________________
30
३१
|३२
|३३
|३४
३५
|३६
|३७
भगवई सुत्त
से णं भंते ! उप्पलजीवे पुढविजीवे, पुणरवि उप्पलजीवे त्ति केवइयं कालं सेवेज्जा; केवइयं कालं गइरागई करेज्जा ?
गोयमा ! भवादेसेणं जहण्णेणं दो भवग्गहणाई, उक्कोसेणं असंखेज्जाइं भवग्गहणाईं। कालादेसेणं जहण्णेणं दो अंतोमुहुत्ता, उक्कोसेणं असंखेज्जं कालं, एवइयं कालं सेवेज्जा, एवइयं कालं गइरागई करेज्जा ।
से णं भंते ! उप्पलजीवे, आउजीवे पुणरवि उप्पलजीवे त्ति केवइयं कालं सेवेज्जा ? केवइयं कालं गइरागइं करेज्जा ? गोयमा ! एवं चेव, एवं जहा पुढविजीवे भणिए तहा जाव वाउजीवे भाणियव्वे |
से णं भंते ! उप्पलजीवे वणस्सइजीवे, से पुणरवि उप्पलजीवे त्ति केवइयं कालं सेवेज्जा, केवइयं कालं गइरागई करेज्जा ?
गोयमा ! भवादेसणं जहण्णेणं दो भवग्गहणाई उक्कोसेणं अणंताई भवग्गहणाई। कालादेसेणं जहण्णेणं दो अंतोमुहुत्ता, उक्कोसेणं अणंतं कालं तरूकालं; एवइयं कालं सेवेज्जा, एवइयं कालं गइरागई करेज्जा |
से णं भंते ! उप्पलजीवे बेइंदियजीवे पुणरवि उप्पलजीवे त्ति केवइयं कालं सेवेज्जा, केवइयं कालं गइरागई करेज्जा ?
गोयमा ! भवादेसेणं जहण्णेणं दो भवग्गहणाई, उक्कोसेणं संखेज्जाइं भवग्गहणाई । कालादेसणं जहण्णेणं दो अंतोमुहुत्ता, उक्कोसेणं संखेज्जं कालं; एवइयं कालं सेवेज्जा, एवइयं कालं गइरागइं करेज्जा । एवं तेइंदिय, चउरिंदियजीवे वि।
से णं भंते ! उप्पलजीवे पंचेदियतिरिक्ख जोणियजीवे पुणरवि उप्पलजीवे त्ति पुच्छा । गोयमा ! भवादेसेणं जहण्णेणं दो भवग्गहणाई, उक्कोसेणं अट्ठ भवग्गहणाई; कालादेसेणं जहण्णेणं दो अंतोमुहुत्ताइं, उक्कोसेणं पुव्वकोडिपुहुत्तं; एवइयं कालं सेवेज्जा, एवइयं कालं गइरागइं करेज्जा। एवं मणुस्सेण वि समं जाव एवइयं कालं गइरागई करेज्जा ।
ते णं भंते! जीवा किमाहारमाहरेंति ?
गोमा ! दव्वओ अणतपएसियाइं दव्वाइं, खेत्तओ असंखेज्जपएसोगाढाई, कालओ अण्णयरं कालठिड्याइं, भावओ वणमंताइं गंधमंताई रसमंताई फासमंताई एवं जहा आहारुद्देस वणस्सइकाइयाणं आहारो तहेव जाव सव्वप्पणयाए आहारमाहारेंति, णवरं णियमा छद्दिसिं; सेसं तं चेव ।
तेसि णं भंते ! जीवाणं केवइयं कालं ठिई पण्णत्ता । गोयमा ! जहण्णेणं अंतोमुहुत्तं, उक्कोसेणं दस वाससहस्साइं ?
तेसि णं भंते ! जीवाणं कइ समुग्धाया पण्णत्ता ? गोयमा ! तओ समुग्धाया पण्णत्ता । तं जहा- वेयणासमुग्घाए, कसायसमुग्धाए, मारणंतियसमुग्धाए ।
285
