Page Text
________________
५९
६०
६४
भगवई सुत्त
उक्कोसेणं अट्ठ भवग्गहणाई । कालादेसेणं जहण्णेणं दसवाससहस्साइं अंतोमुहुत्तमब्भहियाई, उक्कोसेणं चत्तारि सागरोवमाइं चउहिं पुव्वकोडीहिं अब्भहियाइं, जाव एवइयं कालं गइरागइं करेज्जा |
पज्जत्तसंखेज्जवासाउयसण्णिपंचिंदियतिरिक्खजोणिए णं भंते जे भविए जहण्ण- कालठिईएसु रयणपभापुढवीणेरइएसु उववज्जित्तए से णं भंते! केवइयकालट्ठिईएस उववज्जेज्जा ? गोयमा! जहण्णेणं दसवाससहस्सठिईएस, उक्कोसेण वि दसवाससहस्स–ट्ठिईएस उववज्जेज्जा ।
ते णं भंते ! जीवा एगसमएणं केवइया उववज्जंति ? गोयमा ! एवं सो चेव पढमो गमओ निरवसेसो भाणियव्वो जाव कालादेसेणं जहण्णेणं दसवाससहस्साइं अंतोमुहुत्तमब्भहियाइं, उक्कोसेणं चत्तारि पुव्वकोडीओ चत्तालीसाए वाससहस्सेहिं अब्भहियाओ, जाव एवइयं कालं गइरागई करेज्जा ।
सो चेव उक्कोसकालट्ठिईएस उववण्णो जहण्णेणं सागरोवमट्ठिईएसु, उक्कोसेण वि सागरोवमट्ठिईएसु उववज्जेज्जा । अवसेसो परिमाणादीओ भवादेसपज्जवसाणाओ सो चेव पढमगमो णेयव्वो जाव कालादेसेणं जहण्णेणं सागरोवमं अंतोमुहुत्तमब्भहियं, उक्कोसेणं चत्तारि सागरोवमाइं चउहिं पुव्वकोडीहिं अब्भहियाई, जाव एवइयं कालं गइरागई करेज्जा । जहण्णकालट्ठिईय-पज्जत्त-संखेज्जावासाउय-सण्णिपंचिंदिय-तिरिक्खजोणिए णं भंते! जे भवि रयणप्पभापुढविणेरइएसु उववज्जित्तए, से णं भंते! केवइयकालट्ठिईएस उववज्जेज्जा ? गोयमा! जहण्णेणं दसवाससहस्सट्ठिईएस, उक्कोसेणं सागरोवमट्ठिईएस उववज्जेज्जा |
ते णं भंते! जीवा एगसमएणं केवइया उववज्जंति ? गोयमा ! अवसेसो सो चेव गमओ, णवरं इमाइं अट्ठ णाणत्ताइं- सरीरोगाहणा जहण्णेणं अंगुलस्स असंखेज्जइभागं, उक्कोसेणं धणुहपुहुत्तं, लेस्साओ तिण्णि आदिल्लाओ, णो सम्मदिट्ठी, मिच्छादिट्ठी, णो सम्मामिच्छादिट्ठी, णो णाणी, दो अण्णाणा नियमं समुग्धाया आदिल्ला तिण्णि, आउं, अज्झवसाणा, अणुबंधो य जहेव असण्णीणं । अवसेसं जहा पढमगमए जाव कालादेसेणं जहण्णेणं दसवाससहस्साइं अंतोमुहुत्तमब्भहियाइं, उक्कोसेणं चत्तारि सागरोवमाइं चउहिं अंतोमुहुत्तेहिं अब्भहियाई, जाव एवइयं कालं गइरागई करेज्जा ।
सो चेव जहण्णकालट्ठिईएस उववण्णो जहण्णेणं दसवाससहस्सट्ठिईएसु, उक्कोसेण वि दसवाससहस्सट्ठिईएसु उववज्जेज्जा; ते णं भंते ! जीवा एगसमएणं केवइया उववज्जंति? गोयमा! एवं सो चेव चउत्थो गमओ णिरवसेसो भाणियव्वो जाव कालादेसेणं जहण्णेणं दसवाससहस्साइं अंतोमुहुत्तमब्भहियाई, उक्कोसेणं चत्तालीसं वाससहस्साइं चउहिं अंतोमुहुत्तेहिं अब्भहियाइं, जाव एवइयं कालं गइरागई करेज्जा ।
सो चेव उक्कोसकालट्ठिईएस उववण्णो जहण्णेणं सागरोवमट्ठिईएसु उक्कोसेण वि सागरोवमट्ठिईएसु उववज्जेज्जा; ते णं भंते जीवा एगसमएणं केवइया उववज्जंति? गोयमा! एवं सो चेव चउत्थो गमओ णिरवसेसो भाणियव्वो जाव कालादेसेणं जहण्णेणं सागरोवम अंतोमुहुत्तमब्भहियं उक्कोसेणं चत्तारि सागरोवमाइं चउहिं अंतोमुहुत्तेहिं अब्भहियाई जाव एवइयं कालं गइरागई करेज्जा ।
506
| SR No. | 009905 |
| Book Title | Agam 05 Ang 05 Bhagvati Vyakhya Prajnapti Sutra Mool Sthanakvasi |
| Original Sutra Author | Sudharmaswami |
| Author | Devardhigani Kshamashaman |
| Publisher | Global Jain Agam Mission |
| Publication Year | 2012 |
| Total Pages | 653 |
| Language | Prakrit |
| Classification | Book_Devnagari, Agam, Canon, & agam_bhagwati |
| File Size | 8 MB |