Page Text
________________
[३५२]
---
----NNNNNNNNNNNNNNN
वेसमणो वि य तीसे, देहं सक्कारिऊण गहियट्ठा(ट्टी) । थूभं काउं वरिसिय,-कणगेणं जाइ नियथाणं ॥ पज्जुन्नाईण तओ, पुच्छंताणं कहेइ वसुदेवो ।
कणगवईए चरियं, जमासि वेसमणकहियं ति ॥ दमदंती-कणगवइ त्ति गयं ॥ सुरसन्निज्झाउ य दमदंती-कणगवई व्व भेरीओ त्ति भेरीकहा भण्णइ -
बारवईए णयरीए वासुदेवस्स देवयापरिग्गहियाओ गोसीसचंदणमयाओ तिन्नि भेरीओ, तं जहा - संगामिया १, अब्भुइया २, कोमुइया य ३ । तत्थ संगामे संगामिया वाणि(इ)ज्जइ, अच्छेरयकाले अब्भुइया पूरिज्जइ, कत्तियपुन्निमाए कोमुइया वाइज्जइ त्ति ।
एत्थंतरंमि य सक्को देवमज्झे वासुदेवस्स गुणकित्तणं करेइ – 'अहो ! उत्तमपुरिसाणं गुणो जं कस्स वि अवगुणं न गेण्हंति, नीएण जुज्झेण य न जुझंति' । तं चेगो देवो असद्दहंतो आगओ । वासुदेवो वि णेमिजिणस्स वंदओ पट्ठिओ । सो य देवो अंतरा कालसुणयरूवं मयगं विउव्वइ । सो य अईव दुग्गंधेण लोगमभिभवंतो वासुदेवेण दिट्ठो । भणियं चऽणेण - 'अहो ! कालसुणहस्सेयस्स पंडरा दंता सोहंति' । तओ आसहरियवेसं काऊण देवेण हरियमासरयणं वासुदेवस्स । तं च जाणित्ता तस्स पिट्ठओ धाविया रायाणो । जित्ता य देवेण । तओ सयमेव णिग्गओ वासुदेवो भणइ - 'कीस मम आसरयणं हरसि ?' । देवो भणइ - 'मं जुज्झे पराजिऊण गेण्ह' । वासुदेवेण भणियं - 'सोहणमेयं । किंतु तुम भूमीए, अहं रहेण । ता रहं गेण्ह' । देवो भणइ - 'अलं मे रहेण' । एवं आस-हत्थिणो वि निसेहंतो बाहुजुज्झयाइं पि सव्वाइं पडिसेहित्ता भणइ – 'मे सुंद(सुद्द?) जुझं देहि' । वासुदेवो भणइ – ‘पराजिओऽहं । णेहि आसरयणं । नाऽहं नीयजुज्झेण जुज्झामि' ।
तओ देवो तुट्ठो भणइ – 'वरं वरेहि' । वासुदेवो भणइ – 'संपयं सोवसग्गा बारवई सा [निरुवसग्गा कीरउ । देहि मे] असिवोवसमणि भेरिं । देवो वि तं दाऊण गओ णियठाणं । तीसे य भेरीए छण्हं छण्हं मासाणं वाइज्जतीए जो सदं सुणइ तस्सोवसग्गा पुव्वुप्पणगा नासंति नवा य छम्मासे जाव न हवंति ।
___ अण्णया को वि धणड्डो वाणियओ पसिद्धिं सोऊण वाइयाए भेरीए देसंतराओ तत्थाऽऽगओ । सो य अईव दाहज्जरेणाऽभिभूओ भेरीपालं भणइ – 'गेण्ह तुमं दव्वलक्खं । मम पुण भेरीखंडं कहि(रि)त्ता ब(प)लमेत्तं देहि' । तेण लोभेण दाउं तत्थऽण्णचंदणविग्गलया दिन्ना । एवं अन्नन्नस्स वि तहा दिंतेण सा चंदणकंथा कया ।
अण्णया य असिवे वासुदेवेण सा तडाविया । जाव तं चेव सभं न पूरेइ । तओ वासुदेवेण भणियं - 'जोइह भेरि' । गंतुं च जोइया जाव दिट्ठा कंथीकया । तओ सो भेरीवालो वावाइओ । अण्णा य भेरी अट्ठमभत्तेणाऽऽराहइत्ता देवपासाओ लद्धा । अन्नो भेरीवालो कओ । सो आयरेण तं रक्खंतो वासुदेवेण पइओ त्ति । भेरि त्ति गयं ।
सुप्पसिद्धा य भेरि व्व वेज्ज त्ति वेज्जकहा भन्नइ -
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |