Page Text
________________
[२३६]
कोसंबीनयरीए सिद्धत्थो राया सुदंसणगुरुसमीवे विहिपयव्वज्जो जाओ अवराइयविमाणे देवो । तओ भद्दवयसुद्धपंचमीए चविऊणिहेव जंबुद्दीवे भारहे वासे, मिहिलाए नयरीए विजयस्स रण्णो वप्पादेवीए चोद्दससुमिणसूइओ संभूओ गब्भे । तओ सावणकण्हट्ठमीए जाओ दसवरिससहस्साऊ कणयवण्णो पुत्तो । गब्भगयंमि य इमंमि तज्जणणीपहावा रिउणो निवं नमिय त्ति पइट्ठिओ पिउणा सो नमी नाम । अवि य -
गब्भगए जं जणणी, रोहिज्जते पुरे रिवुनिवेहिं । मालोवरि चडणिच्छू, जाया गब्भाणुभावेण ॥ चडिया य जाव दिट्ठा, माता जणयस्स गब्भपुण्णेहिं ।
सव्वे सत्तू नमिया, नमि त्ति णामं कयं तेण ॥ पण्णरसधणूसिओ य नमिकुमारो अड्डाइयवरिससहस्सोवरि पंचवरिससहस्साणि जाव कयरज्जो. [लोयंतियदेवविन्नविओ आसाढबहुलणवमीए णिक्खंतो नवमासोवरि य मिहिलाए सहसंबवणे चेव] मिगसिरसुद्धएक्कारसीए संपत्तकेवलो पउमलंछणो वाम-दाहिणपासेसु गंधारिदेवी भिंगिरिडिदेवपज्जु[वासिज्ज] माणो मुणिसुव्वयतित्थपल्लट्टणेण पवत्तियनियतित्थो समेयसेलसिहरे वइसाहकण्हदसमीए सिद्धो त्ति । नमिजिणो त्ति गयं ॥
रामंमि(नमि?)जिणकालंमि य दसमो हरिसेणचक्कवट्टि त्ति हरिसेणचक्कवट्टिकहा भण्णइ -
इहेव जंबुद्दीवे भारहे वासे कंपिल्लपुरे महाहरी राया । तस्सा मेरानामिगाए देवीए चोद्दससुमिणसूइओ हरिसेणो णाम पुत्तो । सो य पुत्तो(न्नो)दएण समुप्पणचक्काइरयणो छक्खंडं भरहं भोत्तुमंते विहियपव्वज्जो सिद्धो त्ति । हरिसेणचक्कवट्टि त्ति गयं ।
हरिसेणचक्कवट्टि-भणिस्समाणकण्हवासुदेवाणं च विचाले एक्कारसमो जयचक्कवट्टि [त्ति जयचक्कवट्टि]कहा भण्णइ -
इहेव जंबुद्दीवे भारहे वासे रायगिहे णयरे विजओ नाम राया । तस्स वप्पगादेवीए चोद्दससुमिणसूइओ तिव्वरिससहस्साऊ जओ णाम पुत्तो । सो य बारसधणूसिओ पुण्णोदएण समुप्पण्णचक्काइरयणो छक्खंडं भरहं भोत्तुमंते विहियपव्वज्जो सिद्धो त्ति । जयचक्कवट्टि त्ति गयं ।
जयचक्कवट्टि-भणिस्समाणबंभदत्तचक्कवट्टीणं च विचाले वित्थरिओ हरिवंसो त्ति हरिवंसकहा भण्णइ -
इहेव जंबुद्दीवे भारहे वासे वच्छादेसे जउणातीरे कोसंबी णाम णयरी । तीए सुमुहो णाम राया नाएण रज्जमणुपालेइ । अण्णया समागए वसंतकाले वणदंसणत्थं गयवरारूढो राया बाहिं निग्गओ । ता सालियासेणि-नायगस्स वीरगनामस्स वणमालानामभज्जं मणोहारिणिं पासित्ता संजायाणुरागो परव्वसो विव सुमइमंतिणा दिट्ठो । पुच्छिओ य - 'देव ! किमुद्दयचित्तो दीससि ?' तओ [रण्णा वि साहिओ तस्स उज्जाणे] दिट्ठाऽबलावुत्तंतो । सुमइणा वि – 'जाणामि तमहं सालियवीरगभज्जं वणमालं णाम । ता तहा करिस्सामि जहा देवस्स सिग्घं मिलिस्सइ । न का वि हिययखडुक्का कायव्व'त्ति भणित्ता पवेसिओ णयरीए राया ।
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |