________________
ज्ञाताधर्मकथा
१८
तए णं सा रयणद्दीवदेवया सक्कवयण-संदेसेणं सुट्ठिएणं लवणाहिवइणा लवणसमुद्दे तिसत्तखुत्तो अणुपरियट्टियव्वे त्ति जं किंचि तत्थ तणं वा पत्तं वा कटुं वा कयवरं वा असुइं पूइयं दुरभिगंधमचोक्खं, तं सव्वं आहुणिय-आहुणिय तिसत्तखुत्तो एगते एडेयव्वं ति कट्ठ णिउत्ता । तए णं सा रयणद्दीवदेवया ते माकंदिय दारए एवं वयासी- एवं खलु अहं देवाणुप्पिया! सक्कवयणसंदेसेणं सुट्टिएणं लवणाहिवइणा तं चेव जाव णिउत्ता । तं जाव अहं देवाणुप्पिया! लवणसमुद्दे जाव एडेमि ताव तुब्भे इहेव पासायवडिंसए सुहंसुहेणं अभिरममाणा चिट्ठह । जइ णं तुब्भे एयंसी अंतरंसि उव्विग्गा वा, उस्सुया वा, उप्पुया वा भवेज्जाह तो णं तब्भे परच्छिमिल्लं वणसंडं गच्छेज्जाह | तत्थ णं दो उऊ सया साहीणा, तंजहा- पाउसे य वासारत्ते य । तत्थं णं तुब्भे देवाणुप्पिया! बहुसु वावीसु य जाव सरसरपंतियासु बहुसु आलीघरएसु य मालीघरएसु य जाव कुसुमघरएसु य सुहंसुहेणं अभिरममाणा विहरेज्जाह । [तत्थ उ कंदल सिलिंध दंतो, णिउर वरपुप्फपीवरकरो । कुडयज्जुण-णीव-सुरभिदाणो, पाउस उठ गयवरो साहीणो ॥१॥ तत्थ य सुरगोवमणि विचित्तो, ददुरकुलरसिय-उज्झररवो । बरहिणविंद-परिणदसिहरो, वासारत्त उउ-पव्वओ साहीणो ॥२॥ जइ णं तुब्भे एत्थ वि उव्विग्गा वा उस्सुया वा उप्पुया वा भवेज्जाह तो णं तुब्भे उत्तरिल्लं वणसंडं गच्छेज्जाह । तत्थं णं दो उऊ सया साहीणा, तंजहा- सरओ य हेमंतो य । तत्थं णं तुब्भे देवाणुप्पिया ! बहुसु वावीसु य जाव सरसरपंतियासु बहुसु आलीघरएसु य मालीघरएसु य जाव कुसुमघरएसु य सुहंसुहेणं अभिरममाणा विहरेज्जाह । तत्थ उ-सण-सत्तवण्ण-कउओ, णीलप्पल-पउम-णलिण-सिंगो । सारस-चक्कवाय-रविय-घोसो, सरयउउ-गोवई साहीणो ॥३॥ तत्थ य-सियकुंद-धवलजोहो, कुसुमिय-लोद्धवणसंड-मंडलतलो । तुसार-दगधार-पीवरकरो, हेमंतउऊ ससी सया साहीणो ॥४॥ जइ णं तुब्भे तत्थ वि उव्विग्गा वा जाव उस्सुया वा भवेज्जाह तो गं तुब्भे अवरिल्लं वणसंडं गच्छेज्जाह । तत्थ णं दो उउ साहीणा तंजहा- वसंते य गिम्हे य । तत्थं णं तुब्भे देवाणुप्पिया ! बहुसु वावीसु य जाव सरसरपंतियासु बहुसु आलीघरएसु य मालीघरएसु य जाव कुसुमघरएसु य सुहंसुहेणं अभिरममाणा विहरेज्जाह | तत्थ उ-सहकार-चारुहारो णियारासोगमउडो। ऊसियतिलग बउलायवत्तो, वसंतउउ-णरवई साहीणो ॥५॥
115
