________________
७
८
18
भगवई सुत्त
बेइंदियाणं पुच्छा ?
गोयमा ! जहण्णपए कडजुम्मा, उक्कोसपए दावरजुम्मा, अजहण्ण-मणुक्कोसपए सिय जुमा जाव सिय कलियोगा । एवं जाव चउरिंदिया । सेसा एगिंदिया जहा बेइंदिया । पंचिंदियतिरिक्खजोणिया जाव वेमाणिया जहा णेरइया । सिद्धा जहा वणस्सइकाइया ।
इत्थीओ णं भंते ! किं कडजुम्मा पुच्छा ?
गोयमा ! जहण्णपए कडजुम्माओ, उक्कोसपए कडजुम्माओ, अजहण्ण-मणुक्कोस- पए सिय कडजुम्माओ जाव सिय कलियोगाओ, एवं असुर- कुमारित्थीओ वि जाव थणियकुमारइत्थीओ। एवं तिरिक्खजोणियइत्थीओ I एवं मणुसित्थीओ । एवं वाणमंतर- जोइसियवेमाणियदेवित्थी ओ ।
जावइया णं भंते ! वरा अंधगवण्हिणो जीवा तावइया परा अंधगवण्हिणो जीवा ?
हंता गोयमा ! जावइया वरा अंधवगण्हिणो जीवा तावइया परा अंधगवण्हिणो जीवा । सेवं भंते! सेवं भंते !
॥ चउत्थो उद्देसो समत्ता ॥
अट्ठारसमं सतं पंचमो उद्देसो
दो भंते ! असुरकुमारा एगंसि असुरकुमारावासंसि असुरकुमारदेवत्ताए उववण्णा, तत्थ णं एगे असुरकुमारे देवे पासाईए, दरिसणिज्जे, अभिरूवे, पडिरूवे; एगे असुरकुमारे देवे से णं णो पासाईए, णो दरिसणिज्जे, णो अभिरुवे, णो पडिरूवे, से कहमेयं भंते ! एवं ?
गोयमा ! असुरकुमारा देवा दुविहा पण्णत्ता, तं जहा वेउव्वियसरीरा य अवेउव्वियसरीरा य, तत्थ णं जे से वेउव्वियसरीरे असुरकुमारे देवे से णं पासाईए जाव पडिरूवे; तत्थ णं जे से अवेउव्वियसरीरे असुरकुमारे देवे से णं णो पासाईए जाव णो पडिरूवे ।
से केणट्ठेणं भंते ! एवं वुच्चइ जाव णो पडिरूवे ?
गोयमा ! से जहाणामए - इह मणुयलोगंसि दुवे पुरिसा भवंति - एगे पुरिसे अलंकिय- विभूसिए, एगे पुरिसे अणलंकियविभूसिए, एएसि णं गोयमा ! दोण्हं पुरिसाणं कयरे पुरिसे पासाईए जाव पडिरूवे, कयरे पुरिसे णो पासाईए जाव णो पडिरूवे, जे वा से पुरिसे अणलंकियविभूसिए, जे वा से पुरिसे अलंकिय- विभूसिए ? भगवं ! तत्थ णं जे से पुरिसे अलंकियविभूसिए से णं पुरिसे पासाईए जाव पडिरूवे, तत्थ णं जे से पुरिसे अणलंकियविभूसिए से णं पुरिसे णो पासाईए जाव णो पडिरूवे । से तेणट्टेणं गोयमा ! जाव णो पडिरूवे ।
दो भंते ! णागकुमारा देवा एगंसि णागकुमारावासंसि पुच्छा ? गोयमा ! एवं चेव जाव थणियकुमारा । वाणमंतर - जोइसिय-वेमाणिया वि एवं चेव ।
447
