Page Text
________________
[२३७]
NNNNNNNNNNNNNNNNNNNNNNNNNNNNNNNNNNNNN
सा वि य वणमाला तंमि समए रायाणमवलोयतं दट्ठण कामग्गिसंपलित्ता जाय त्ति । ताव सुमइमंतिणा अत्तेई णाम नियपसाइया कहियरायरहस्सा तीसे समीवं पेसिया । दट्ठण य तीए सा जलरहियमच्छलिय व्व तल्लुवेल्लिं कुणमाणी पुव्वपरिचयओ पुट्ठा – 'पुत्ति ! किमेवं दुक्खिया दीससि ?' वणमालाए भणियं - 'अज्जे ! किं कहिएण जत्थ परित्ता काऽवि णत्थि ?' तीए भणियं - ‘मा पुत्ति ! एवं वयाहि । अत्थि सव्वा वि मम सत्ती । ता कहेहि नियसमीहियं' । ताहे सब्भावागया कहेइ रायसंभोगमणोरहे । पुणो वि भणिया तीए – 'पुत्ति ! केत्तियमिमं पओयणं ? तहा करेमि मंतोसहि-तवोबलेहिं जहा अज्जपओससमए तुह समीहियं संपज्जइ' । तओ ‘एवं होउ'त्ति वणमालाभणिए गया मंतिणो समीवं पव्वाइया । दिण्णो य तस्स तीए भरोसगो । मंतिणा वि रण्णो ।।
तओ समागए पओससमए गंतूण अत्तेईए पव्वाइयाए गलगज्जिपुव्वगं भणिया वणमाला – 'एहि पुत्ति ! जेण संपाडेमि तुह नराहिवं' । तओ ‘एवं करेमि'त्ति भणंती कामपरव्वसा वणमाला नीया तीए, समप्पिया रण्णो । तप्पभिई च राया तीए सह मज्जपाणनिरओ विविहभोगे भुंजइ त्ति ।
इओ य वणमालाए भत्ता वीरगो तमपेच्छंतो सोगाभिभूओ 'वणमाले ! कत्थ गयाऽसि'त्ति विलवंतो भुक्ख-तिसाभिभूओ बहुडिंभपरिवारिओ गहिल्लवो सो तीए चेव णयरीए हिंडंतो कयाइ मत्तवारणगोवविठ्ठहिं वणमाला-सुमुहेहिं दिट्ठो । तओ जाव – 'अहो केरिसो विसयाण परिणामो ?'त्ति चिंतेता दो वि जायसंवेगा चिट्ठति ताव तक्कालपडियविज्जुणा विणासिया । तओ कालं काऊण इहेव जंबुद्दीवे हरिवरिसखेत्ते जुवलाहम्मिया हरि-हरिणीनामगा जाया भोगे भुंजंता चिट्ठति ।
इओ य सो वीरगो तहा अकामनिज्जराए मरेत्ता किब्बिसिओ देवो जाओ ।
दिण्णोवओगो य ओहिणा तं पुव्ववेरियं हरि-हरिणीजुवलगं दट्ठण कुविओ निरुवक्कमाउयं ति हंतुमसमत्थो चिंतेइ – 'तहा करेमि जहा जम्मंतरे दुग्गइं जाइ' । तओ चित्तरसकप्परुक्खसहियं तं जुवलगं घेत्तुमिहेव जंबुद्दीवे भरहखेत्ते सीयल-सेयंसतित्थयरंतरकाले अंगदेसे चंपाए णयरीए समागओ । तत्थ य तंमि चेव समए चंदकेऊ णाम राया अपुत्तो विट्ठो त्ति कट्ट लोओ जाव अण्णं रज्जारिहं गवेसंतो चिट्ठइ ताव बाहिरुज्जाणे ठविय तं मिहुणगं आगासत्थेण भणियं वीरगदेवेण – 'भो भो ! तुम्ह णिमित्तं राया हरी णाम हरिणीदेवीसहिओ मए बाहिरुज्जाणे आणीओ चिट्ठइ । सो य तुम्हेहिं सरिसा(सहिया?)णीयसव्वरिउरुक्खफलसमण्णियं बहुविहसावज्जपक्खिजीवमंसमणवरयं भुंजावेयव्वो । तओ समुच्छ(च्छि)ण्णेसु तेसु रुक्खेसु केवलमज्ज-मसभत्त-पाणासतो(णो) धारेयव्वो' ।
___ ताहे लोएहिं देववयणाणंतरमेव आणित्तु उज्जाणाओ महाविभूईए अहिसिंचित्ता हरी रज्जंमि तहेव पडियरिउमारद्धो । वीरगदेवो वि देवसत्तीए तस्स जुवलगस्स धणुसयपमाणं देहं खेत्ताणुरूवं च जीवणोवायं काऊण गओ देवलोयं । तओ हरी राया विक्खायसासणो हरिणीदेवीए सह भोगे भुंजमाणो पुहइवईनामपुत्तं जणित्ता निद्धम्मो बहुपावकम्मकारी मरिऊण गयो दुग्गइं । एवं च हरिवरिसाणीयस्स हरि-हरिणीजुवलयस्स पुरओ संतईए जाओ हरिवंसो त्ति ।
तओ तत्थाऽहिसित्तो जणेण रज्जंमि [हरि-]हरिणीपुत्तो पुहइवई । तस्स वि बहुपुरिस-परंपराए जाओ सुमित्तराया । जस्स भणिओ मुणिसुव्वयसामी पुत्तो । तओ बहुपुरिसपरंपराए दक्खो णाम राया जाओ । तस्स इला नाम देवी । तीए एलो णाम पुत्तो मणोरमा य धीया । सा य जोव्वणत्था
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |