Page Text
________________
NNNNNNNNNNNNNNNNNNNNNNNNNNNN
[३२८] वेरमुव्वहंता राईए असिहत्था साहुणो हंतुमागया जक्खेण थंभिया । ते य पहाए लोगेण दिट्ठा । तओ मायापियरो विलवंता सिग्घमागया संता जक्खेण वुत्ता - 'साहूणं वहं कुव्वंता 'एए मए थंभिया । ता जइ सव्वे वि जिणसासणे पव्वज्जं करेह तो मुंचामि । अण्णहा नत्थि एएसिं मोक्खो' । तेहिं भणियं - 'गिहिधम्मं [करिस्सामो, साहुधम्मं] पुण अइदुक्करं ण सक्कामो काउं' । एवं मन्निए जक्खेण मुक्केहि सावगधम्मो तेहिं गहिओ । माया-पियरेहिं पुण न किंचि जिणभासियं पडिवन्नं ।
तओ अग्गिभूइ-वाउभूइणो गिहिधम्ममणुपालिऊण सोहम्मे कप्पे छप्पलिओवमाउगा देवा जाया । तओ चइऊण हत्थिणाउरे अरिहदासवाणियगस्स पुण्णभद्द-माणिभद्दा नाम सुया जाया । पुव्वभवब्भासेण य जिणसासणे अणुरत्ता सावगधम्म पडिवन्ना । अन्नया तत्थ महिंदो नाम साहू आगओ । तस्स समीवे य अरहदासो सेट्ठी धम्मं सोऊण पव्वइओ । ते वि पुण्णभद्द-माणिभद्दा रहारूढा मुणिवंदणत्थं चलिया । मग्गंतराले य चंडालं सुणहियं च नेहविहुरहियया पेच्छिति । तओ गंतूण भयवओ समीवं वंदित्ता पुच्छंति - 'भयवं ! को एस चंडालो ? का य सुणहिया ? जेण ते दटुं अम्ह मणो नेहाउलं जायं ?' तओ मुणी अइसयनाणेण नाउं भणइ -
_ 'जो तुम्ह अग्गिभूइ-वाउभूइभवे सोमदेवो नाम बंभणो पिया आसि सो मरिऊण इहेव जंबुद्दीवे भरहे खेत्ते संखउरपट्टणे जियसत्तू नाम राया परदाररइप्पिओ जाओ । तह अग्गिला वि तुम्ह माया मरिऊण तत्थेव संखउरे सोमभूइबंभणस्स रुप्पिणी णाम भज्जा जाया । सा य जियसत्तुणा आसवाहणियानिग्गएण सभवणंगणे दिट्ठा । तओ तीए रूवे मुच्छिएण सोमभूइणो अलियावराहं उप्पज्जाविय सा बंभणी अंतेउरे छूढा । सो बंभणो पियाविओए अरइसंतत्तो अच्छइ । राया वि एगंतरइपसत्तो वाससहस्सं भोए भोत्तुं नरगं गओ । तओ तिण्णि पलिओवमाइं आउं भोत्तुं उव्वट्टो हरिणो जाओ । तओ वाहेण निवाइओ मओ सेट्ठिसुओ जाओ । कूड-कवडेहिं तिरियाना(णा)ऽऽउं बंधित्ता हत्थिकुले जाओ । तस्स य तहाविहभवियव्वयाए जाईसरणं जायं । तओ अणसणं काउं अट्ठारसमए दिवसे मओ तिपलिओवमाऊ देवो वेमाणिओ जाओ । तओ चइऊण इहेव हत्थिणाउरे एसो डुबो जाओ । सा य रुप्पिणी बंभणी संसारं भमिऊण एसा सुणही जाया' ।
तओ मुणिभणियमिमं सोऊण जायजाईसरणेहिं पुण्णभद्द-माणिभद्देहिं पुव्वभववुत्तंतं कहिऊण पडिबोहिओ चंडालो । तओ सो वेरग्गं गओ मासमेत्तमणसणं काऊण नंदि( दी )सरे देवो जाओ । सुणही वि तेहिं तहेव पडिबोहिया अणसणं काउं तत्थेव सदसणा णाम रायदहिया जाया । तओ पणो वि कालंतरेण से(सो) चेवाऽऽगओ महिंदसीहसाहू । तओ पुण्णभद्द-माणिभद्देहिं चंडालसुणहीणं गई पुच्छिओ । तेणा वि जहावित्तं कहियं । तेहिं पुणो वि रायधूया पडिबोहिया संती पव्वज्जं काउं देवलोगं गया । ते वि पुण्णभद्दमाणिभद्दा दुक्करं सावगधम्म काउं देवा सोहम्मे इंदसामाणिया जाया ।
तओ चुया हत्थिणाउरे वीससेणराइणो महु-केढवाहिहाणा पुत्ता जाया । नंद(दी)सरदेवो वि चुओ किंचि संसारं हिंडित्ता वड्डपुरे वीससेणो त्ति वा कणयप्पहो त्ति वा णामेण राया जाओ । सुदंसणादेवी वि तओ चुया संसारं भमिय चंदाभा णाम तस्स देवी जाया । तओ विस्ससेणो निविण्णकामभोगो महं रज्जे ठविऊण केढवं च जवरज्जे, तवं काउं दिवं गओ । तओ मह-केढवेहिं सव्वा मही वसीकया पालिया य ।
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |