Page Text
________________
[५०] धणुसयपमाणो य सुविहिकुमारो पंचासपुव्वसहस्सोवरि अट्ठावीसपुव्वंगाहियाणि पंचासपुव्वसहस्साणि जाव कयरज्जो मग्गसिरकिण्हछट्ठीए निक्खंतो । चउवरिसोवरि कत्तियसुद्धतइयाए संपत्तकेवलो मगरलंछणो वामदाहिणपासेसु सुतारादेवी-अजियजक्खपज्जुवासिज्जमाणो चंदप्पहजिण[तित्थ]पल्लट्टणे पवत्तियनियतित्थो सुविहिकेवली चउवरिसूणं अट्ठावीसपुव्वंगुणं च पुव्वलक्खं जाव विहरेत्ता सम्मेयसेलसिहरे भद्दवयसुद्धनवमीए सिद्धो त्ति ॥ सुविहिजिणो त्ति गयं ॥
सुविहिजिणाओ नवसागरोवमकोडीहिं दसमो सीयलजिणो त्ति । सीयलजिणकहा भण्णइ –
सुसीमाए नयरीए पउमुत्तरो राया सच्छाहसूरिसमीवे विहियपव्वज्जो जाओ आणयकप्पे देवो । तओ चइऊण वइसाहकण्हछट्ठीए इहेव जंबुद्दीवे भारहे वासे भद्दिलपुरे दढरहस्स रण्णो नंदादेवीए चउदसमहासुमिणसूइओ संभूओ गब्भे । तओ माहकण्हबारसीए जाओ पुव्वलक्खाऊ कणयवन्नो पुत्तो । गब्भगयंमि य जमिमंमि माउकरए(फ)रिसेण पिउदेहो दाहिलो वि सीयलो जाओ । तेणेसो पइट्ठिओ पिउणा सीयलो नाम ।
नउई(इ)धणूसिओ य सीयलकुमारो पणुवीसपुव्वसहस्सोवरि पण्णासपुव्वसहस्साणि जाव कयरज्जो माहकिण्हबारसीए निक्खंतो । तिवरिसोवरि पोससुद्धचउद्दसीए संपत्तकेवलो सिरिवच्छलंछणो वामदाहिणपासेसु अच्चुया( असोया? )देवी-बंभसंति[जक्ख]पज्जुवासिज्जमाणो सुविहिजिणतित्थवोच्छित्तीओ गए चउभागो(गी)कयपलिओवमस्सेगभागे नियतित्थं पवत्तितो सीयलकेवली तिवरिसूणाणि पणवीसं पुव्वसहस्साणि जाव विहरित्ता सम्मेयसेलसिहरे वइसाहकण्हबीयाए सिद्धो त्ति । सीयलजिणो त्ति गयं ॥
सीयलजिणाओ य छव्वीसवरिससहस्स-छावट्ठिवरिसलक्खोणाए सागरोवमसयरहियाए सागरोवमकोडीए एक्कारसमो सिज्जंसजिणो त्ति । सिज्जंसजिणकहा भण्णइ -
खेमपुरीए पंकगुम्मो राया वज्जदत्तगुरुसमीवे विहियपव्वज्जो य जाओ सुक्को(क्के) देवो । तओ जेट्टकिण्हछट्ठीए चविऊणिहेव जंबुद्दीवे भारहे वासे सीहउरनयरे विण्हुस्स रण्णो विण्हुदेवीए चउदससुमिणसूइओ संभूओ गब्भे । तओ फग्गुणकण्हबारसीए जाओ चउरासीवरिसलक्खाऊ कणयवन्नो पुत्तो । गब्भगयंमि य जमिमंमि जणणीए सोवसग्गसेज्जासेवणे वि सेयं जायं तेणेसो पइट्ठिओ पिउणा सेयंसो नाम । अवि य -
पुव्वपुरिसकमागय-निव-सेज्जा देवयापरिग्गहिया । अच्छिज्जइ जो तं पुण, अल्ली(ल्लि)यइ देवया तस्स ॥ उवसग्गं कुणइ नवो(वं?), गब्भुब्भवदोहलेण जिणजणणी । जावुवविट्ठा तावा-ऽइक्कंता देवया तत्तो । जं तित्थयरकए च्चिय, रक्खिज्जति त्ति तम्मि गब्भगए ।
जायं सिज्जा[वि]सि(स)यं, इय सेज्जंसो त्ति नाम कयं ॥ असीइधणुपमाणो य सेज्जंसकुमारो एक्कवीसवरिसलक्खोवरि छायालीसवरिसलक्खाणि जाव कयरज्जो फग्गुणकिण्हतेरसीए निक्खंतो । दुव्व(व)रिसोवरि महामावासाए संपत्तकेवलो गंडयलंछणो वाम-दाहिणपासेसु माणवीदेवी-ईसरजक्खपज्जुवासिज्जमाणो सीयलजिणतित्थवोच्छित्तीओ गए चउभागीकयपलिओवमस्सेगभागे
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |