Page Text
________________
[२२६]
NNNNNNNNNNN
मरिऊण तुहनमोक्कारदाणपहावेण रायतणओ जाओ । ता तुमं मम सव्वहा सामिसालो त्ति । गेण्हसु ममेमं रज्जं त[हा] जं च करणिज्जं तमाइससु' । तओ पउमरुइणा भणियं – 'एवमिमं । किंतु अहं तुह धम्मसहाओ। पुच्छणीओ सव्वधम्मकज्जेसु, न सेसरज्जवइयरेसु' । एवं च कयववत्था दो वि धम्मपरायणा गिहत्था चेव कालं काऊणीसाणे देवा जाया ।
तओ पउमरुई देवो सुहगईसु हिंडित्ता बंभलोए देविंदो जाओ । तओ चुओ दसरहस्स रण्णो अवराइयाए महादेवीए रामदेवो नामेस पुत्तो जाओ त्ति । वसहद्धयदेवो वि सुहगईसु हिंडिऊणेसो सुग्गीवो नाम वानराहिवई जाओ त्ति ।
धण(वसु)दत्त-सिरिकंतजीवा वि गुणमईजीवनिमित्तवेरेणं संसारमणुहिंडंति । तओ सिरिकंतजीवो मिणालकुंदे नयरे वज्जकुंदस्स रण्णो हेमवईए भारियाए सयंभू नाम पुत्तो जाओ । धणदत्तजीवो वि तंमि
चेव नयरे विजयस्सुवरोहिअस्स रयणचूडाए भारियाए सिरिभूई णाम पुत्तो जाओ । तस्स य सरस्सई नाम भज्जा । तीए य सो गुणमईजीवो संसारमणुहिंडित्ता वेगवई नाम धीया जाया । तीए कयाइ जोव्वणुम्मत्ताए बाहिं काउस्सग्गट्ठियं सुदरिसणसाहुं बहुलोएण वंदिज्जमाणं दट्टण भणियं – 'अहो ! एस साहू एत्थ महेलियाए सह मए दिट्ठो आसि । संपयं सा अणेण अण्णत्थ पेसिया । अओ किं तुब्भे इमं खुद्दसाहुमभिवंदेह ?' तओ सोउमेवं लोओ विपरिणामिओ तं साहुं खिसिउमाढत्तो । तेणाऽवि साहुणा तं सोउं गहिओ अभिग्गहो – 'जाव ममेसो कलंको न समुत्तरिओ, न ताव पारिस्सामि' । तओ देवयानिओएण सूणं वेगवईए मुहं । नाऊण य साहुवइयरं सिरिभूइणा गाढमंबाडिया वेगवई । तओ सा भीयागया साहुसगासं । सव्वजणसमक्खं च तं साहुं भणिउमाढत्ता – 'भयवं ! सव्वहा निद्दोसो तुमं । परं मए दुतुंडाए अलियआलो चडाविओ । ता खमेह मे एयमवराहं, न पुणो चेवं भणिस्सामि' । तओ परितुट्ठो जणो पुणो वि सुदरिसणसाहु पूइउमाढत्तो । वेगवई य तप्पभिई चेव साविगा जाया ।
सा य साइसयरूववइ त्ति मग्गिज्जइ सयंभूपमुहेहिं रायकुमारेहिं । सिरिभूई वि तीए पिया भणइ - 'जइ सयं कामदेवो तहा वि मिच्छदिट्ठिस्स न देमि इमं कुमारिरयणं' । तओ सयंभुणाऽभिमाणिएणं रयणीए मारिऊण सिरिभूई मड्ढाए कड्डित्ता अणिच्छमाणा वि रुयंती भुत्ता वेगवई । तओ सो सविओ तीए रुट्ठाए - 'जो तुमेवं मम जणयं मारिऊण मं भुंजसि बलाक्कारेणं तस्स तुहाऽहमण्णजम्मंमि वहाय समुववे(ज्जे)ज्जा' । तओ सोउमेवं मुक्का सा सयंभुणा । तओ अरिकंताए साहुणीए समीवे गंतुं सा पव्वइया तवं च काऊण बंभविमाणे देवी जाया । तओ चुया कयनियाणा रामणस्स मरणनिमित्तमेसा सीया समुववण्णत्ति ॥
सयंभुराया वि संसारा(रं) भमिऊण कुसव्वयस्स बंभणस्स सावित्तीए बंभणीए जाओ पहासो नाम पुत्तो । सो वि जायसंवेगो विजयसेणसूरिसमीवे निक्खंतो । महातवं कुणमाणो सम्मेयसेल( ले) देववंदणत्थं महाविभूईए चलियं कणयप्पहं नाम वि[ज्जा] हररायं दट्टण नियाणं करेइ – 'जइ ममेमस्स तवस्स माहप्पमत्थि ता रिद्धिमेवंविहमहं परभवे पावेज्जा' । तओ कालं काऊण समुववण्णो सणंकुमारे देवो । चुओ य विहीसण! कयनियाणो तुह जे?भाया रामणो जाओ त्ति ॥
जो य धणदत्त-वसुदत्ताणं जण्णवक्को नाम बंभणो मित्तो आसि सो संसारं भमिऊण विहीसण! तुमं जाओ त्ति । सिरिभूई उवरोहिओ वि वेगवईपिया सयंभुराएण मारिओ गओ देवलोयं । तओ सुप्पइट्ठनयरे जाओ पुणव्वसू णाम विज्जाहरो । तेण य पुंडरीयविजए तिहुयणाणंदचक्कवट्टिणो अणंगसुंदरी
| SR No. | 009889 |
| Book Title | Kahavali Pratham Paricched Pratham Khand |
| Original Sutra Author | N/A |
| Author | Kalyankirtivijay |
| Publisher | Kalikal Sarvagya Shri Hemchandracharya Navam Janmashatabdi Smruti Sanskar Shikshannidhi Ahmedabad |
| Publication Year | 2012 |
| Total Pages | 469 |
| Language | Hindi, Sanskrit |
| Classification | Book_Devnagari |
| File Size | 2 MB |