________________
[२५०]
गहिऊण ताणमेक्कं, वलयं सहसा विमोक्खिओऽम्हेहिं । नामंकिएण पच्छा, पुणो वि संरोहिओऽण्णेणं ॥ संजीवणिवलएण, पावियसण्णो य आह सो खयरो । 'सिवमंदिरं ति नयरं, दाहिणसेढीए वेयड्ढे ॥ राया खयराहिवई, नामेण महिंदविक्कमो तत्थ । तस्स सु[ओ]ऽहं नामं, अमियगई रायसीहस्स ॥ अह अण्णया कयाई, हिरिमंथनगंमि सह वयंसेहिं । कीलंतो संपत्तो, धूमस्सिह-गोरमुंडेहिं ।। तत्थ य हिरण्णरोमो, मम मामओ तावसो सुया तस्स । सुकुमालिय त्ति णामं, उदन(ग्ग)वरजोव्वणा कण्णा ॥ तं ससिरेहं व अहं, दटुं कामाउरो दढं जाओ । हियएणं वहमाणो, पत्तो तं निययनयरंमि ॥ एसो मम अणुराओ, सिट्ठो जणयस्स अह वयंसेहिं । सो वि सुकुमालियं लहु, वरित्तु परिणावइ ममं ति ॥ तीए समं पंचविहे, भोए भुंजामि अण्णया खयरो । धूमसिहो मम महिलं, अभिलसमाणो मया नाओ ॥ वियरामि तहा वि अहं, सव्वत्थ अह ससं(मं) पुणो तीए । बद्धो य इह पमत्तो, नीया सुकुमालिया तेण ॥ तुम्हेहिं संपयमहं, विमोइओ चारुदत्त ! ता कहसु । जं इह किल कायव्वं, होइ मया तुम्ह बंधूणं' ॥ भणिओ य मया – 'सव्वं, जायं अह तुम्ह दंसणे अम्ह' । संभासिऊण अह सो, उप्पइओ गयणमग्गेणं । अम्हे वि नियणयरं, समागया एत्थ कीलमाणा य । चिट्ठामो संपत्तो, तत्तोऽहं जोव्वणं समए । सव्वत्थमाउलस्स य, मित्तवई णाम जणणि-जणएहिं । दुहिया मज्झ कएणं, उवणीया सोहणदिणंमि ॥ आसत्तो य कलाहिं, न सुट्ठ भुंजामि तत्थऽहं भोए । जणणि-जणएहि ताहे, कलिओ जह 'एस मुद्धो'त्ति ।। 'न मुणइ कामवियारे', समप्पिओ तेहिं ललियगोट्ठीए । वियरामि तेहिं सहिओ, जहिच्छियं काणणाईसु ॥ कालिंगसेणदुहिया, अहऽत्थि वेसा वसंतसेण त्ति । विणय-गुण-रूव-जोव्वणकलिया लच्छि व्व पच्चक्खा ।। बारसवरिसेहिं मया, तीए सह सुह-विलासनयणाए । अवियाणिया य सोलस-सुवण्णकोडीओं भुत्ताओ ।
