Page Text
________________
-
-
-
-
-
-
-
-
-
-
-
-
-
-
-
-
-
-
--
[३२३] वेसमणो वि य देवी-विरहत्तो; दटुं तं जायं । णेहेण कणयवरिसं, काउं रायंगणे जाइ । तो पिउणा कयनामा, कणगवई जायजोव्वणा तीसे । वीवाहत्थं रइओ, सयंवरामंडवो तत्थ । संपत्ता रायाणा, बारवईओ य जायवा के वि । कणगवईए वरिउं, तेसिं मज्झे य वसुदेवो ॥ वेसमणो वि जिणमहे, महाविदेहे सपरियणो गंतुं । सक्केण समं वंदिय, विमलजिणं पुच्छए - 'भयवं !! जा मम देवी चविउं, जाया भरहंमि कणगवई णामा । सा सिज्झिस्सइ णो वा ?', भणइ जिणो – 'ऽणेण जम्मेणं' ॥ तो परियणेण भणिओ, वेसमणो – 'दरिस कणगवइमम्हं' । सो वि ते घेत्तु पत्तो, सयंवरामंडवे व(तु)रियं ॥ वसुदेवस्स निवेयियवीवाहा वेत्तु जाइ णियठाणं ।
वसुदेवो बारवई, कणगवई घेत्तु पत्तो त्ति । एवं च समिद्धाए बारवईए अच्छंतस्स कयाइ कण्हस्स दंसणत्थं नारओ आगओ । सो कण्हं दटुं अण्णे य दसारे तओ सच्चभामाए अंतेउरं गओ । तीए आदरिसगगिहगयाए सव्वालंकारभूसियमप्पाणं पेच्छंतीए वक्खित्तचित्ताए सो आगच्छंतो न उब्भ(अब्भु?)ट्ठिओ । तओ कुविओ निग्गओ । चिंतियं चऽणेण जहा – 'अद्धभारहरायंतेउरणारीओ अब्भुट्ठाण-अग्घदाण-वंदणाइणा मं पूएंति । एयाए पुण रूव-जोव्वणगव्वियाए दिट्ठिदाणमेत्तेणाऽवि न सम्माणिओऽहं । ता तहा करेमि जहा सरूवसवक्किवेहए पडइ । एवं च वियप्पंतो [गओ] नारओ जत्थ रुप्पिणि त्ति । रुप्पिणिकहा भण्णइ -
इहेव भरहत्ते मगहादेसे लच्छिगामे सोमदेवो नाम बंभणो । तस्स लच्छिमई णाम भज्जा । तीए य कयाइ बाहिमुज्जाणगयाए दिट्ठो मयूरंडओ । सो य कुंकुमपिंजरियहत्थेहिं परामुसिओ त्ति वण्णंतरं गंधंतरं च परिणओ परिहरिओ माऊए । तहा वि भवियव्वयाए य वरिसियमहोदएणोहलिओ सहावत्थो । सोलसघडिगोवरि पुणो संगोविओ मऊरीए जाओ समयंमि सुरूवो मे(मो)रुल्लओ । सो य पुणो कह वि तत्थाऽऽगयाए लच्छिमईए रमणीओ त्ति घेत्तुं करुणं कुव्वंतीए वि मयूरीए जणसमक्खं बला नीओ सगिहं । खाणपाणा सुहिओ य पंजरत्थो काउं तहा सिक्खविओ जहा सण्णिओ वास(चारु) नच्चइ। सा य तस्स माया विरसमारसंती तप्पएसं न मुंचइ । तं च दटुं भणिया जणेण बंभणी – 'मुद्धे ! किमिमिणा निरुद्धण जस्सेवं माया विलवइ ?'
तओ संजायाणुकंपा सोलसमासंते समुट्ठियकलावं जोव्वणत्थं तं मोरं णेऊण मुंचइ तत्थेव ठाणे । बद्धं च तप्पच्चयं पमायविसेसओ तीए बंभणीए सोलसवरिसपरिमाणं पुत्तविओयवेयणिज्जं कम्मं ति ।
अण्णया सा जोव्वणुम्मत्ता अप्पाणं मंडंती आरिसयंमि जोएइ । एत्थंतरंमि य भिक्खाणिमित्तं पविट्ठो घरे समाहिगुत्तो नाम तवस्सी । दिट्ठो य बंभणेणं । भणिया य सा – 'देहि एयस्स भिक्खं' । इओ य केणइ बाहिं हक्कारिओ बंभणो गओ य । तीए वि 'थुथु'त्ति काऊण फरुसवयणेहिं नीसारिओ साहू ।
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |