________________
भगवई सुत्त ४० | जइ सवेदए होज्जा किं इत्थीवेदए होज्जा, पुरिसवेदए होज्जा, पुरिस- णपुंसगवेदए होज्जा ? ___ गोयमा ! इत्थीवेदए वा होज्जा, पुरिसवेदए वा होज्जा, पुरिस णपुंसगवेदए वा होज्जा ।
से णं भंते ! किं सकसाई होज्जा, अकसाई होज्जा ? गोयमा ! सकसाई वा होज्जा, अकसाई वा होज्जा । जइ अकसाई होज्जा किं उवसंतकसाई होज्जा, खीणकसाई होज्जा ? गोयमा! णो उवसंतकसाई होज्जा, खीणकसाई होज्जा । जइ सकसाई होज्जा से णं भंते ! कइसु कसाएसु होज्जा ? गोयमा ! चउसु वा तिसु वा दोसु वा एक्कम्मि वा होज्जा । चउसु होज्जमाणे चउसु संजलणकोह-माण- माया-लोभेसु होज्जा, तिसु होज्जमाणे तिसु- संजलणमाण-माया-लोभेसु होज्जा, दोसु होज्जमाणे दोसु-संजलणमाया-लोभेसु होज्जा, एगम्मि होज्जमाणे एगम्मि संजलणलोभे होज्जा । तस्स णं भंते ! केवइया अज्झवसाणा पण्णत्ता ? गोयमा ! असंखेज्जा; एवं जहा असोच्चाए तहेव जाव केवलवरणाण-दंसणे समुप्पज्जइ । से णं भंते ! केवलिपण्णत्तं धम्मं आघवेज्ज वा पण्णवेज्ज वा परूवेज्ज वा ? हंता गोयमा ! आघवेज्ज वा पण्णवेज्ज वा परूवेज्ज वा । से णं भंते ! पव्वावेज्ज वा मुंडावेज्ज वा ? हंता गोयमा ! पव्वावेज्ज वा मुंडावेज्ज वा । तस्स णं भंते ! सिस्सा वि पव्वावेज्ज वा मुंडावेज्जा वा ? हंता गोयमा ! पव्वावेज्ज वा मुंडावेज्ज वा । तस्स णं भंते ! पसिस्सा वि पव्वावेज्ज वा मुंडावेज्ज वा ? हंता गोयमा! पव्वावेज्ज वा मुंडावेज्जा वा । से णं भंते ! सिज्झइ जाव सव्वदुक्खाणं अंतं करेइ ? हंता गोयमा! सिज्झइ जाव सव्वदुक्खाणं अंतं करेइ । तस्स णं भंते ! सिस्सा वि सिज्झंति जाव सव्वदुक्खाणं अंतं करेंति ? हंता गोयमा ! सिज्झंति जाव सव्वदुक्खाणं अंतं करेंति ।। तस्स णं भंते ! पसिस्सा वि सिज्झंति जाव सव्वदुक्खाणं अंतं करेंति ? हंता गोयमा ! सिज्झंति जाव सव्वदुक्खाणं अंतं करेंति । से णं भंते ! किं उड्ढं होज्जा, पुच्छा ? गोयमा ! जहेव असोच्चाए जाव अड्ढाइज्ज-दीवसमुद्द तदेक्कदेसभाए होज्जा |
ते णं भंते ! एगसमए णं केवइया होज्जा ? गोयमा ! जहण्णेणं एक्को वा दो वा तिण्णि वा उक्कोसेणं अट्ठसयं ।
238
