________________
ज्ञाताधर्मकथा
तए णं ते माकंदियदारगा अम्मापिऊहिं अब्भणण्णाया समाणा गणिमं च धरिमं च मेज्जं च पारिच्छेज्जं च भंडगं गेंहंति, जहा अरहण्णगस्स जाव लवणसमुदं बहूइं जोयणसयाई ओगाढा। तए णं तेसिं मागंदियदारगाणं अणेगाइं जोयणसयाइं ओगाढाणं समाणाणं अणेगाई उप्पाइयसयाई पाउब्भूयाई, तं जहा- अकाले गज्जिए, अकाले विज्जुए, अकाले थणियसद्दे, कालियवाए तत्थ समुट्ठिए। तए णं सा णावा तेणं कालियवाएणं आहुणिज्जमाणी आहुणिज्जमाणी संचालिज्ज- माणी संचालिज्जमाणी संखोभिज्जमाणी संखोभिज्जमाणी सलिल- तिक्ख-वेगेहिं आयडिज्जमाणी आयडिज्जमाणी कोट्टिमंसि करतलाहते विव तेंदूसए तत्थेव तत्थेव ओवयमाणी य उप्पयमाणी य|/उप्पयमाणी विव धरणीयलाओ सिद्धविज्जा विज्जाहरकण्णगा, ओवयमाणी विव गगणतलाओ भट्ठविज्जा विज्जाहरकण्णगा, विपलायमाणी विव महागरुल-वेगवित्तासिया भुयगवरकण्णगा, धावमाणी विव महाजण- रसियसद्द-वित्तत्था ठाणभट्ठा आसकिसोरी, णिगुंजमाणी विव गुरुजणा- दिट्ठावरहा सुजणकुलकण्णगा, घुम्ममाणी विव वीची-पहार-सय-तालिया, गलिय-लंबणा विव गगणतलाओ, रोयमाणी विव सलिलगंठिविप्पड़र-माण- घोरंसुवाएहिं णववह उवरतभत्तुया, विलवमाणी विव परचक्करायाभिरोहिया परममहब्भयाभिट्ठया महापुरवरी, झायमाणी विव कवड- च्छोभप्पओगजुत्ता जोगपरिव्वाइया, णिसासमाणी विव महाकंतार- विणिग्गय-परिस्संता परिणयवया अम्मया, सोयमाणी विव तव-चरण खीणपरिभोगा चयणकाले देववरवहू, संचुणिय-कट्ठकूवरा, भग्गमेढि-मोडिय-सहस्समाला, सूलाइय-वंकपरिमासा, फलहंतर-तडतडेंत-फुटुंत- संधिवियलंतलोहकीलिया, सव्वंग-वियंभिया, परिसडिय-रज्जुविसरंतसव्वगत्ता, आमगमल्लगभूया, अकयपुण्ण- जणमणोरहो विव चिंतिज्जमाणगुरूई, हाहाकय-कण्णधार-णाविय-वाणियगजणकम्मकर-विलविया । णाणाविह-रयण-पणिय-संपुण्णा बहूहिं पुरिससएहिं रोयमाणेहिं कंदमाणेहिं सोयमाणेहिं तिप्पमाणेहिं विलवमाणेहिं एगं महं अंतोजलगयं गिरिसिहरमासाइत्ता संभग्गकूवतोरणा मोडियज्झयदंडा वलयसयखंडिया करकरस्स तत्थेव विद्दवं उवगया | तए णं तीए णावाए भिज्जमाणीए ते बहवे पुरिसा विउल- पणिय -भंडमायाए अंतोजलंम्मि णिमज्जाविया यावि होत्था । तए णं ते मागंदियदारगा छेया दक्खा पत्तट्ठा कुसला मेहावी णिउणसिप्पोवगया बहुसु पोतवहण संपराएसु कयकरणा लद्धविजया अमूढा अमूढहत्था एगं महं फलगखंडं आसानैति।
113
