________________
भगवई सुत्त
गोयमा ! ते णं असंखेज्जा समए-समए अवहीरमाणा-अवहीरमाणा असंखेज्जाहिं उस्सप्पिणिओस्सप्पिणिहिं अवहीरंति, णो चेव णं अवहिया सिया।
तेसि णं भंते! जीवाणं केमहालिया सरीरोगाहणा पण्णत्ता ? गोयमा! जहण्णेणं अंगुलस्स असंखेज्जइभागं उक्कोसेणं साइरेगं जोयणसहस्सं ।
ते णं भंते ! जीवा णाणावरणिज्जस्स कम्मस्स किं बंधगा, अबंधगा ? गोयमा ! णो अबंधगा, बंधए वा, बंधगा वा । एवं जाव अंतरायइयस्स | णवरं आउयस्स पच्छा ? गोयमा ! बंधए वा, अबंधए वा, बंधगा वा, अबंधगा वा; अहवा बंधए य अबंधए य अहवा बंधए य अबंधगा य, अहवा बंधगा य अबंधए य, अहवा बंधगा य अबंधगा य एते अट्ट भंगा। ते णं भंते! जीवा णाणावरणिज्जस्स कम्मस्स किं वेयगा, अवेयगा ? गोयमा! णो अवेयगा, वेयए वा वेयगा वा | एवं जाव अंतराइयस्स |
ते णं भंते ! जीवा किं सायावेयगा, असायावेयगा ? गोयमा ! सायावेयए वा असायावेयए वा एवं एते अटू भंगा ।
ते णं भंते ! जीवा णाणावरणिज्जस्स कम्मस्स किं उदई, दई ? गोयमा ! णो अणुदई, उदई वा उदइणो वा । एवं जाव अंतराइयस्स | ते णं भंते! जीवा णाणावरणिज्जस्स कम्मस्स किं उदीरगा अणुदीरगा ? गोयमा ! णो अणुदीरगा, उदीरए वा उदीरगा वा । एवं जाव अंतराइयस्स। णवरं वेयणिज्जाउएसु अट्ठ भंगा |
ते णं भंते ! जीवा किं कण्हलेसा णीललेसा काउलेसा तेउलेसा ?
गोयमा ! कण्हलेसे वा जाव तेउलेसे वा, कण्हलेस्सा वा णीललेस्सा वा काउलेस्सा वा तेउलेस्सा वा । अहवा कण्हलेसे य णीललेस्से य, एवं दुयासंजोग- तियासंजोग-चउक्कसंजोगेणं असीई भंगा भवंति ।
ते णं भंते ! जीवा किं णाणी अण्णाणी ? गोयमा ! णो णाणी, अण्णाणी वा अण्णाणिणो वा
ते णं भंते ! जीवा किं मणजोगी, वयजोगी, कायजोगी ? गोयमा ! णो मणजोगी, णो वयजोगी, कायजोगी वा कायजोगिणो वा ।
ते णं भंते ! जीवा किं सागारोवउत्ता, अणागारोवउत्ता ? गोयमा ! सागारोवउत्ते वा, अणागारोवउत्ते वा अटू भंगा ।
कइवण्णा, कइगंधा, कइरसा, कइफासा
तेसि णं भंते ! जीवाणं सरीरगा पण्णत्ता ?
283
