________________
[२८४]
बंधाओ मोइओ सो, खयरथेरेहिं झगडए तेसिं । संजाओ ववहारो, नयरीए वेजयंतीए ॥ बलसीहनिवसयासे, दोण्ह वि तेसि; तओ य अरिपक्खो । मिलिओ य नीलकंठो, सुप्पग-अंगारगा तह य ॥ कु(क)लहंमि गा(ता)ण पुरओ, भणियं अह तेण – 'जणणि-जणएहिं । सोमसिरी मम दिण्णा, परिणीया एवमेएणं ॥ बीयं सहोयरा वि य, वेगवई चोरियाए पडिवन्ना । बल-सोहग्गपमत्तो, अवमण्णइ खयरनाहे वि' ॥ भणियं च जायवेण वि, – 'एसा जणएहिं मज्झ परिदिण्णा । एएणं अवहरिया, सोमसिरी मज्झिमा भज्जा ।। जा पुण इमस्स भइणी, वेगवई सा वि मम जहा जाया । तह तुब्भे परिजाणह, सव्वे धम्माहिगारि'त्ति । एवं च सउरिणा सो, विणिज्जिओ जाव तत्थ ववहारे । खग्गं समुक्खिवित्ता, पहरेउं ताव पारद्धो । जाया य दुहा सव्वे, समच्छरा तक्खणेण ते खयरा । पारद्धा पहरेउं, अवरोप्परविहियजयचित्ता ॥ एत्थ य अंगारवई, दिव्वधणुं देइ वेगवइमाया । र(प)णमेत्तुमक्खयसरं, भत्थयजुयलं च सउरिस्स ॥ एक्को बहवेहिं समं, संजाए परमआहवे जाव । पहरइ दिव्वत्थवरो, पहावई भा(ता)व संपत्ता ॥ पण्णत्तिं वरविज्जं, चिंतियमेतत्थसाहहिं(मेत्तत्थसाहणि) देइ । जायवसीहस्स तओ, [उ]प्पइओ सो वि आयासं ॥ विज्जाहरा य तत्तो, सपरियणा नीलकंठमाईया । पहरेउं पारद्धा, विणिज्जिया सउरिणा सव्वे ॥ माणसवेगो वि तओ, पहरंतो आहवंति(मि) संकुद्धो । कुणइ महंतं समरं, वरकलिओ जायवेण समं ॥ पण्णत्तिपहावेण य, विणिज्जिओ सो वि दिव्वसत्थेहिं । बद्धो य पलायंतो, सोमसिरीए समीवंमि ॥ उवणीओ खयरवई, जणणीए तत्थ पुत्तभिक्खं सो । जाएउं मोयविओ, आणावत्ती य संजाओ ॥ सोमसिरिअणुमएण य, महापुरं जायवो सहपियारो । माणसवेगेणं सो, नीओ रविपहविमाणेणं ॥ मोत्तूण ससुरगेहे, सउरि अह तत्थ सोमदेवस्स । जायवविसज्जिओ सो, खयरवई णियपरं पत्तो ॥
