Page Text
________________
[२९८] तओ सुप्पकस्स सुओ पिउस्सियाओ हयाओ नाउमागओ महादुममज्झेण वच्चंतं कण्हं हंतुमारद्धो । सो वि तेहिं चेव तरूहिं भू(चू?)रित्ता विणासिओ ।
तओ सोऊणेवमुवद्दवं वसुदेवेण रामो नंदस्स अप्पिओ । 'एस ते बीओ पुत्तो, कण्हस्स य उवज्झाओ भविस्सइ'त्ति । सिक्खियाओ य तदंतिए कण्हेण धणुव्वेयाइयाओ सव्वाओ कलाओ । एवं च तत्थ रूवाइगुणपूइएहिं रामकण्हेहिं सव्वो वि गोवीजणो रंजिओ त्ति ।
कण्हपरोक्खनमिजिणाओ य पंचवरिसलक्खेहिं बावीसइमो अरिठ्ठनेमिजिणो त्ति अरिट्ठणेमिजिणकहा भण्णइ -
'एक्काए विंझाडवीए धणावहो णाम पल्लीवई । तस्स धणो णाम पुत्तो । सो य कयाइ पंथ(थे) विज्झमागयस्स मुणिचंदसाहुणो सयासे धम्मं सोच्चा पिएणाऽणुचरेण सह पव्वइओ सोहम्मे देवो जाओ। तओ चुओ वेयड्ढे कंचणपुरे सूररायस्स चित्तगई णाम विज्जाहरराया साणुध(च)रो जाओ । दमधरमुणिसयासंमि य विहियपव्वज्जो माहिंदकप्पे देवो संजाओ । तओ चुओ अरविदेहे सीहउरे अवराइओ णाम राया साणुचरो जाओ । विहियपव्वज्जो अ समुप्पण्णो आरणकप्पे देवो । तओ चविऊणिहेव भरहवासे हत्थिणाउरे सिरिसेणरायपुत्तो सिद्धत्थो णाम राया साणुचरो जाओ । तओ समं चिय वीयसोगगुरुसमीवे विहियपव्वज्जो अवराइयविमाणे देवो जाओ ।
'तओ सिद्धत्थदेवो कत्तियकिण्हबारसीए चविऊणिहेव जंबुद्दीवे भारहे वासे सोरीपुरीए हरिवंसे समुद्दविजयस्स रण्णो सिवादेवीए चोद्दससुमिणसूइओ संभूओ गब्भे । तओ सावणसुद्धपंचमीए जाओ वरिससहस्साऊ कसिणवण्णो पुत्तो । गब्भगयस्स य भगवओ माऊए सुमिणे महामहसमुप्पयंती दिट्ठा चक्कधारा । सा य रिट्ठा रिट्ठरयणमया णेमिसन्ना य । तेणेसो पइट्ठिओ पिउणा रिट्ठणेमी अरिट्ठणेमी वा नाम ।
अणुचरदेवो वि तओ भ(च)विऊणुग्गसेणस्स रण्णो भणिस्समाणा भविस्सइ धीया राईमइ त्ति ॥ तओ महुराए णारएणाऽऽगंतुं निवेइए नेमिकुमारजम्मे वसुदेवाईहिं विहिओ परमाणंदो त्ति ।
अह अण्णया कंसेण पुच्छिओ णेमित्ती – 'किं सो मुणिसावो विसंवइओ ?' सो भणइ - 'तहट्ठिओ चेव' । तेण वुत्तं - 'को पच्चओ ?' सो भणइ – 'जो अरिठं नाम वसभं महाबलं, केसिणाम च दुद्धरिसं महाकायखरं, सुदारुणमस्समेए कीडंतो विंदावणे विणासिस्सइ; महाजु(ज)मलदुममुम्मूलिस्सइ, कंचणपट्टबंधं च गंडीवमुग्गसेणगिहे ठियं चडाविस्सइ; कालियनागं च नत्थित्ता वाहिस्सइ; तहा पउमुत्तरचंपगहत्थिणो चाणूरमल्लं च जो वहिस्सइ तओ ते भयं' । सोउं चेमं कंसेण णिउत्ता तज्जाणणत्थं पच्चइया पुरिसा ।
अण्णया सरयकाले कीलंतस्स विंदावणमज्झे कण्हस्स जणं महंतो सम्मुहमागओ अरिट्ठवसहो । सो य सिंगेसु घेत्तूण वलियखंधरो निहओ कण्हेण । तहा तत्थेवाऽऽगओ विदारियमुहो केसिखरो सुदारुणो । सो य वज्जसारं बाहुकोप्परं मुहे छोढूण विणासिओ । तओ सोऊणेवं कण्हस्स बलपरक्कम कंसो सभाए गंडीवं ठवेइ । तस्स य रक्खवालियं निरूवेइ णियं भगिणिं सच्चभामं । तओ धणुमहे वट्टमाणे मयणवेगापत्तो अणाहिट्ठी णाम कण्हभाया गोउलमागओ आणंदिओ कण्हेण ।
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |