________________
४
ε
९
१०
भगवई सुत्त
पज्जुवासइ। धम्मकहा जाव परिसा पडिगया । तएणं से सक्के देविंदे देवराया समणस्स भगवओ महावीरस्स अंतियं धम्मं सोच्चा णिसम्म हट्ठतुट्ठे समणं भगवं महावीरं वंदइ णमंसइ, वंदित्ता णमंसित्ता एवं वयासी
कइविहे णं भंते ! उग्गहे पण्णत्ते ?
सक्का ! पंचविहे उग्गहे पण्णत्ते, तं जहा- देविंदोग्गहे, रायोग्गहे, गाहावइउग्गहे, सागारियउग्गहे, साहम्मियउग्गहे । जे इमे भंते! अज्जत्ताए समणा णिग्गंथा विहरंति, एएसि णं अहं उग्गहं अणुजाणामीति कट्टु समणं भगवं महावीरं वंदइ णमंसइ, वंदित्ता णमंसित्ता तमेव दिव्वं जाणविमाणं दुरूहइ, दुरूहित्ता जामेव दिसं पाउब्भूए तामेव दिसं पडिगए । भंते! त्ति भगवं गोयमे समणं भगवं महावीरं वंदइ णमंसइ, वंदित्ता णमंसित्ता एवं वयासीजं णं भंते ! सक्के देविंदे देवराया तुब्भे णं एवं वदइ, सच्चे णं एसमट्ठे ? हंता गोयमा ! सच्चे।
सक्के णं भंते ! देविंदे देवराया किं सम्मावाई, मिच्छावाई ? गोयमा ! सम्मावाई, णो मिच्छावाई।
सक्के णं भंते ! देविंदे देवराया किं सच्चं भासं भासइ, मोसं भासं भासइ, सच्चामोसं भासं भासइ, असच्चामोसं भासं भासइ ?
गोयमा ! सच्चं पि भासं जाव असच्चामोस पि भासं भासइ ।
सक्के णं भंते ! देविंदे देवराया किं सावज्जं भासं भासइ, अणवज्जं भासं भासइ ? गोयमा ! सावज्जं पि भासं भासइ, अणवज्जं पि भासं भासइ ।
से केणट्ठेणं भंते ! एवं वुच्चइ- सावज्जं पि जाव अणवज्जं पि भासं भासइ ?
गोयमा ! जाहे णं सक्के देविंदे देवराया सुहुमकायं अणिजूहित्ता णं भासं भासइ ताहे णं सक्के देविंदे देवराया सावज्जं भासं भासइ, जाहे णं सक्के देविंदे देवराया सुहुमकायं णिजूहित्ता णं भासं भासइ ताहे णं सक्के देविंदे देवराया अणवज्जं भासं भासइ। से तेणट्टेणं जाव भासइ ।
सक्के णं भंते ! देविंदे देवराया किं भवसिद्धीए, अभवसिद्धीए, सम्मदिट्ठीए, पुच्छा ? गोयमा ! एवं जहा मोउद्देसए सणंकुमारो जाव णो अचरिमे ।
जीवाणं भंते! किं चेयकडा कम्मा कज्जंति, अचेयकडा कम्मा कज्जंति ? गोयमा ! जीवाणं चेयकडा कम्मा कज्जंति, णो अचेयकडा कम्मा कज्जंति ।
से केणट्ठेणं भंते ! एवं वुच्चइ जाव कज्जंति ?
गोयमा ! जीवाणं आहारोवचिया पोग्गला, बोंदिचिया पोग्गला, कलेवरचिया पोग्गला तहा तहा णं ते पोग्गला परिणमंति, णत्थि अचेयकडा कम्मा समणाउसो ! दुट्ठाणेसु, दुसेज्जासु दुणिसीहियासु तहा तहा णं ते पोग्गला परिणमंति, णत्थि अचेयकडा कम्मा समणाउसो ! आयंके से वहाए होइ, संकप्पे से वहाए होइ, मरणंते से वहाए होइ तहा तहा णं ते पोग्गला
414
