________________
18
२
३
६
भगवई सुत्त
सोलसमं सतं
पढमो उद्देसो
अहिगरणि जरा कम्मे, जावइयं गंगदत्त सुमिणे य ।
ओगे लोग बलि, ओहि दीव उदही दिसा थणिया ॥
तेणं कालेणं तेणं समएणं रायगिहे जाव पज्जुवासमाणे एवं वयासी- अत्थि णं भंते! अहिगरणिंसि वाउयाए वक्कमइ ?
हंता अत्थि ।
से भंते ! किं पुढे उद्दाइ, अपुट्ठे उद्दाइ ? गोयमा ! पुट्ठे उद्दाइ, णो अपुट्ठे उद्दाइ ।
से भंते! किं ससरीरी णिक्खमइ, असरीरी णिक्खमइ ? एवं जहा खंदए जाव से तेणट्टेणं णो असरीरी णिक्खमइ ।
इंगालकारियाए णं भंते! अगणिकाए केवइयं कालं संचिट्ठइ ?
गोयमा ! जहण्णेणं अंतोमुहुत्तं, उक्कोसेणं तिण्णि राइंदियाइं । अण्णे वि तत्थ वाउयाए वक्कमइ, ण विणा वाउयाएणं अगणिकाए उज्जलइ ।
पुरिसे णं भंते ! अयं अयकोट्ठसि अयोमएणं संडासएणं उव्विहमाणे वा पव्विहमाणे वा कइकिरिए ?
गोयमा ! जावं च णं से पुरिसे अयं अयकोद्वंसि अयोमएणं संडासएणं उव्विहिति वा पव्विहिति वा, तावं च णं से पुरिसे काइयाए जाव पाणाइवायकिरियाए पंचहिं किरियाहिं पुट्ठे, जेसिं पि णं जीवाणं सरीरेहिंतो अए णिव्वत्तिए, अयकोट्ठे णिव्वत्तिए, संडासए णिव्वत्तिए, इंगाला णिव्वत्तिया, इंगालकड्ढणी णिव्वत्तिया, भत्था णिव्वत्तिया, ते वि णं जीवा काइयाए जाव पंचहिं किरियाहिं पुट्ठा ।
पुरिसे णं भंते ! अयं अयकोट्ठाओ अयोमएणं संडासएणं गहाय अहिकरणिंसि उक्खिव्वमाणे वा णिक्खिव्वमाणे वा कइकिरिए ?
गोयमा ! जावं च णं से पुरिसे अयं अयकोट्ठाओ जाव णिक्खिवइ वा तावं च णं से पुरिसे काइयाए जाव पाणाइवायकिरियाए पंचहिं किरियाहिं पुट्ठे । जेसिं पि णं जीवाणं सरीरेहिंतो अयो णिव्वत्तिए, अयकोट्ठे णिव्वत्तिए, संडासए णिव्वत्तिए, चम्मेट्ठे णिव्वत्तिएमुट्ठिए णिव्वत्तिए, अहिगरणी णिव्वत्तिया, अहिगरणि-खोडी णिव्वत्तिया, उदगदोणी णिव्वत्तिया, अहिगरणसाला णिव्वत्तिया, ते वि णं जीवा काइयाए जाव पंचहिं किरियाहिं पुट्ठा ।
जीवे णं भंते! किं अहिगरणी, अहिगरणं ? गोयमा ! जीवे अहिगरणी वि अहिगरणं पि ।
411
