________________
[२८६]
तत्थ य पहावईए, जणयस्स समप्पिओ य सो तीए । गंधारपिंगलेण य, सुहदिवसे सुया तस्स ॥ दिन्ना पहावई सा, पाणिग्गहणं(ग्गहणेण?) सोहणे दिवसे । वित्तं सुहंसुहेण य, अच्छइ भोए य भुंजतो ॥ अह अण्णया पसुत्तो, अवहरिओ सुप्पगेण गयणेण । पडिबुद्धो तं पहणइ, मुट्ठीए; उज्झिओ तेण ॥ गोदावरीए नीरं, तरिउं नयरे गओ य कोल्लयरे । पउमरहरायतणयं, परिणइ पउमसिरिं तत्थ ॥ चंपासरे य पडिओ, अवहरमाणस्स नीलकंठस्स । हरिवंसकित्तणेण य. तत्थ य दहियं अमच्चस्स ॥ लद्धं परिणइ सउरी, कीलंतो तत्थ सलिलकीलाए । हरिओ य सुप्पगेणं, पडिओ गंगाजले विउले ॥ विलवंतो मोहेणं, अडवीमज्झे अमच्चदुहियत्थं । भमिऊण तयं रन्नं, सह पहिएहिं गओ पल्लिं ॥ तस्स य पल्लीवइणो, दुहिया खामोयरी जरा णाम । सउरिस्स देइ अह सो, तं कण्णं सोहणदिणंमि ॥ जणयइ जराकुमारं, सो तीए; अन्नया य परिणेइ । नामं अवंतिसुंदरि-कन्नं तह सूरसेणं च ॥ जीवजसं वि य तत्तो, सो परिणेइ पुरिसवेसिणि कण्णं । इयएवमाइयाओ, नरवइदुहियाओ पवराओ ॥ वीवाहेउं पत्तो, कोसलदेसंमि तत्थ वसुदेवो । पच्छण्णदेवयाए, भणिओ – 'हो पुत्त ! वसुदेव ! ॥ रोहिणिकण्णा दिण्णा, सयंवरामंडवे मए तुज्झ । वाएज्जसु तत्थ तुमं, तीए य कए पहुं पडह' ॥ कुमरो वि मण्णिऊणं, 'तह'त्ति पत्तो पुरंमि रिट्ठउरे । नरनाहाणावासे, तूरियमज्झे ठिओ सुणइ ॥ घोसणयमिमं - 'कल्ले, मित्तादेवीए रुहिररायस्स । धीयाए रोहिणीए, सयंवरामंडवो होही ॥ तत्थ य नरनाहेहिं, सव्वेहि समागमो उ कायव्वो' । तत्तो तहेव पत्ता, बीयदिणे तत्थ नरनाहा ॥ पडहं सउरी वि वरं, जलहरसरनिस्सणं गहेऊण । तूरियनराण मज्झे, सयंवरामंडवे पत्तो ॥ एत्थंतरंमि पत्ता, निरुवमसिंगारगहियनेवत्था । तत्थेव सपरिवारा, रोहिणिकण्णा पवररूवा ।।
