Page Text
________________
[३४]
NNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNN
निग्गएण य गुहाओ चक्किणा सह जुज्झिया चिलाया । ते पराजिया मेहमुहे-नाम-देवकुमारे कुलदेवए आराहेति । ते य सत्तरत्तं जाव वासं वासंति । भरहो वि चम्मरयणोवरि खंधावारं ठविऊण उवरि छत्तरयणं ठवेइ । तपभई(तप्पभिई) लोगेण अंडसंभव(वं) जगं पणीयं । तओ बंभंडं नाम पुराणं जायं ति । तत्थ पुव्वण्हे साली वाविज्जो(ज्जे)इ, अवरण्हे लविऊण जेवि(मि)ज्जइ । एवं सत्त दिवसे अच्छइ । तओ आभिओगियदेवेहिं निद्धाडिया मेहमुहा, एएसिं च वयणेण उवणया चिलाया भरहस्स ।
तओ चुल्लहिमवंतगिरिकुमारं देवं साहेइ । तत्थ बावत्तरिजोयणाणि उवरिहुत्तो बाणो गच्छइ । तओ उसभकूडे कागिणिरयणेण सनाममालिहइ । तओ सुसेणाओ उत्तरिल्लसिंधुखंडं साहेइ । पच्छा सेणावई उत्तरिल्लं गंगाखंडं साहेइ । भरहो गंगाए सह वाससहस्सं भोगं भुंजेइ ।
__ तओ वेयड्डे णमि-विणमीहि समं बारससंवच्छराणि जाव जुद्धं जायं । तओ ते जिप्पमाणा विणमी इत्थिरयणं णमी रयणाणि गहाय उवट्ठिया । पच्छा खंडपवायगुहाए नट्टमालयं देवं साहेइ । तओ खंडप्पवायगुहाए निग(ग्ग)च्छइ । पच्छा गंगाकूले नवनिहिओ उवागच्छइ त्ति । ते य इमे -
नेसप्पे १ पंडुयए २ पिंगलओ ३ सव्वरयण ४ महपउमो ५ । कालो ६ य महाकालो ७ माणवगो ८ संख ९ नव निहिणो ।। नेसप्पंमि निवेसो १ पंडुयगनिहिमि गणियमाणाई २ । पिंगल आभरणविही ३ रयणे चउदस वि रयणाई ४ ॥ महपउमे नेवत्थं ५ काले कालोचियस्स निद्देसो ६ । महकाले दव्वगि(वि)ही ७ माणवगे जुद्धसामग्गी ७ ॥ संखे पेच्छणयविही ९ नवनिहिओ जण्हवीमुहे हुंति । बारस-नव-ट्ठजोयण-दीह-पिहलु-च्चमंजूसा ।। पलिओवमठिइदेवा नियनामेहिं नायगा तेसिं ।
वज्जमयकवाडाई चक्किसा(आ)णाकरा सबला ॥ तओ दक्खिणिल्लगंगाखंडं सेणावई साहेइ ।।
एवमेएण कमेण सट्ठीए वाससहस्सेहिं भरहो भाउगे मोत्तुं सेसवसीकयभारहवासो पविट्ठी विणीयनयरीए । ए(च)क्कं पुण जक्खसहस्साहिट्ठियं तीए बो(बा)हिं चेव ठियं । जओ तं तिपल्लएहि(नियल्लएहिं) वि साहिएहिं आउहसालं पविसइ त्ति ।
तओ विज्जाहरनयरा(नरव)ईहिं महाविभूईए कयबारवरिसियकयरज्जा(वरिसियरज्जा)भिसेओ भरहचक्की नियवग्गं संभालिउमारद्धो । दरिसिज्जतेसु य निउत्तेहिं तस्स मि(नि)यल्लएसु परिवाडीए सुंदरी दरिसिया। सा य जद्दिवसं पव्वज्जं लिंती भरहेण निरुद्धा तद्दिवसाओ आरब्भ आयंबिलाणि कुणंती उप्पंडुरमुही जाया । तओ तं दट्ठण रुट्ठो भरहो परियणं भणइ – 'किं मम नत्थि भोयणं जमेसा एरिसी रूवेण जाया ? विज्जा
वा न संति ?' तेहिं सिटुं जहा – 'आयंबिलाणि करेइ' । ताहे तस्स तीसे उवरि पयणुओ रागो जाओ। तओ भणिया – 'जइ रुच्चइ तो मए समं भोगे भुंजाहि, न वि तो पव्वइयाहि' । ताहे पाएसु पडिया विसज्जिया पव्वइया ।
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |