Page Text
________________
ज्ञाताधर्मकथा
जंसि च णं पएसंसि पोयवहणे विवण्णे, तंसि च णं पएसंसि एगे महं रयणद्दीवे णामं दीवे होत्था- अणेगाइं जोयणाई आयामविक्खंभेणं, अणेगाई जोयणाई परिक्खेवेणं णाणामखंडमंडिउद्देसे सस्सिरीए पासाईए दंसणिज्जे अभिरूवे पडिरूवे । तस्स णं बहुमज्झदेसभाए तत्थ णं महं एगे पासायवडेंसए होत्था- अब्भुग्गयमूसिय- पहसिए जाव सस्सिरीयरूवे पासाईए दंसणिज्जे अभिरूवे पडिरूवे | तत्थ णं पासायवडेंसए रयणद्दीवदेवया णामं देवया परिवसइ- पावा चंडा रुद्दा, खुद्दा साहसिया। तस्स णं पासायवडेंसयस्स चउद्दिसिं चत्तारि वणसंडा किण्हा, किण्होभासा । तए णं ते माकंदियदारगा तेणं फलयखंडेणं ओवुज्झमाणा ओवुज्झमाणा रयणदीवंतेणं संवूढा यावि होत्था । तए णं ते माकंदियदारगा थाहं लभंति, मुहत्तंतरं आससंति, फलगखंडं विसज्जेइ, रयणद्दीवं उत्तरंति, फलाणं मग्गण-गवेसणं करेंति, फलाई आहारेंति, णालिएराणं मग्गण- गवेसणं करेंति, करित्ता णालिएराइं फोडेंति, णालिएरतेल्लेणं अण्णमण्णस्स गत्ताइं अब्भंगेति, पोक्खरणीओ ओगाहिंति, जलमज्जणं करेंति, पोक्खरणीओ पच्चत्तरंति, पढविसिलापट्टयंसि णिसीयंति. णिसीइत्ता आसत्था वीसत्था सहासणवरगया चंपाणयरिं अम्मापिउआपच्छणं च लवणसमुद्दोत्तारं च कालिय वायसमुत्थणं च पोयवहणविवत्तिं च फलयखंडस्सासायणं च रयणदीवुत्तारं च अणुचिंतेमाणा अणुचिंतेमाणा ओहयमणसंकप्पा जाव झियाएंति | तए णं सा रयणद्दीवदेवया ते माकंदिय-दारए ओहिणा आभोएइ, असि-फलग-वग्ग- हत्था सत्तद्वतालप्पमाणं उड्ढं वेहासं उप्पयइ, उप्पइत्ता ताए उक्किट्ठाए जाव देवगईए वीइवयमाणी वीइवयमाणी जेणेव माकंदिय-दारए तेणेव उवागच्छइ, उवागच्छित्ता आसुरुत्ता माकंदिय-दारए खर-फरुस- णिदुर- वयणेहिं एवं वयासीहं भो माकंदिय-दारया ! अप्पत्थियपत्थिया ! जइ णं तुब्भे मए सद्धिं विउलाइं भोगभोगाई भंजमाणा विहरह, तो भे अत्थि जीवियं । अहण्णं तुब्भे मए सद्धिं विउलाई भोगभोगाई भुंजमाणा णो विहरह, तो भे इमेणं णीलुप्पल-गवल -गुलिय-अयसिकुसुमप्पगासेणं खुरधारेण असिणा रत्तगंडमसयाई माउयाहिं उवसोहियाई तालफलाणि व सीसाई एगते एडेमि | तए णं ते माकंदियदारगा रयणदीवदेवयाए अंतिए एयमढे सोच्चा णिसम्म भीया संजायभया करयल जाव एवं वयासी- जं णं देवाणुप्पिया वइस्ससि तस्स आणा-उववाय- वयण-णिद्देसे चिहिस्सामो । तए णं सा रयणद्दीवदेवया ते माकंदियदारए गेण्हइ, जेणेव पासायवडेंसए तेणेव उवागच्छइ, उवागच्छित्ता असुभपुग्गलावहारं करेइ, करित्ता सुभपोग्गलपक्खेवं करेइ, तओ पच्छा तेहिं सद्धिं विउलाई भोगभोगाइं भंजमाणी विहरइ । कल्लाकल्लिं च अमयफलाइं उवणेइ ।
114
| SR No. | 009906 |
| Book Title | Agam 06 Ang 06 Gnatadharma Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 220 |
| Language | Prakrit |
| Classification | Book_Devnagari, Agam, Canon, & agam_gyatadharmkatha |
| File Size | 5 MB |