणसलिलपुण्णं असियसिय-समूसियगेहि हत्थंतरकेहिं वाहणेहिं अइवइत्ता समुद्दमज्झे हणंति, गंतूण जणस्स पोए परदव्वहरा णरा | णिरणुकंपा णिरवयक्खा गामागर-णगर-खेड-कब्बड-मडंब दोणमुह पट्टणा सम-णिगमजणवए य धणसमिद्धे हणंति थिरहियय-छिण्ण लज्जा बंदिग्गह-गोग्गहे य गिण्हंति दारुणमई णिक्किवा णियं हणंति छिंदंति गेहसंधिं णिक्खित्ताणि य हरंति धणधण्णदव्वजायाणि जणवय-कुलाणं णिग्घिणमई परस्स दव्वाहिं जे अविरया । तहेव केई अदिण्णादाणं गवेसमाणा कालाकालेसु संचरंता चियकापज्जलिय-सरस-दर-दड्ढ कड्ढियकलेवरे रुहिरलित्तवयण-अक्खय-खाइयपीय-डाइणिभमंत-भयंकरं जंबुयक्खिक्खियंते घूयकयघोरसद्दे वेयालुट्ठिय-णिसुद्ध-कहकहिय-पहसिय-बीहणग-णिरभिरामे अइदुब्भिगंधबीभच्छदरिसणिज्जे सुसाणवण-सुण्णघर लेण-अंतरावण-गिरिकंदर-विसमसावय समाकुलासु वसहीसु किलिस्संता सीयातव -सोसियसरीरा दड्ढच्छवी णिरयतिरिय-भवसंकड-दुक्ख संभार वेयणिज्जाणि पावकम्माणि संचिणंता, दुल्लहभक्खण्ण-पाणभोयणा पिवासिया झंझिया किलंता मंस-कणिमकंदमूल जं किंचि कयाहारा उव्विग्गा उप्पया असरणा अडवीवासं उर्वति वालसयसंकणिज्जं । अयसकरा तक्करा भयंकरा कास हरामोत्ति अज्ज दव्वं इति सामत्थं करेंति गुज्झं। बयस्स जणस्स कज्जकरणेसु विग्घकरा मत्तपमत्तपसुत्त- वीसत्थ- छिद्दघाई वसणब्भुदएसु हरणबुद्धी विगव्व रुहिरमहिया परेंति णरवइ-मज्जायमइक्कंता सज्जण जणदुगंछिया सकम्मेहिं पावकम्मकारी असुभपरिणाया य दुक्खभागी णिच्चाविल दुहमणिव्वुइमणा इहलोए चेव किलिस्संता परदव्वहरा णरा वसण सय समावण्णा |
१०
| SR No. | 009910 |
| Book Title | Agam 10 Ang 10 Prashna Vyakaran Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 45 |
| Language | Prakrit |
| Classification | Book_Devnagari, Agam, Canon, & agam_prashnavyakaran |
| File Size | 3 MB |