________________
भगबई सुत्त पासायवडेंसगं विउव्वइ पंच जोयणसयाई उड्ढं उच्चत्तेणं, अड्ढाइज्जाइं जोयणसयाई विक्खंभेणं, अब्भुग्गय-मूसिय, वण्णओ जाव पडिरूवं । तस्स णं पासायवडिंसगस्स उल्लोए पउमलयाभत्तिचित्ते जाव पडिरूवे । तस्स णं पासायवडेंसगस्स अंतो बहसमरमणिज्जे भूमिभागे जाव मणीणं फासो । मणिपेढिया अट्ठजोयणिया जहा वेमाणियाणं। तीसे णं मणिपेढियाए उवरिं महं एगे देवसयणिज्जे विउव्वइ, सयणिज्जवण्णओ जाव पडिरूवे | तत्थ णं से सक्के देविंदे देवराया अट्ठहिं अग्गमहिसीहिं सपरिवाराहिं, दोहि य अणिएहिं पट्टाणिएण य गंधव्वाणिएण य सद्धिं महयाहयणट्ट जाव दिव्वाइं भोगभोगाइं भुंजमाणे विहरइ । जाहे ईसाणे देविंदे देवराया दिव्वाइं भोगभोगाइं भुजिउकामे भवइ से कहमियाणिं पकरेइ? गोयमा ! जहा सक्के तहा ईसाणे वि णिरवसेसं | एवं सणंकमारे वि, णवरं पासायवडेंसओ छ जोयणसयाइं उडढं उच्चत्तेणं, तिण्णि जोयणसयाई विक्खंभेणं । मणि-पेढिया तहेव अट्ठजोयणिया । तीसे णं मणिपेढियाए उवरिं एत्थ णं महेगं सीहासणं विउव्वइ सपरिवारं भाणियव्वं । तत्थ णं सणकुमारे देविंदे देवराया बावत्तरीए सामाणिय- साहस्सीहिं जाव चउहिं बावत्तरीहिं आयरक्खदेवसाहस्सीहि य बहुहिं सणंकुमारकप्पवासीहिं वेमाणिएहिं देवेहि य देवीहि य सद्धिं संपरिवुडे महयाहय जाव विहरइ । एवं जहा सणंकुमारे तहा जाव पाणओ-अच्चुओ, णवरं जो जस्स परिवारो सो तस्स भाणियव्वो | पासाय-उच्चत्तं जं सएस-सएस कप्पेस विमाणाणं उच्चत्तं, अद्धद्धं वित्थारो जाव अच्चुयस्स णवजोयणसयाई उड्ढं उच्चत्तेणं अद्धपंचमाइं जोयणसयाई विक्खंभेणं । तत्थ णं गोयमा ! अच्चुए देविंदे देवराया दसहिं सामाणियसाहस्सीहिं जाव विहरइ, सेसं तं चेव || सेवं भंते! सेवं भंते !॥
|| छट्ठो उद्देसो समत्तो ||
चोद्दसमं सतं
सत्तमो उद्देसो
रायगिहे जाव परिसा पडिगया । गोयमा ! त्ति समणे भगवं महावीरे भगवं गोयमं आमंतित्ता एवं वयासी-चिर संसिट्ठोसि मे गोयमा ! चिरसंथुओसि मे गोयमा! चिरपरिचिओसि मे गोयमा ! चिरजुसिओसि मे गोयमा ! चिराणुगओसि मे गोयमा ! चिराणुवत्तीसि मे गोयमा ! अणंतरं देवलोए अणंतरं माणुस्सए भवे, किं परं, मरणा कायस्स भेया, इओ चुया दो वि तुल्ला एगट्ठा अविसेसमणाणत्ता भविस्सामो | जहा णं भंते ! वयं एयमढे जाणामो पासामो तहा णं अणुत्तरोववाइया वि देवा एयमटुं जाणंति पासंति ? हंता गोयमा ! जहा णं वयं एयमद्रं जाणामो, पासामो तहा अणुत्तरोववाइया वि देवा एयमटुं जाणंति पासंति ।
375
