________________
[ २६५ ] एयंमि अवसरंमी, नरवइअंतेउरं समायायं । पूएत्तु इंदकेडं, चलियं च पुणो वि गेहंमि ॥ एत्थंतरंमि हत्थी, बुद्धो कुद्धो जणं विणासंतो । खंखेरिउं पवत्तो, भंजित्तु रहे अवरोहस्स ॥ गहिऊण करेणेक्कं, रायकुमारिं रहाओ सो हत्थी । सरणं मग्गेमाणी(णि), निवाडए महियले रुट्ठो ॥ दट्ठूण जायवो तं, वेगेणुद्धाइओ ओहुत्तं । सो वि करी तं मोत्तुं, जायवहुत्तं तओ चलिओ ॥ अह जायवो वि दक्खो, चक्काइद्धं तं करिं तत्थ । भामेइ पुंछगहियं करेण हंतुं कडिपएसं ॥ परिसमिऊण गयं तं, तओ सो जायवो गहियकन्नो । पासायंमि पविट्ठो, परिमोहियकुंजरो सहसा ॥ वसुदेवो वि य भवणे, कण्णं ठविऊण तत्थ पवणेण । आसासइ कंपंतं, लहिऊण चेयणं सा वि ॥ नीससिऊण सबाहं, गेण्हइ लज्जेण याऽवियसिऊणं । वत्थस्स अंगु (च) लेयं, सउरिकराओ पमोएणं ॥ धाईओ य अमच्चो, दुवारपालो य गेण्हिउं ताहे । सउरिंमि निग्गयंमी, कन्नं अंतेउरं निति ॥ वसुदेवो वि सससुरो, आगंतुं ससुर - माउलजणेण । नीओ य रहवरेणं, कुबेरसच्छाहभवणंमि ॥ ण्हाय-जिमिओ-विलित्तो, सव्वालंकारभूसिओ तत्थ । जावऽच्छइ पडिहारी, समागया ताव नरवइणो ॥ जयसद्दासीवायं, दाऊणं जायवस्स सा ईसिं । वियसंतवयणकमला, कयंजली महुरवाणीए ॥ भणइ वसुदेव' मेसो, तुम्हेहिं सोमदत्तनरनाहो । विन्नाओ च्चिय देवी, एयस्स य पुन्नचंदो (दा) ति ॥ जेट्ठो य तीए पुत्तो, नामं भूरिस्सहो य बलकलिओ । सोमसिरी इव सोमा, सोमसिरी कण्णगा धूया ॥ पिउणा य तीए दिन्नो, सयंवरो आगया य नरनाहा । बल-भूय (रूव) - कंतिकलिया, नानाविहदेसजा सव्वे ॥ सोमसिरी वि य पेच्छइ, पासायतलट्ठिया समुज्जोयं । सव्वाणसाहुनाणो (णे), तियसाण समागयात्थ ॥ सोयविहुरा य तत्तो, मुच्छावसमुवगया इमा बाला । तं दियहं पइ काउं, ठिया य मूणव्वयं गहिउं ॥
