Page Text
________________
प्रश्नव्याकरण सुत्तं
१२ तहेव केइ परस्स दव्वं गवेसमाणा गहिया य हया य बद्धरुद्धा य तुरियं अइधाडिया पुरवरं
समप्पिया चोरग्गह-चारभडचाडुकराण तेहि य कप्पडप्पहार-णिद्दयआरक्खिय-खरफरुसवयणतज्जण-गलच्छल्लुच्छल्लणाहिं विमणा, चारगवसहिं पवेसिया णिरयवसहिसरिसं तत्थवि गोमियप्पहार दूमणणिब्भच्छण-कडुयवयण-भेसणगभयाभिभूया अक्खित्त-णियंसणा मलिणदंडिखंड- णिवसणा उक्कोडालंचपास-मग्गणपरायणेहिं दुक्खसमुदीरणेहिं गोम्मियभडेहिं विविहेहिं बंधणेहिं । किं ते ? हडि-णिगड-बालरज्जुय-कुदंडग-वरत्त-लोहसंकल-हत्थंदुय वज्झपट्ट- दामक-णिक्कोडणेहिं अण्णेहि य एवमाइएहिं गोम्मिगभंडोवगरणेहिं दुक्खसमुदीरणेहिं संकोडणमोडणाहिं वज्झंति मंदपुण्णा । संपुड-कवाड- लोहपंजर भूमिघर-णिरोह-कूव चारग-कीलग-जुय-चक्कविततबंधणखंभालण -उद्धचलण-बंधणविहम्मणाहि य विहेडयंता अवकोडगगाढ-उर- सिरबद्ध -उद्धपूरिय फुरंतउर-कडगमोडणा-मेडणाहिं बद्धा य णीससंता सीसावेढ उरुयावल-चप्पडग-संधिबंधण-तत्तसलागसूइयाकोडणाणि तच्छणविमाणणाणि य खारकडुय-तित्त- णावणजायणा- कारणसयाणि बयाणि पावियता उरक्खोडी-दिण्ण-गाढपेल्लण-अद्विगसंभग्गसपंसुलिगा गलकालकलोहदंड-उर-उदर वत्थिपट्टि परिपीलिया मत्थंत हिययसंचुण्णियंगमंगा आणत्तीकिंकरेहिं । केई अविराहिय-वेरिएहिं जमपुरिस-सण्णिहेहिं पहया ते तत्थ मंदपुण्णा चडवेला-वज्झपट्टपाराइं छिव-कस-लत्तवरत्त-णेत्तप्पहारसयतालियंगमंगा किवणा लंबंतचम्मवणवेयणविमुहियमणा घणकोट्टिम-णियलजुयलसंकोडियमोडिया य कीरंति णिरुच्चारा असंचरणा, एया अण्णा य एवमाईओ वेयणाओ पावा पावेंति । अदंतिंदिया वसट्टा बहुमोहमोहिया परधणम्मि लुद्धा फासिंदिय-विसय-तिव्वगिद्धा इत्थिगयरूवसद्दरसगंधइट्ठरइमहियभोगतण्हाइया य धणतोसगा गहिया य जे णरगणा, पुणरवि ते कम्मदुव्वियद्धा उवणीया रायकिंकराण तेसिं वहसत्थग पाढयाणं विलउलीकारगाणं लंचसयगेण्हगाणं कूडकवडमाया णियडी-आयरण पणिहि-वंचणविसारयाणं बहुविहअलियसयजंपगाणं, परलोय-परम्मुहाणं णिरयगइ गामियाणं तेहिं आणत्त-जीयदंडा तुरियं उग्घाडिया पुरवरे सिंघाडग-तिय-चउक्क-चच्चर-चउम्मुहमहापहपहेसु वेत-दंड-लउड-कट्ठले?-पत्थर पणालिपणोल्लिमुट्ठि-लया- पायपण्हि-जाणु-कोप्पर- पहार- संभग्ग-महियगत्ता | अट्ठारसकम्मकारणा जाइयंगमंगा कलुणा सुक्कोट्ठकंठ-गलक-तालु-जीहा जायंता पाणीयं विगयजीवियासा तण्हाइया वरागा तं पि य ण लभंति वज्झपुरिसेहिं धाडियंता । तत्थ य खर-फरुसपडहघट्टिय-कूडग्गहगाढरुद्वणिसट्ठपरामुट्ठा वज्झयर-कुडिजुयणियत्था सुरत्तकणवीरगहियविमुक्क-कंठे-गुण-वज्झदूयआ-विद्धमल्ल दामा, मरणभयुप्पण्णसेयआयतणेहुत्तुपियकिलिण्णगत्ता चुण्णगुंडिय सरीर रयरेणुभरियकेसा कुसुंभगोकिण्णमुद्धया छिण्णजीवियासा घुण्णंता वज्झ याणभीया तिलं तिलं चेव छिज्जमाणा सरीरविक्कित्तलोहिओलित्ता कागणि-मसाणि-खावियता पावा खरफरुसएहिं तालिज्जमाणदेहा, वातिग-णरणारीसंपरिवुडा पेच्छिज्जंता य णगरजणेण वज्झणेवत्थिया पणेज्जति णयरमज्झेण किवणकलुणा अत्ताणा असरणा अणाहा अबंधवा बंधविप्पहीणा विपेक्खता दिसोदिसिं मरण-भयुव्विगा आघायणपडिदुवार-संपाविया अधण्णा सूलग्गविलग्गभिण्णदेहा ।
| SR No. | 009910 |
| Book Title | Agam 10 Ang 10 Prashna Vyakaran Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 45 |
| Language | Prakrit |
| Classification | Book_Devnagari, Agam, Canon, & agam_prashnavyakaran |
| File Size | 3 MB |