Page Text
________________
[३७] गणं(खणं?)' सोउं चेमं चक्किणा सुमरिउं(यं) सहस्सारं चक्कं चडियं हत्थे । भणिओ ऽनिलवेगो - 'भो ! भणिस्सइ जणो जहा बालो विणासिओ । ता अवसरसु तुरियं जइ जीविएण कज्ज' । अनिलवेगो भणइ - 'जइ सच्चं चक्की तो मुंच चक्कं' । तओ सरोसं भामित्तु भरहेण मुक्कं चक्कं । तं च जक्खसहस्साहिट्ठियं समुहमित्तं दट्ठमनिलवेगो, 'पेच्छामिमस्स ताव वेगं'ति चिंतित्ता गहियखग्गो धाविओ पुरओ रविमंडलस्स पासेसु परिब्भमइ । चक्कं च तस्साऽपहुच्चमाणं वि पिटुं न मुंचइ । तओऽनिलवेगो समुहो होउं जाव घायं करेइ ताव चक्केणं चेव खंडखंडीकओ खग्गो । तओ जक्खे खंखेरिऊण मुट्ठीहिं हणंतो वेढिओ चाउद्दिसि चक्कट्रियजलणजालावलीहिं । तओ समोसरिया(सुमरिया?)ऽनिलवेगेण जलवाहिणी नाम विज्जा । सा य घणं घणेहिं जहा जहा वरिसइ तहा तहा गाढयरं पज्जलइ चक्कं । तओ 'निस्संसयं विणासई'त्ति संभाविऊण सुमरियरिसहेसरो सामाइयत्थो गहियपच्चक्खाणो कयकाउस्सग्गो विणासिओ चक्केणाऽनिलवेगो गओ देवलोयं ति ।
तओ नियत्तेसु दोसु वि बलेसु सीहरहमरणवुत्तंतं सोऊण सोगिओ जावऽच्छइ बाहुबली ताव नारएणाऽऽगम्म निवेइयं जहा - 'रहनेउरचक्कवालपुरोवरि कोड्डकरणथमेतेहिं सुरासुरसमूहेहिं कया तुम्हं रणवत्ता । तं च सोऊण [अ]सहमाणो परिभवमिहाऽऽगओ कुणंतो रणमेवं च विणट्ठोऽनिलवेगो त्ति' । सोउं चेमं महासोगाभिभूओ बाहुबली संठविओ नारय-परियणेहिं।
एवं खारंखज्जेण पुणो पुणो पयर्टेतो(ते) पय(इ)दिणमुभयपक्खखयंकरे संगामे बाहुबलिणा भणाविओ भरहो, जहा – “किमणेण निक्कारणं जणक्खएण ? जओ तुझं मज्झ य नि(वि)रोहो ता दो वि जुज्झामो'। भरहेण भणिय मेवं होउ' ।
तओ सम्ममुद्दिसिय दोण्ह वि पढमं दिट्ठीजुझं जायं । तम्मि बाहुबलिणा जित्तो भरहो । एवं वायाबाहु-मुट्ठि-दंड-जुज्झेहिं वि । 'जिप्पइ किं बाहुबलिणा चेव चक्की जेणाऽहं सव्वत्थ हारेमि ?' त्ति जाव चिंतइ ताव डिं(चडियं) भरहस्स करे य देवयादिन्नं सहस्सारं चक्कं, मुक्कं च बाहुबलिवहाय तं तेण । तं च समुहमेंतं दटुं बाहुबली बाणसेणीए हणइ, तहा वि 'सगोत्ते चक्कं न पहवइ'त्ति पयडियमेरं बाहुबलिं पयाहिणित्ता पुणो चडियं भरहस्स करे । तं च दटुं खरयरं चिंताउ[र] भरहस्स समप्पियं देवयाए दंडरयणं । ताहे सो तेणं गहिएणं पहाविओ । इओ य बाहुबलिणा दिट्ठो गहियदंडरयणो समागओ । चिंतियं चऽणेण - 'समणेणं (समं णेणं?) भंजामि एयं । परं तुच्छाण कामभोगाण कारणे भट्ठनियपइन्नो गमेभो(ममेसो) न वावाइउं जुत्तो । ता सोहणं मम भाउगेहिं अणुट्ठियं अहमवि तयणुचिट्ठिस्सामि'त्ति चिंतिऊण भणियमणेण - 'धिसि धिसि पुरिसत्तणं अहम(म्म?)जुद्धपवत्तस्स । अलं मे भोगेहिं । गिण्हाहि रज्जं । पव्वइस्सामि' । एवं च संगामाओ नियत्तस्स बाहुबलिस्स पुत्तो सोमप्पहो नाम तत्थ रज्जे ठविओ भरहेण ।
बाहुबली वि, ‘तायसमीवे भाउणो मे लहुतरा समुप्पन्ननाणाइसया चिटुंति, ते कहं निरय(इ)सओ पेच्छिस्सं ? ता इत्थेव ताइ(व)ऽच्छामि जाव केवलनाणं समुप्पज्जइ'त्ति चिंतिऊण माणहत्थिमारूढो ठिओ तत्थेव काउस्सग्गं । जाणई य सामी तहावि तं तह कारावेइ । जओऽमूढलक्खा तित्थयरा । ताहे संवच्छरं जाव ठिओ काउस(स्स)ग्गेणं, वेढिओ वल्ली-लयाहिं, पाएसु य वेढिया ध(व)म्मियनिग्गया भुयंगमा । पुन्ने य संवच्छरे भगवं बंभी-सुंदरीओ पट्ठवेइ, पुव्वि [न] पट्टवियाओ जेण तया सम्मं नं(न) [प] डिवज्जंतो त्ति । ताहे वि सो मग्गंतीहिं वल्ली-तण-वेढिओ एक्कंमि चेव लक्खे दिनदिट्ठी दिट्ठो लुलंतेण महल्लेण
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |