________________
भगवई सुत्त
३
से केणटेणं जाव पासंति ? गोयमा ! अणुत्तरोववाइयाणं अणंताओ मणोदव्ववग्गणाओ लद्धाओ पत्ताओ अभिसमण्णागयाओ भवंति, से तेणटेणं गोयमा ! एवं वुच्चइ जाव पासंति । कइविहे णं भंते ! तुल्लए पण्णत्ते ? गोयमा ! छव्विहे तुल्लए पण्णत्ते, तं जहा- दव्वतुल्लए खेत्ततुल्लए कालतुल्लए भवतुल्लए भावतुल्लए संठाणतुल्लए । से केणटेणं भंते ! एवं वुच्चइ- दव्वतुल्लए, दव्वतुल्लए ? गोयमा ! परमाणपोग्गले परमाणपोग्गलस्स दव्वओ तुल्ले, परमाणुपोग्गले परमाणुपोग्गलवइरित्तस्स दव्वओ णो तुल्ले, दुपएसिए खंधे दुपएसियस्स खंधस्स दव्वओ तुल्ले, दुपएसिए खंधे दुपएसिय वइरित्तस्स दव्वओ णो तुल्ले । एवं जाव दसपएसिए । तुल्लसंखेज्जपएसिए खंधे तुल्लसंखेज्जपएसियस्स खंधस्स दव्वओ तुल्ले, तुल्लसंखेज्जपएसिए खंधे तुल्लसंखेज्जपएसियवइरित्तस्स खंधस्स दव्वओ णो तुल्ले, एवं तुल्लअसंखेज्जपएसिए वि एवं तुल्लअणंतपएसिए वि, से तेणटेणं गोयमा ! एवं वुच्चइ- दव्वतुल्लए दव्वतुल्लए । से केणटेणं भंते ! एवं वुच्चइ- खेत्ततुल्लए, खेत्ततुल्लए ? गोयमा ! एगपएसोगाढे पोग्गले एगपएसोगाढस्स पोग्गलस्स खेत्तओ तुल्ले, एगपएसोगाढे पोग्गले एगपएसोगाढ-वइरित्तस्स पोग्गलस्स खेत्तओ णो तुल्ले । एवं जाव दसपएसोगाढे | एवं तुल्लसंखेज्जपएसोगाढे, एवं तुल्लअसंखेज्जपएसोगाढे वि । से तेणटेणं गोयमा ! जाव खेत्ततुल्लए, खेत्ततुल्लए । से केणद्वेणं भंते ! एवं वुच्चइ- कालतुल्लए, कालतुल्लए ? गोयमा ! एगसमयठिईए पोग्गले एगसमयठिईयस्स य पोग्गलस्स कालओ तुल्ले, एगसमयठिईए पोग्गले एगसमयठिईय-वइरित्तस्स पोग्गलस्स कालओ णो तुल्ले, एवं जाव दससमयठिईए | तुल्लसंखेज्जसमयठिईए एवं चेव । एवं तुल्लअसंखेज्जसमयठिईए वि | से तेणटेणं जाव कालतुल्लए कालतुल्लए | से केणद्वेणं भंते ! एवं वुच्चइ-भवतुल्लए, भवतुल्लए ? गोयमा ! णेरइए जेरइयस्स भवढयाए तुल्ले, णेरइयवइरित्तस्स भवट्ठयाए णो तुल्ले, तिरिक्खजोणिए एवं चेव, एवं मणुस्से, एवं देवे वि । से तेणद्वेणं जाव भवतुल्लए भवतुल्लए। से केणटेणं भंते ! एवं वुच्चइ- भावतुल्लए, भावतुल्लए ? गोयमा ! एगगुणकालए पोग्गले एगगुणकालस्स पोग्गलस्स भावओ तुल्ले, एगगुणकालए पोग्गले एगगुणकालगवइरित्तस्स पोग्गलस्स भावओ णो तुल्ले । एवं जाव दसगुणकालए । एवं तुल्लसंखेज्जगुणकालए पोग्गले, एवं तुल्लअसंखेज्ज-गुणकालए वि, एवं तुल्लअणंतगुणकालए वि | जहा कालए एवं णीलए, लोहियए, हालिद्दे, सुक्किल्लए । एवं सुब्भिगंधे एवं दुब्भिगंधे। एवं तित्ते जाव महरे | एवं कक्खडे जाव लुक्खे |
376
