________________
NNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNNN
[३५८] दट्ठण मुद्धाणं फुट्टिऊण जो मरिही भएण उक्कलंबणा(उल्लंबणा?)निमित्तं निग्गच्छंतो सो तए नायव्वो सोमसम्मो' त्ति ।
तओ गयसुकुमालस्स किच्चं काऊण परिगलंतंसुनयणो कण्हो पविट्ठो [नयरं] । [तावाऽऽगओ] सोमसम्मबंभणो । मओ य सो कण्हं दट्ठण सत्तहा मुद्धाणं फुट्टिऊण । तओ कण्हेण पायकड्ढणीए नयरीपायारं भामिऊण घत्ता(ल्ला)विओ बाहिं ।
बहवे य तेण दुक्खेण जायवा पव्वयंति जिणपासे । निक्खंता य दसारा, वसुदेवविवज्जिया नव वि ॥ जिणजणणी सिवएवी, जिणसत्तसहोयरा य विक्खाया । अण्णे वि हरिकुमारा, खायजसा तत्थ पव्वइया ॥ कमलदललोयणाओ, सव्वाओ हरि-बलाण कण्णाओ । राईमईए पासे, पव्वइऊणं चरंति तवं ॥ वसुदेवबंधुवग्गो, देवई-रोहिणिविवज्जिओ सव्वो ।
संविग्गो निक्खंतो, गयसुकुमालस्स दुक्खेण ॥ भगवं पि अन्नत्थ विहरिओ त्ति । गयसुकुमालो त्ति गयं ।
धम्मभाउ-भत्तिज्जय-पोत्तया य गयसुकुमालस्स थावच्चापुत्त-सुय-सेलग त्ति थावच्चापुत्त-सुयसेलगकहा भण्णइ -
बारवईए णयरीए कण्हो वासुदेवो राया कयाइ कयालंकारो सिंहासणट्ठिओ उज्जाणवालं सद्दावित्ता एवं वयासी - 'जया भगवं अरिट्ठणेमीह समोसरिओ होज्जा तया तए मम निवेइयव्वं' । सो वि तं 'तह'त्ति पडिवज्जिऊण गओ सट्ठाणं ।
इओ य तीए चेव बारवईए थावच्चा नाम गाहावइणी अड्डा परिवसइ । तीसे य थावच्चापुत्तो नाम सुओ । सो य सव्वकलाकुसलो जोव्वणत्थो संतो थावच्चाए बत्तीसमिब्भकण्णगाओ एगदिवसेण परिणाविओ। भंजइ य सो ताहिं समं पासाओवरिसंठिओ सविसेसं विसयसुहं ।
समोसरिओ य कहा(या)इ विरह(विहर)माणो बारवईए रेवयमुज्जाणेऽरिट्ठणेमी । जाणाविओ य वासुदेवस्स तेणुज्जाणवालेणं । निग्गओ य वासुदेवो सपरिवारो णेमिणाहवंदणत्थं तहा महाविभूईए बारवइलोगो । तओ पासाओवरि संठिएणं थावच्चापुत्तेणं बारवइलोगं हल्लोप्फलीहूयं दट्ठण पुच्छिओ णियमहल्लगो – 'को भद्द ! अज्ज(ज्जू)सवो जेण(णे)स लोगो हरिसंपूलथूलेहिं(हरिसपुलंपुलेहिं) वच्चइ ?' महल्लगो भणइ - 'सामि ! न को वि । परं अज्ज बाहिं अरिट्ठनेमी तित्थयरो अइसयनाणी समोसरिओ। तव्वंदणत्थमेसो लोगो जाइ' । तओ तं सोउं थावच्चापुत्तो महाविभूईए गओ भगवंतवंदणत्थं, उवविट्ठो य भत्तीए वंदित्ता पुरओ । भगवया वि कया वासुदेवाईणं थावच्चापुत्तस्स य संवेगजणणी धम्मदेसणा । तं च सोउं थावच्चापुत्तो वंदित्ता भणइ – 'भगवं गेण्हिस्सामि पव्वज्जं जाव म्म(माउ)गमापुच्छामि' । भगवया भणियं - 'पुज्जंतु ते समीहियमणोरहा' ।
तओ थावच्चापुत्तो पविठ्ठो नयरीए । संपत्तो नियघरं । विण्णवेइ य पाएसु पडिऊण मायरं -
