________________
[२७१]
लक्खण-रामा य तहा, जाया जह वासुदेव-बलदेवा । विज्जाहराण सामी, ठविओ य विहीसणो तेहिं ॥ तत्तो अरिंजयपुरं, लंकं मोत्तूण आगओ सो वि । तत्थ विहीसणराया, जाओ अह तस्स वंसंमि ॥ संखाईएसु नराहिवेसु इह अइगएसु गुणनिलओ । नामेण विज्ज(ज्जु )वेगो, जणओ सो अम्ह सव्वेसि ।। अह अण्णया य साहू, समागओ वंदिऊण नरवइणा । भणिओ - "मम दुहियाए, को भत्ता मयणवेगाए ॥ होहि ?"त्ति साहुणा वि य, भणियं - "हरिवंससेउभूयाणं । बल-केसवाण पिउणो, होही भज्जा इमा राय !" ॥ भणियं नराहिवेणं, - "नायव्वो सो पणो कह अम्हेहिं ?" । मुणिणा भणियं - "निसुणह, जह नज्जइ सो सुहेणेव ॥ विज्जं साहेमाणस्स, चंडवेगस्स गंगसलिलंमि । रयणीए जो खंधे, निवडिज्जा तं मुणिज्जाहि" ॥ भणिऊण इमं साहू, गओ; अह अत्थि नरवई पयट्ठो(पयंडो?) । दिवितिलयनयरसामी, तिसेहरो नाम वेयड्डे ।। सुप्पगनामो य सुओ, सुप्पनहीभारियाए संजाओ । सुप्पगकएण मग्गइ, कण्णं सो मयणवेगं ति ॥ अम्ह जणओ वि एयं, न देइ तेसिं तओ पुणो तेण । बद्धो इह आगंतुं, सो जणओ अम्ह संगामे ।। अम्हे वि एत्थ नट्ठा, पडिओ खंधमि चंडवेगस्स । तं च तओ आणीओ, इह नयरे अम्ह भइणीए ॥ तो पिउमो(मे)ल्लावणियं, हियए धरिऊण मयणवेगाए । मन्नाविओ वरं जं, तस्सेसो सामि ! परमत्थो ॥ दिण्णाइं सुभूमेण य, इह अम्ह पुव्वाण जाइं सत्थाई । मंतसहियाइं तइया, गहियव्वाइं तुमे ताई' ॥ इय भणिउं सुहदिवसे, विज्जाओ देइ दहिमुहो तस्स । ससुरस्स मोयणत्थं, सउरी वि य साहए ताओ ॥ एत्तो य मयणवेगं, तिसेहरो भूमिगोयरविदिण्णं । सुणिऊण मउम्मत्तो, समागओ चंडवेगपुरं ॥ अह तक्खणेण तेहिं वि, गयणंगणगमणतुरयसंजुत्तं । सउरिस्स द(अ)हिमुहजुयं, सुवण्णतुबं रहं दिण्णं ॥ सउरी वि तंमि चडिओ, महापबंधेण जुज्झिउं विविहं । बाणेहिं छिण्णसीसं, तिसेहरं पाडइ महीए ।
