________________
भगवई सुत्त
गोयमा ! पंचवण्णा पंचरसा दुगंधा अट्ठफासा पण्णत्ता | ते पुण अप्पणा अवण्णा अगंधा अरसा अफासा पण्णत्ता ।
ते णं भंते ! जीवा किं उस्सासगा, णिस्सासगा, णोउस्सास णिस्सासगा ? गोयमा ! उस्सासए वा णिस्सासए वा णोउस्सासणिस्सासए वा; उस्सासगा वा णिस्सासगा वा णोउस्सासणिस्सासगा वा | अहवा उस्सासए य णिस्सासए य, चउभंगो | अहवा उस्सासए य णोउस्सासणिस्सासए य, चउभंगो | अहवा णिस्सासए य णोउस्सासणिस्सासए य चउभंगो । अहवा उस्सासए य निस्सासए य नोउस्सास णिस्सासए य अट्ठ भंगा | एवं एए छव्वीसं भंगा भवंति ।
ते णं भंते ! जीवा किं आहारगा, अणाहारगा ? गोयमा ! णो अणाहारगा, आहारए वा, अणाहारए वा एवं अट्ठ भंगा |
ते णं भंते ! जीवा किं विरया, अविरया, विरयाविरया ? गोयमा ! णो विरया, णो विरयाविरया, अविरए वा अविरया वा ।
ते णं भंते ! जीवा किं सकिरिया अकिरिया ? गोयमा ! णो अकिरिया, सकिरिए वा सकिरिया वा ।
ते णं भंते ! जीवा किं सत्तविहबंधगा, अट्ठविहबंधगा ? गोयमा ! सत्तविहबंधए वा अट्ठविहबंधए वा | अट्ठ भंगा |
ते णं भंते ! जीवा किं आहारसण्णोवउत्ता, भयसण्णोवउत्ता मेहणसण्णोवउत्ता, परिग्गहसण्णोवउत्ता ? गोयमा ! आहारसण्णोवउत्ता वा, एवं असीति भंगा ।
ते णं भंते ! जीवा किं कोहकसायी, माणकसायी, मायाकसायी, लोभकसायी ? गोयमा ! चत्तारि वि भयणाए असीति भंगा ।
ते णं भंते ! जीवा किं इत्थिवेयगा, पुरिसवेयगा, णपुंसगवेयगा ? गोयमा! णो इत्थिवेयगा णो पुरिसवेयगा, णपुंसगवेयए वा णपुंसगवेयगा वा । ते णं भंते! जीवा किं इत्थिवेय-बंधगा, पुरिसवेय-बंधगा णपुंसगवेय-बंधगा ? गोयमा! इत्थिवेयबंधए वा पुरिसवेय-बंधए वा णपुंसगवेय-बंधए वा, एवं छव्वीसं भंगा। ते णं भंते ! जीवा किं सण्णी, असण्णी ? गोयमा ! णो सण्णी, असण्णी वा असण्णीणो वा ।
ते णं भंते ! जीवा किं सइंदिया, अणिंदिया ? गोयमा ! णो अणिंदिया, सइंदिए वा सइंदिया वा ।
से णं भंते ! उप्पलजीवे त्ति कालओ केवच्चिरं होइ ? गोयमा ! जहण्णेणं अंतोमुहत्तं, उक्कोसेणं असंखेज्ज कालं ।
284
