Page Text
________________
[४८]
कयाणसणो जाओ वेजयंते विमाणे देवो ।
तओ सावणसुद्धबीयाए चविऊण इहेव जंबुद्दीवे भारहे वासे कोसलपुरे मेहस्स रण्णो मंगलाए देवीए चोद्दससुमिणसु(सू)इओ संभूओ गब्भे । तओ वइसाहसुद्धअट्ठमीए जाओ चालीसपुव्वलक्खाऊ कणयवण्णो पुत्तो । संभूयम्मि जमिमंमि जणणीए सव्वकज्जेसु सुमई जाया तेणेसो पइट्ठिओ पिउणा सुमई णाम । अवि य
भण्णिहिइ बीइ(य)परिच्छेयबुद्धिसग्गे सवक्किववहारे ।
जह तह जणणी सुमई, तेण कयं नाम सुमइ त्ति ॥ तिधणुसयपमाणो य सुमइकुमारो दसपुव्वलक्खोवरि बारसपुव्वंगाहियाणि अउणतीसं पुव्वलक्खाणि जाव कयरज्जो वइसाहसुद्धनवमीए निक्खंतो । अवि य -
सुमइ त्थ निच्चभत्तेण निग्गओ; वासुपुज्जो जिणो चउत्थेण ।
पासो मल्ली वि य अट्ठमेण सेसा उ छटेणं ॥ [आ.नि. २२८] तओ वीसवरिसोवरि चेत्तसुद्धेकारसीए संपत्तकेवलो कोंचलंछणो वाम-दक्खिणपासेसु महाकालीदेवीतुंबरुजक्खपज्जुवासिज्जमाणो अभिनंदणजिणतित्थपल्लट्टणेण पवत्तियनियतित्थो सुमइकेवली वीसवरिसोणं बारसपुव्वंगूणं च पुव्वलक्खं जाव विहरेत्ता सम्मेयसेलसिहरे चेत्तसुद्धनवमीए सिद्धो त्ति । सुमइजिणो त्ति गयं ॥
सुमइजिणाओ य नउईसागरोवमकोडिसहस्सेहिं छट्ठो पउमप्पहजिणो त्ति पउमप्पहजिणकहा भण्णइ -
सुसीमाए नयरीए अपराजिओ णाम राया पिहियासवसूरिसमीवे विहिए(य) पव्वज्जो जाओ गेवेज्जे देवो । तओ माहकिण्हछट्ठीए चविऊण इहेव जंबुद्दीवे भारहे वासे कोसंबीए नयरीए वर(धर )स्स रण्णो सुसीमाए देवीए चउदससुमिणसूइओ संभूओ गब्भे । तओ कत्तियकिण्हबारसीए जाओ तेवीस(तीस)पुव्वलक्खाऊ पवालयवन्नो पुत्तो । गब्भगयंमि य जमिमंमि जाओ पउमसयणिज्जे दोहलओ सो य देवयाए संपाडिओ, परमवण्णो य भगवं तेणेसो पय(इ)ट्ठिओ पिउणा पउमप्पहो नाम।
__ अड्डाइधणुसयपमाणो य पउमप्पहकुमारो अद्धट्ठमपुव्वलक्खोवरि सोलसपुव्वंगाहियाणि सड्डेक्कवीसपुव्वलक्खाणि जाव कयरज्जो कत्तियकिण्हतेरसीए निक्खंतो । छम्मासोवरि चित्तपुन्निमाए संपत्तकेवलो पउमलंछणो वाम-दाहिणपासेसु कुसुमादेवी-अच्चुयजक्ख(अच्चुयादेवी-कुसुमजक्ख?)पज्जुवासिज्जमाणो सुमइजिणतित्थपल्लट्टणेण पवत्तियनियतित्थो पउमप्पहकेवली छम्मासूणं सोलसपुव्व(व्वंगूणं) [च पुव्वलक्खं] जाव विहरेत्ता सम्मेयसेलसिहरे मग्गसिरकिण्हेक्कारसीए सिद्धो त्ति । पउमप्पहजिणो त्ति गयं ॥
पउमप्पहजिणाओ वि नवसागरोवमकोडिसहस्सेहिं सत्तमो सुपासजिणो त्ति सुपासजिणकहा भण्णइ -
खेमपुरी[ए] नंदी नाम राया अरिदमणसूरिसमीवे विहियपव(व्व)ज्जो जाओ गेवेज्जे देवो । तओ भद्दवयकण्हट्ठमीए चविऊण इहेव जंबुद्दीवे [भारहे वासे] वाणारसीनयरीए सुप्पइट्ठस्स रण्णो पुहवीए देवीए चोद्दससुमिणसूइओ संभूओ गब्भे । तओ जेट्टसुद्धबारसीए जाओ वीसपुव्वलक्खाऊ कणयवण्णो पुत्तो । गब्भत्थे य जमिमं जणणी कक्कसकुखी(क्खी) वि सुपासा संपन्ना तेणेसो पइट्ठिओ पिउणा सुपासो नाम ।
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |