Page Text
________________
[२८]
अन्नया धरणो नागराया भगवंतं वंदओ आगओ । इमेहि य विन्नवियं । तओ सो ते तहा जायमाणे भणइ 'भयवं चत्तसंगो । न एयस्स अस्थि किंपि दायव्वं । मा एयं जायह । अहं तुब्भं भगवओ भत्तीए देमि, सामिस्स सेवा अफला मा भवउ त्ति काउं । गंधव्वपन्नगाणमडयालीसं विज्जासहस्साणि गोरीगंधारी-रोहिणी-पन्नत्तिविज्जापहाणाणि पढियसिद्धाणि [इ]माणि गिन्हह । तओ तासिं सामत्थेण मु(सु)हसयणाइजणमुवलोभित्ता गंतुं वेयड्डपव्वए दाहिणुत्तरासु सेढीसु रहनेउर - चक्कवाल- गगणवल्लभपमुहाणि पन्नास-सट्ठिविज्जाहरमहाणगराणि जणवयसमिद्धाणि निवेसित्ता चिट्ठह'त्ति ।
-
णमि-विणमी वि तहोवइट्टं पडिच्छिऊण सामि नागरायं [च] वंदिता विज्जानिम्मियपुप्फयविमाणारूढा कच्छ-महाकच्छाणं तं सामिणो पसायमुवदंसेत्तु गया विणीयनयरीए । तओ भरहस्स साहियसरूवा तहेवाऽऽगंतुं वेयड्ढपव्वए विज्जाहररायाणो जायत्ति ।
सामी वि संवच्छरोववासिओ विहरंतो पत्तो कुरुजणवए हत्थिणाउरं नयरं । तत्थ य बाहुबलिपुत्तो सोमप्पहो नाम राया। तस्स पुत्तो सेज्जंसो नाम जुवराया । सो सुमिणे मंदरपव्वयं सामवन्नममयकलसेणाऽभिसित्तमहियं सोभमाणं दठ्ठे पडिबुद्धो । नगरसेट्ठिणा य सुबुद्धिणा सूरो किरणसहस्सेण तओ चलिएण पुणो सिज्जंसथिरीकएणाऽहियं सोभमाणो सुमिणे दिट्ठो । रण्णा य महंतो एगो पुरिसो महासत्तुबलेण सह जुज्झंतो सिज्जंसदिन्नसाहिज्जो तं सत्तुबलं भंजतो दिट्ठोति ।
पभायंमि य मिलिया राय - सिट्ठि - सेज्जंसा परोप्परमत्थाणत्था सुमिणे साहंति । न य तेसिं फलं जाणंति । तओ राया भणइ कुमारस्स ‘कोइ महालाभो संभाविज्जइ' । गएसु य नियनियठाणं सेज्जंसो भवणोवरिमत्तवारणठिओ सामिं तत्थ पविसमाणं दद्धुं चिंते 'कहिं मए नेवत्थमेरिसं दिट्ठि (ट्ठ) पुव्वं
जारिसं पडिपियामहस्स' ।
खणंतरेण य संजायजाइसरो भगवओ ललियंगयाइभवे वइरनाहपज्जंते अप्पणो निन्नामियाइभवे सारहिपज्जंते म(स)रिऊण तहा वयरसेणतित्थयरलिंगं, 'वइरनाहो भरहे पढमतित्थयरो भविस्सइ 'त्ति तब्भणियं च सुमरिऊण सम्ममवगच्छइ जहे सो सो भगवं 'ति ।
तव्वेलाए य तस्स मणूसो इक्खुरसभरियघडएणोलग्गाए पविट्ठो ताव [तं] घेत्तुमुट्ठिओ । सेज्जंसो भणइ - 'भगवं ! गेण्हसु जइ एवं (यं) कप्पइ' । सामिणा वि 'कप्पइ'त्ति नाउं पसारिएसु पाणीसु सेयंसेण य पक्खित्तो सो सव्वो वि रसो । लद्धी य सामीणं जं पाणीसु पक्खित्तं बहुयं पि न छड्डिज्जइकिं रू(तू) वरि स (सि) हा वड्ढइति ।
निक्खमणदिणाओ य
-
संवच्छरेण भिक्खा, लद्धा उसभेण लोगनाहेण ।
सेसेहि वीस (बीय) दिवसे, लद्धाओ पढमभिक्खाओ ॥ [आ.नि. ३१९]
उसभस्स उ पारणए, इक्खुरसो आसि लोगनाहस्स ।
सेसाणं परमन्नं, अमयरसरसोवमं आसि ॥ [३२०] हत्थिणउरं अओज्झा, सावत्थी चेव तह य साचे (के) यं । विजयपुर - बंभथलयं, पाडलिसंडं पउमसंडं ॥ [३२३]
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |